JESAYA 23
23
Mbudi zokuhamena Fonisiya
1Mbudi zokuhamena Tirusi zezi.
Lireni unene one vagendi vemefuta! Nzira zokokweni koTirusi zina zunguruka po; nonzugo damo nezenga lyaso marunda gana kara. Apa ngayi tunda yikepa yeni koKipurusi, tomu yi lizuvhire. 2Lireni one varandesi vaSidoni! One ngomu tumu vantu 3va tavakane efuta va ka rande oku tava randesa mahangu aga aga zangukwa moEgipite, mu ka rugane unandando nonomuhoko nadinye.
4Vana ku fisa nomuga ove sitata saSidoni. Efuta netondo lyenene lyefuta, yiyo lina kutanta asi: “Ame kapi na vhara rumwe vana. Kapi na rera rumwe vana wovagara ndi wovakadi.”
5NoVaegipite vaava ngava kankama kompwagetjima, apa ngava zuvha asi Tirusi sina hanauka po.
6Lireni unene, one Vafonisiya! Kambadareni kutjwayukira koSipaniya! 7Enye yiso tupu sitata soruhafo saTirusi esi sanare‐nare? Enye yiso tupu sitata esi ngasi tumu vantu va tavakane mafuta va ka tunge moyirongo yapeke? 8Ogu ga yi gazara a retere nayinye eyi Tirusi, sitata sosiuhompa, ohompagona vamo, varandesi ava va fumana mouzuni, yilye ogo? 9Hompa Munankondo nadinye yige ga yi gazara eyi. Age kwa yi gazarera eyi asi a hagekese po malinenepeko gawo geyi ngava rugana oku ta nunupike vanamakuto vawo.
10Zendeni mu ka lime sirongo, one vantu womoyirongo moSipaniya! Kutupu hena ogu gokumupopera. 11Hompa kwa gonwena kuwoko kwendi kefuta, yiyo ga kankamesa yirongo. Age kwa panga asi madi gonondando gaFonisiya ga hanauke po. 12Ove sitata saSidoni, ehafo lyoge lina haga po, ano vantu woge kuna kuvahepeka. Nampili va taukire koKipurusi, naposi kapi ngava ka wapa.
13(Vababironiya yiwo va sigire yikasama yi rundame moTirusi, kapisi Vaasiliya. Vababironiya yiwo va tulire po maruhungu gokutakamesera, tava bamagura nohotepopero daTirusi, sitata tava si sigi nondambo domarunda.)
14Lireni unene, one vagendi vemefuta! Sitata esi mwa huguvara, sina hanauka po.
15Tayi wiza apa ngava divara Tirusi ure wonomvhura nomurongo ntano‐nambali, siruwo soukaro wahompa. Apa ngadi pita po nomvhura odo, makura Tirusi ta kara ngwendi rusumo rohondedi oru asi:
16Gusa siumba soge o gendagure mositata,
ove hondedi gomuhepwe
ogu va divara!
Sika oku to dimbi hena nonsumo
doge, o tengwide hena vagara.
17Nomvhura nomurongo ntano‐nambali nsene dina ka pita, Hompa ta ninki hena Tirusi a tengwire konondando dendi danare, ano age nga liheheda mwene koyirongo nayinye yomouzuni. 18Yimaliva eyi nga gwana mo monondando, ngava yi pongwera Hompa. Kapi nga yi pungwisa, nye ava ava tongamene Hompa, yiwo ngava ruganesa yimaliva yendi va rande nondya noyidwara eyi va hepa.
Currently Selected:
JESAYA 23: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
