JESAYA 22
22
Mbudi zokuhamena kwaJerusarema
1Mbudi zokuhamena koMuramba gEmoneko zezi. Yinke nayi horoka eyi? Navenye womositata yinke vana kudanenena yipito keguru lyonondunda? 2Sitata mudima kuna piyagana, kuna kara nezogerero lyenene oku guna va tororoka.
Vagara veni ava va fira moyita eyi, kapi va fira moyirwa. 3Vagendesi veni navenye kwa duka, yiyo va va kwata awo va hana kuponya ko nampili sikutji simwe. 4Sigeni nge nyamelike ni lire vantu unene, navenye wombunga zange ava va fa. Mwa ha kambadara kuhengagwida nge. 5Esi yiso siruwo sompwagetjima nefundo nefisomuga moMuramba gEmoneko, ano Mupangeli, Hompa Munankondo nadinye yige ana yi tu tumine. Makuma gositata setu vana ga zungurura po, ano nonkugo dekwafo kuna kuzuvhika monondundu.
6Vakwayita wokosirongo saEramu kwa wiza awo kuna rondo nonkambe, nomauta gawo gononkanza noyikutji yawo. Vakwayita wokosirongo saKire vana wapaike yilikandwiso yawo. 7Nomuramba devhu lyewa domoJuda yido mbu turukara toyita; vakwayita wokuronda nonkambe kuna sikama pomarungavero gaJerusarema. 8Mapopero nagenye gaJuda gana zunguruka.
Apa ya horoka eyi, yipo va ka gusa yirwiso monzugo zoyirwiso. 9-10One kwa gwene mavega momakuma gaJerusarema aga ga hepere ewapeko. Tomu tarurura nonzugo nadinye moJerusarema, makura dimwe tomu di zungurura, ogo mamanya mu wapekese ko makuma gositata. Mokonda zokupungura mema, 11makura tomu simi etare mokatji kositata ga konkomokere mo mema gemediva lyanare. Nye one nokupakera ko si mbili kwaKarunga, ogu ga gazarere nayinye eyi kwanare nogu ga yi ninkisa asi yi horoke po.
12Mupangeli, Hompa Munankondo nadinye kwa mu zigidilire kulira nokukwenauka, kulimbarumuna nomutwe nokudwara nonsako. 13Nye one kuna kuzora, tomu dana yipito. Kuna kudipaga nonzwi nonongombe mu lye oku tomu nu vhinyu. Tomu tanta asi: “Tu lyeni oku tatu nu! Mungura tatu fu.”
14Mupangeli, Hompa Munankondo nadinye, mwene ga tantera nge asi: “Udona ou kapi ngava u va dongwenena po siruwo esi vana kara nomwenyo. Ame Mupangeli, Hompa Munankondo nadinye, nyame na yi tanta.”
Erondoro lyakwaSebuna
15Mupangeli, Hompa Munankondo nadinye, kwa tanterere nge asi ni ze kwaSebuna, erenga lyekurona lyombara, ni ka mu tantere asi: 16“Ove nani yisi yina ku gwana? Nonkondo musi ono limono dokulitjokwera nyamoge ntoko konontere dondundu zomamanya? 17Ove kuvhura o kare o muntuzuni, nye Hompa nga ku damuna nga ku zugumine kwina. 18Nga ku damuna ta ku zuguma ngwendi mbara a ku zugumine kosirongo sosinene. Oko yiko ngo ka fira poturukara toyita otu wa linenepekera. Ngo kara yifisamuga yembo lyahekuroge. 19Hompa nga ku tundisa mo momberewa, ta ku nyafura mo mourenga woge.”
20 Hompa ta tantere Sebuna asi: “Nsene ngayi horoka eyi, ntani nye ngani tuma mukereli gwange Eliyakimu zaHilikiya. 21Sikoverero soge sourenga noliva roge ngani yi mu dwareka, makura ngani mu pe nonkondo nadinye edi wa kere nado. Age nga kara ngwendi guhya gombunga zaJerusarema nezi zaJuda. 22Ame ngani mu pa nonkondo dokuzura dosiuhompa, doruvharo rwaNdafita. Nga kara noyipatururo yomberewa; eyi ana paturura, nagumwe si gokuyipata, ano eyi ana pata, nagumwe si gokuyipaturura. 23Ngani mu tura mevega ta koro ngwendi moomu ava pampara mboha, makura nga kare ntundiliro zefumano lyepata lyendi nalinye.
24“Vekoro lyendi nava navenye va mu hamena ngava kara mudigo gwendi. Ngava zenzerera kwendi ngwendi tuyiga notuvaza vana kulike komboha! 25Apa ngayi horoka eyi, makura mboha ezi za korere tazi zegeza tazi gu. Ano nayinye eyi ya zenzererere ko yiwo uhura wayo nye owo.” Hompa yige ga yi tanta.
Currently Selected:
JESAYA 22: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
