JESAYA 21
21
Emoneko lyehanauko lyaBabironi
1Mbudi zokuhamena Babironiya zezi.
Moomu a vindakana kakunguru momburundu, nehanauko nalyo yimo ngali wiza li tundilire kosirongo sa tjilika. 2Ame kuna mono emoneko lyoyihoroka yoyidigu, emoneko lyomuhoroli nehauko.
Vakwayita vaEramu, rweni! Vakwayita vaMediya, kundurukideni yitata! Karunga ta hagesa po ruhepo oru a reta Babironi.
3Eyi na mono neyi na zuvhu memoneko yina retere nge woma wounene nokukora, kukora ngwendi komukadi ana zegama. 4Momutwe gwange kuna kulirunga, ame kuna kukankama kowoma. Ame kwa here asi ngurova zi wize, nye eyi za retera nge woowo woma wounene.
5Sipito sina pu kuwapaika memoneko; nombandwa vana di zara va hingire po vagenda. Awo kuna kulya oku tava nu. Kuliharuka nzigo zina kuzuvhika asi: “Vakurona wovakwayita! Wapaikeni yilikandwiso yeni!”
6 Hompa kwa tanterere nge asi: “Zende o ka ture po munomeni, o ka mu tantere a divise eyi ana kumona. 7Nsene a mona vagara vana rondo nonkambe, dina yandama mbali‐mbali, novagara vana rondo koyindongili nonongameru, a purakene oku ta tara nawa.”
8Munomeni ta zigire asi: “Munekuto, ame kuna kara moyirugana yange yokunomena mutenya nomasiku.”
9Na liharuka ko, vava vana kuwiza! Vagara vana rondo nonkambe, dina yandama mbali‐mbali. Munomeni ta gava mbudi asi: “Babironi zina gu! Vakarunga woyimpempa navenye ava ngava tongamene, vana va hanagura pevhu vana rara.”
10Mbunga zange Israeli, one ngava mu zere ngwendi rukokotwa, nye ntaantani na mu divisa mbudi zongwa ezi na zuvha kwaHompa Munankondo nadinye, Karunga gwaIsraeli.
Mbudi zokuhamena Edomu
11Mbudi zokuhamena kwaEdomu zezi.
Gumwe kuna kuzigira nge moEdomu asi: “Munomeni, siruwoke naga pwa masiku? Tantera nge asi siruwoke naga pwa.”
12Ame tani limburura asi: “Ntaantani li se, nye masiku naga wiza hena. Nsene kuna hara yo pure hena, nkumwe o tengure yo pure.”
Mbudi zokuhamena Arabiya
13Mbudi zokuhamena kwaArabiya zezi.
One vantu womoDedani, ava mwa kara nonokamba mowiza waArabiya, 14peni mema vantu venota ava vana kuwiza kweni. One vantu womosirongo saTema, gaveni nondya kovatauki. 15Vantu kuna kuduka va tjwayuke nomfuro edi dina hara kuvadipaga nomauta gonkanza aga gana hara kuvaponya noyimpagwa nayinye yoyita.
16Makura Hompa ta tantere nge asi: “Momvhura zimwe ngoso unene womazimo gaKedara ngau haga po. 17Vaponyi yigo mapenda po unene moKedara, nye vangapi tupu ngava hupa po. Ame, Hompa Karunga gwaIsraeli, nyame na yi uyunga.”
Currently Selected:
JESAYA 21: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
