JESAYA 11
11
Sirongo sompora
1Malikwamo gouhompa waNdafita kwa lifana nositji esi va teta; nye nomutayi donompe tadi pwaga mosisindi, ano nahompa gomupe nage nga pwaga monontekuru daNdafita.
2Mpepo zaHompa ngazi mu pa
unongo nediwo nomayere
gokupangera mbunga zendi.
Age nga diva eharo lyaHompa
oku ta mu fumadeke,
3age nga hafera kumulimburukwa.
Age kapi nga pangera moomu
gana kumona meho gendi
ndi yonguwire;
4nohepwe nga di pangura pauhunga
ano valinunupiki vepevhu nga va
tokwera nawa.
Kompangera zendi yiko nga
futisisa vantu,
ano vantu wovadona ngava fa.
5Age nga pangera mbunga zendi
mouhunga nomousili.
6Mambungu ngaga kara kumwe
nononzwi nombili,
ano vangwe ngava rara kumwe noyikombogona.
Yitana novanyimegona
ngayi lya kumwe,
ano vanonagona yiwo ngava yi takamesa.
7Nondidi nomarundu
ngayi lya kumwe,
ano vana vayo
ngava rara nombili.
Vanyime ngava lya wayi
ngwendi nongombe.
8Nomunona gekevere googu
nga danena pombaroka,
nye nayimwe si.
9KoSiyoni, ndundu zokupongoka,
kapi ngaku kara yokuremeka
ndi yoyidona.
Sirongo ngasi zura ediwo lyaHompa
moomu lya zura efuta mema.
Nonkwate ngadi tengura
10Ezuva ngali wiza apa nga pwaga hompa gomupe momalikwamo gouhompa waNdafita, makura nga kare sihonena sonomuhoko. Awo ngava ponga mositata sendi souhompa, tava mu fumadeke. 11Ezuva olyo apa ngali wiza, Hompa nga ruganesa hena nonkondo dendi a tengwide hena vantu vendi vamwe ava va hupire moAsiliya nomoEgipite, moyirongo yoPatorosi, Sudani, Eramu, Babironiya naHamata nomoyirongo yokonontere defuta nomoyirudi. 12Hompa nga zerura sidiviso serembe, nga likidise ko nomuhoko asi age ta pongaike hena ava va liharagana wombunga zaIsraeli naJuda, a va guse ko komaruha nagenye gouzuni. 13Sirongo saIsraeli kapi hena ngasi kara nomfudu zesi saJuda, ano Juda nage kapi hena nga kara nkore zaIsraeli. 14Awo ngava lipakerera va rwise Vafilisiti ava va kara koUtokero, tava hakana ava va kara koUpumezuva. Awo ngava kwata vantu womoEdomu naMowaba, ano womoAmoni ngava va limburukwa. 15Hompa nga pwilika mpito zaSuezi, age nga reta mpepo zompyu zi pwilike Eufurata, nga sige po tupu tumukuro tutano‐natuvali totununu‐nunu, nkenye ogu kuvhura kututaguruka. 16MoAsiliya ngamu tunda nzira zonene zovantu vendi Vaisraeli ava va hupa mo, moomu za kere po zozinyakurwawo apa va tundire moEgipite.
Currently Selected:
JESAYA 11: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
