JESAYA 2
2
Mbili zanarunye
(Mika 4:1-3)
1Ezi yizo mbudi ga gava Karunga kwaJesaya zaAmosa zokuhamena Juda naJerusarema asi:
2Momazuva aga gana kuwiza
pondundu apa va dikira ntembeli,
ngapa repa kupitakana dopeke.
Azo ngazi repuruka kupita nadinye.
Ano nomuhoko dononzi
ngadi undumukira ko.
3Vantu vawo ngava uyunga asi:
“Tu rondeni kondundu zaHompa
kontembeli zaKarunga gwaIsraeli.
Age nga tu ronge eyi ana hara
tu yi rugane,
ose ngatu gende mononzira edi
ga horowora.
Yeeyi erongo lyaHompa kuna
kutunda koJerusarema.”
4Age nga kara mutokoli pokatji
konomuhoko dononene.
Ano nomfuro dawo ngava di
hambura matemo, nomagonga
gawo mamumbere gokukaswisa.
Nomuhoko kapi ngadi vyuka
hena koyita nampili nakauke,
ndi asi di liwapaikire yita.
5Ruvharo one rwaJakopo, tu
gendeni mouzera ou ga tu pa Hompa!
Elinenepeko kuliharaganesa po
6Karunga, ono tjida po mbunga zoge, ruvharo rwaJakopo! Sirongo kuna zura yirugana youmpure eyi ya tunda koUpumezuva nokoFilisitiya. Vantu kuna kukwama nonkendi dosinayirongo. 7Sirongo sawo kwa zura sisiliveli nongorodo. Ano ugawo wawo kapi ngau haga po. Sirongo sawo kwa zura nonkambe, nye matemba gawo goyita kapi ngaga haga po. 8Sirongo sawo kwa zura yikarunga yoyimpempa, kukanderera mafano aga va honga nomawoko gavene.
9Nkenye muntu ngava mu supipika nokumusundura. Hompa wa ha va dongwenena po!
10Awo ngava vanda momakombombo gomamanya monondundu, ndi ngava sima makero mevhu va kambadare kuvanda ehandu lyaHompa nononkondo nouyerere wendi!
11Ezuva ngali sika mo, apa ngava hagesa elinenepeko lyomuntu nokuharaganesa po elitumbo lyendi. Hompa gelike yige nga fumana po. 12Ezuva olyo, Hompa Munankondo nga ka nunupika nkenye ogu ga kara nononkondo nelinenepeko, a sunduke. 13Age nga haraganesa po yitji yosedeli yoyire yaLibanoni noyitji nayinye yomanyandi mosirongo saBasani. 14Nondundu dononde noyindundu ngayi hetakanesa, 15rambangako maruhungu nagenye gomare nomakuma gomapoperonzugo. 16Age nga roveka yikepa yoyinene yoyiwa. 17-18Elinenepeko lyomuntu ngali haga nelitumbo lyendi nalyo ngali haragana po. Ano vakarunga woyimpempa ngava dongonoka po. Mezuva olyo, Hompa gelike nga fumana mo.
19Vantu ngava vanda momakombombo gomamanya monondundu ndi ngava sima makero mevhu va kambadare kuvanda ehandu lyaHompa nononkondo dendi nouyerere apa nga wiza a ya nyungange evhu. 20Ano ezuva olyo apa ngali sika mo, ngava zuguma vakarunga woyimpempa wongorodo nosisiliveli ava va rugana vene. Awo ngava yi zugumina vangumbe novakafuku‐fuku. 21Apa nga wiza Hompa a ya nyungange evhu, vantu ngava vanda momakombombo gomamanya konondundu, va kambadare kuvanda ehandu lyendi nononkondo nouyerere wendi.
22Vantu wovadona va liporeni, mwa ha va huguvara. Mulyo gwawo kupi ko gwa sika nani?
Currently Selected:
JESAYA 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
