HOSEYA 9
9
Hoseya ta divisa efutiso lyaIsraeli
1Mbunga ove zaIsraeli, hagekeni kudana kweni yipito yosipagani. One kwa tunda ko kwaKarunga gweni, yiyo omu dili kumulimburukwa. Mosirongo mudima one kulirandesa nyamweni ngwendi nohondedi kwakarunga Bara, yiyo mwa hara rukokotwa oru omu gazara asi yige a ru mu futu! 2Nye ntaantani ru mu sesupe rukokotwa nomagadi gononzwe, vhinyu kapi hena ngazi kara po. 3Vantu vaIsraeli kapi ngava kara moomu mosirongo saHompa, nye ngava tengura koEgipite, tava ka lya nondya edi va silika moAsiliya. 4Moyirongo oyo yapeke kapi ngava ka wapa hena kuzambera mo Hompa nonzambo dovhinyu, ndi asi va mu retere nonzambo dawo. Nondya dawo ngadi nyateka nkenye ogu nga di lya, ngwendi nondya edi ava li momatamu. Ayo ngava yi ruganena tupu kuligusa nzara; kutupu eyi ngava twara kontembeli zaHompa ngonzambo. 5Apa ngasi wiza siruwo sosipito esi va panga kefumadekero lyaHompa, ngapi omu ngava rugana? 6Apa ngali wiza ehanauko, vantu va liharagane, Vaegipite yiwo ngava va pongaika — tava va pongaikire evhumbiko poMemufisi! Emona lyawo lyosisiliveli nomavega apa ga kere mambo gawo ngapa hokera wayi noyihwa yomega.
7Siruwo sefutiso sina wiza, esi siruwo esi apa ngava gwana vantu eyi va liruganena. Apa ngayi horoka oyo, Israeli nga yi diva! One kutanta asi: “Muporofete ogu egova. Mugara ogu gopampepo ana heruka.” One vantu kuna nyenge nge unene morwanzo zeni zina nenepa. 8Karunga kwa tuma nge ngomuporofete, ni rondere mbunga zendi zaIsraeli. Nye nkenye oku na vyuka one kuheteka kutega nge rutenda ngwendi sidira. Mosirongo saKarunga mwene vantu nonkore domuporofete. 9Vana dida nye mokurugana udona, moomu tupu va kere poGibeya. Karunga nga diworoka nzo zawo, nga zi va futisire.
Nzo zaIsraeli neyi yokukwama ko
10 Hompa ta tanta asi: “Apa na hovere kugwana Israeli, age kwa fene ngwendi mandjembere gomomburundu. Apa na hovere kumona ozinyakurweni, awo kwa fene ngwendi ekuzu lyomuhowo kuyima. Nye tupu va wiza pondundu zaPeoro, makura tava tameke kutongamena Bara, makura nare vana kara yihuna ngwendi vakarunga ava va hara. 11Unene waIsraeli ngau mu tuka moomu asi tuka sidira, kapi ngava reta hena vana, vakadi nawo kapi ngava sumbapara, kapi ngapa kara mausumba govana. 12Nye nampili va rete vana, ngani va gusa po, ni dire kuhupisa po gumwe nomwenyo. Apa nye ngani zumba vantu ava, makura yininke yokutjilisa tayi va horokere.”
13 Hompa, ame kuna kumona vana vawo kuna kuvasana va va dipage. 14Yinke nani hundira eyi no ruganena vantu ava? Ninka vakadi vawo va kukute! Va ninka yi va limbe kuzamweka vakeke vawo!
Epanguro lyaHompa kwaIsraeli
15 Hompa ta tanta asi: “Yirugana yawo nayinye yoyidona kwa tamekera moGiligali. Omo yimo na tamekera kuvanyenga. Morwa udona ou va rugana, yiyo ngani va tjidira mo mosirongo. Kapi ngani va hara hena; vagendesi vawo navenye kuvyuka nge. 16Mbunga zaIsraeli kwa fana ngwendi simeno esi sa kukuta, nondandani esi asi dili kuyima yiyimwa. Kapi ngava reta vana, nye nampili wokukara nawo, ame ngano ngani dipaga vana owo va hara.”
Muporofete ta uyunga yokuhamena Israeli
17Karunga ogu ani ruganene nga nyenga vantu vendi, morwa kapi ava mu purakene. Ngava kara varendarendi monomuhoko.
Currently Selected:
HOSEYA 9: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
