HOSEYA 10
10
1Mbunga zaIsraeli kwa fene sindjembere esi sa zulire mandjembere. Mokuragopa kwawo unene, yimo hena mokutunga kwawo yizambero yoyinzi. Mokuzanguka unene sirongo sawo, yimo hena mokulimbagura unene nongundi domamanya edi ava tongamene. 2Vantu wonomutjima doyimpempa yiwo kuhepera nonzo dawo. Karunga nga zungurura yizambero yawo, ta tezagura nongundi dawo dokupongoka.
3Vantu ava ntaantani va tante asi: “Kapi tuna paka mupangeli, morwa kapi twa tjira Hompa. Nye hompa yinke nye na tu ruganena?” 4Awo kuwazauka nonkango domawoko‐woko tava ninki matumbwidiro goyimpempa nomagwanekero ga hana sikwafa. Uhungami kuna kara uhahungami, kuna kukura ngwendi wayi wouhungu mepya lyokupurura.
5Vantu ava va kara mositata saSamaliya, ngau va gwana woma, tava lilire ezumbaneso lyontwedu zongorodo poBeteli. Awo novapristeli vawo ava ava ruganene ogo karunga goyimpempa ngava mu lira. Ngava kwenauka apa ngava mu hutura uwa wendi wongorodo. 6Karunga goyimpempa ngava mu twara koAsiliya ngomutero gwahompa gomunene. Israeli nga swauka ta fu nomuga, morwaepukururo eli ga kwama. 7Mupangeli gwendi ngava mu twara, ngwendi sivambi kontunda zomema. 8Mavega gokupongoka kondungu zondundu zaAveni, oku ava tongamenene Vaisraeli vakarunga woyimpempa, ngava ga zungurura. Mega nowayi ngayi mena poyizambero. Vantu ngava zigira nondundu asi: “Tu horekeni!” Ano yindundu asi: “Tu kudumikeni!”
Hompa ta divisa epanguro kwaIsraeli
9 Hompa ta tanta asi: “Mbunga zaIsraeli kapi za hageka kuzona kwange hava tundira ponzo zawo poGibeya. Ano yita yaGibeya ngayi va gwana. 10Ngani rwisa vantu ava wovadona ni va futise. Nomuhoko ngadi lipakerera di va vyuke, awo ngava va futisira nonzo dawo dononzi.
11“Israeli kwa kere ngwendi ndema ezi va ronga nawa, za liwapaika azo za hara kuhwaga rukokotwa. Nye ame kwa tokora ni mu ture ndjoko konsingo zendi zongwa, ni mu kutilire yirugana yoyidigu. Ame kwa ninka Juda a koke sipururu ano Israeli a koke emuruwoworo. 12Tani tanta asi: ‘Lipurwireni evhu lyepe, tapekeni uhungami, ngomu teze matungiko aga ngaga tundilira mokutongamena nge. Esi ngesi yiso siruwo seni sokutengwira kwange, ame Hompa gweni, makura ame ngani wize ni mu pimpire matungiko.’ 13Makura one yiyo nye mwa tapeka udona mu u zangure. One kulya yiyimwa yokutundilira moyimpempa yeni.
“Morwa one kwa huguvara moturukara tweni toyita nomovakwayita veni wovanzi, 14yipo nye ngayi wizira yita kovantu veni, ano nohotepopero deni nadinye ngava di hanagura po. Ayo ngayi kara ngwendi yezuva eli ga hanagwire hompa Salimani sitata saBete‐Arebeli moyita, ano ozinya novana vawo tava va myona va fe. 15Oyo yiyo ngayi mu horokera one vantu womoBeteli, morwa udona woudigu ou mwa rugana. Tupu ngayi tameka yita, makura hompa gwaIsraeli ta fu.”
Currently Selected:
HOSEYA 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
