HOSEYA 2
2
1Ano tumbureni Vaisraeli vakweneni “Mbunga zaKarunga” hena asi “Vaharwa‐vaHompa”.
Gomere muhalimburukwi — Israeli muhalimburukwi
2Vana vange, tangwiseni zinyeni — mpili ngomu ana dili kukara hena mukadange, ame kapisi ni yendi hena. Mu tangwiseni a zumbe ruhonda nouhondedi wendi. 3Nsene ana nyoka, ngano ngani mu hutura, ta kara muhere‐here moomu va mu retere. Ngani mu ninka ta kara ngwendi sirongo sosikukutu somawoko‐woko, makura nga fe kenota. 4-5Kapi ngani fira nkenda vana vendi; awo vana wohondedi za hana nomuga. Age mwene kwa tanta asi: “Ame kuna hara kuza koyihora yange — tava ka pa nge nondya nomema nonohuki dononzwi nolina nomagadi gononzwe novhinyu.”
6Ano ame tani mu gumbire nye ngumbu zomega, ni mu tungire ekuma li sitike nzira zendi. 7Nga tjida yihora yendi, nye nokuyikwata si. Nga yi papara, nye nokuyigwana si. Makura ntani nga tanta asi: “Tani tengura kwayange gopomuhowo — pena na wepe kapisi roru.”
8Kapi ga yi kwata egano asi nyame ani mu pe mahangu novhinyu nomagadi gononzwe nosisiliveli nongorodo nazinye ezi a ruganesa mokutongamena Bara. 9Ano pokuteza‐teza ngani mu gusa mahangu novhinyu, tani mu gusa nohuki dononzwi nolina eyi na mu pere yoyidwara. 10Ngani mu hutura a kare muherehere komeho zoyihora yendi, kutupu ogu nga vhura kumuparura mo mononkondo dange. 11Nga hagesa po yipito yendi — yipito yomumvho nomakwedi noMasabata — yigongi youkerelikarunga yendi nayinye. 12Ngani hanagura po yindjembere yendi nomaukuzu gendi, aga a tanta asi yihora yendi ya ga mu pa mokuvaruganena. Yikunino yendi yoyindjembere noyitji yonombya ngani yi purura tayi kara mburundu; yikorama yomowiza ngayi yi swavita po. 13Ngani mu futisira yiruwo eyi ga divara nge apa nga swakererere Bara manganganga gokututumikidisa, ta litjapere maurenga a tjida‐tjide yihora yendi. Hompa yige ana yi uyunga.
Eharo lyaHompa kombunga zendi
14Ngani mu tengwida hena momburundu; omo yimo ngani ka mu goromwena nononkango deharo. 15Ngani mu tengwidira yikunino yendi yoyindjembere, tani ninki Muramba goUdigu gu kare evero lyendindiro. Age ngatu ligwa nendi moomu ga kere usesu wendi, age yipo ana kutunda moEgipite. 16Makura yipo nye nga tumbwira nge hena asi ni yendi — kapi nga tumbura hena asi nyame ni Bara gwendi. 17Kapi ngani mu tarerera hena a uyunge edina lyaBara.
18Posiruwo oso ngani paka po egwanekero noyikorama noyidira nayinye, asi ngayi dire kuzonagura vantu vange. Ngani gusa mo hena yirwiso nayinye yoyita mosirongo, nomfuro nomauta nagenye gonkanza, makura tani ninki vantu vange va kare nombili nompora.
19Israeli, ame ngani ku heha o kare mukadange;
ngani kara mousili noulimburukwi;
ngani ku hara tani ku fire nkenda
narunye ngo kare gwange narunye.
20Ngani sikisa mo etumbwidiro lyange
tani ku ninki o kare gwange,
ngo divire nge po asi
nyame Hompa.
21-22Posiruwo oso ame ngani
limburura makanderero
gombunga zange Israeli.
Ngani rokesa mvhura pevhu,
makura evhu ngali rete
mandjembere nononzwe.
23Ngani tapeka vantu vange
mosirongo, tani va ragopeke.
Ngani hara ogu ngava tumbura
asi “Muhaharwa”,
nava ngava tumbura asi
“Kapisi‐mbunga‐zange”,
Ame ngani tanta asi: “One
mbunga zange,”
ano awo tava limburura asi:
“Ove Karunga gwetu.”
Currently Selected:
HOSEYA 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
