HOSEYA 1
1
1Ezi yizo mbudi ezi ga gavere Hompa kwaHoseya zaBeli pouye woUsiya naJotamu naAhasi naHisikiya, ohompa vaJuda, ano Jerobiyamu zaJehoyasi age hompa gwaIsraeli.
MukadaHoseya novana vendi
2Apa ga uyungilire pomuhowo Hompa Israeli mwaHoseya kwa tanterere Hoseya asi: “Zende o ka kware; mukadoge nga kara muhalimburukwi, ano vana woge nawo ngosikwawo. Vantu vange nawo yimo va zumba nge ngorooro, makura yiyo va kara vahalimburukwi.”
3Hoseya makura ta kwara mukadi gedina Gomere, munwaDiburayimu. Eyi va reta mbeli zawo gomugara, 4Hompa ta tantere Hoseya asi: “Mu ruka ‘Jesireli,’ morwa kapi napa pita siruwo ame na hana kufutisira mo hompa gwaIsraeli monzo zomadipago ezi ga tulire zinakaru poJesireli. Tani ka hagesa po epatapangero lyaJehu. 5Momuramba gwaJesireli, yimo ngani hanagura posiruwo oso nonkondo doukwayita waIsraeli.”
6Gomere ta reta muna gwauvali — apa ngesi gomukadi nye. Hompa ta tantere Hoseya asi: “Mu ruka ‘Muhaharwa’, morwa kapi ngani hara hena vantu vaIsraeli ndi asi ni va dongwenene po. 7Nye vantu vaJuda ngani va hara. Ame Hompa Karunga gwawo ngani va parura, nye kapi ngani yi ruganesa koyita — konomfuro nomauta gonkanza noyikutji nononkambe novarondi wononkambe, hawe.”
8Eyi ga toveka Gomere munwendi gomukadi, ta kara hena marutu gavali ta reta hena muna gomugara. 9Hompa ta tantere Hoseya asi: “Mu ruka ‘Kapisi‐Mbunga‐Zange,’ morwavantu vaIsraeli kapisi mbunga zange, ano ame kapisi Karunga gwawo.”
Israeli nga wapa hena
10Vantu vaIsraeli ngava kara ngwendi muheke gwekefuta, nokuvhura si kuvavarura ndi kuvaheteka. Apa ngesi Karunga ta va tantere asi: “One kapisi mbunga zange,” nye ezuva tali wiza apa nga va tantera asi: “One vana vaKarunga Munamwenyo!” 11Vajuda noVaisraeli ngava lipakerera hena. Awo ngava lihorowera mugendesi gumwe tupu, tava kuru tava ragopa hena mosirongo sawo. Nhi, ezuva lyaJesireli ngali kara ezuva lyenene!
Currently Selected:
HOSEYA 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
