HABAKUKU 2
2
Hompa ta limburura Habakuku
1Ame ngani ronda koruhungu rwange ni ndindire, ni mone eyi nga tantera nge Hompa, ni ka yi uyunge nelimbururo eli na ka limburura komatangano gange.
2 Hompa ta limburura nge asi: “Tjanga eyi yina kuzuvhika nawa poyiperende yerova eyi nina kukuhorwera, yipo ngava vhure kukayiresa megenderero. 3Yi tjanga tupu, yeeyi ruveze simpe kapi runa siki mo yi horoke. Nye siruwo kuna kungederera unene, asi eyi nina kukulikida yi ka sike mo. Kuvhura yi liwore, nye yi ndindire tupu. Ayo yiyo tupu kuhoroka nogu si ogu na yi rangesa. 4Mbudi yizo nye ezi: ‘Vakadona, kapi ngava paruka, nye vahunga ngava paruka, yeeyi awo kwa limburukwa kwaKarunga!’ ”
Vahahungami tava va pangura
5Emona, mukumbageli. Vantu vedowo kulinenepeka nye kapi ava mwena. Awo ngonomfa, dene kapi ava kuta. Morweyi, yiyo va homwene tunda muhoko zende muhoko. 6Nonkwate ngadi zora vakwati vado nokuvalikida eswau lyokuvaswaura. Awo ngava uyunga asi: “One kugusa eyi ya hana asi yeni, yipo nye vana mu fingire! Dogoro ezuvake ngomu ragopa mokusininika womakongo geni va fute?”
7One ava omu hokora vakweneni, nyamweni ngomu kara nomakongo, one mwa hana kuyidiva, nye ngava mu sininika mu fute nonsonso zeezi. Nonkore ngadi wiza di ya mu tjilise. Ado ngadi ya mu hakana! 8One kwa hakana vantu womonomuhoko dononzi, nye ntaantani ava va hupa po, ngava ku hakana, morwamadipago aga mwa rugana nepiyaganeko lyovantu womouzuni noyitata yawo.
9One vana mu fingi! One kuna ngawopeke mapata geni neyi mwa hakana, yiyo omu kambadara kugamena mambo geni koyimpagwa! 10Nye elikwamo lyeni, lina retere mapata geni nomuga. Ano mokuharaganesa po nomuhoko dononzi, nyone vene mwa likokera ezonauko. 11Nomamanya gomakuma gaaga, kuna kukuga ga mu rwise, ano sikumo sezwi monohonga ngasi limburura.
12One vana mu fingi! One kwa vareka sitata nourunde, tomu si tungu nohonde. 13Nomuhoko edi mwa rwisa dina sunduka, novarugani tava lihepeke mawoko‐woko.
Ano nayinye eyi va tunga kuna kudumuka momundiro. Eyi Karunga Munankondo ana yi rugana. 14Nye evhu ngali zura unongo nefumano lyaHompa moomu lya zura efuta mema!
15Ono pu kupangura! Mehandu lyoge lyenene ove kwa swaura, yiyo wa fisa nomuga vamaparambo woge; ove kwa va ninkisa va pundauke ngwendi vava asi kuna korwa. 16Ano nove ngadi ku gwana nomuga pevega lyefumano. Nove nyamoge ngo nwa, to pundauka. Hompa nga ku ninka o nwe monkinda zamoge zefutiso, ano efumano lyoge ngali kara eswau. 17Ove kwa komangera wiza waLibanoni; ano apa ngesi nyamoge nye ngava komangera. Ove kwa dipaga yikorama; ano apa ngesi yikorama nye ngayi ku tjilisa. Eyi ngayi horokera morwaedipago eli wa rugana nepiyaganeko lyoge lyovantu womouzuni noyitata yawo.
18Karunga goyimpempa sikwafa musinke? Age yuma tupu eyi ga rugana muntu, ano age yimpempa yelike a ku tantere. Uwa musinke nau kara po wokumuhuguvara ogu ga mu rugana — karunga ogu ga ha vhuru nokuuyunga kooku! 19Ono pu kutokora. Ove ku tantera egogwa asi: “Pinduka!” Ndi emanya asi: “Katuka!” Karunga goyimpempa kuvhura nye a ku horwere yuma ndi? Kuvhura va mu vambaike sisiliveli nongorodo, nye mwendi mutupu mwenyo.
20 Hompa mweli montembeli zendi zokupongoka; nkenye ogu gepevhu a mwene kosipara sendi.
Currently Selected:
HABAKUKU 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
