HESEKIYELI 48
48
Egawinino lyosirongo komazimo
1-7Mururani gokoMuzogo gosirongo kwa vyuka Upumezuva kutundilire kEfuta lyopokatji gu vyuke koHetironi nokoHamati nokositata saEnoni nokomururani gopokatji komauntungi gaDamasikusi naHamati. Nkenye ezimo tali gwana ruha rosirongo rokutundilira komururani gokoUpumezuva ru vyuke Utokero dogoro kEfuta lyoPokatji, melikwamo eli kutundilira koMuzogo kuza koMbindakano:
Dana, Aseli, Nafitali, Manase, Efurayimi, Rubena, Juda.
Ruha rokulikerera ropokatji kosirongo
8Ruha rokukwama ko rosirongo kurulipakera ru kare royirugana ya likerera. Taru kara ronokilometa murongo nambali noharufa monompatji, kutunda koMuzogo o ze koMbindakano kutunda Upumezuva o ze Utokero napo ngosikwawo ngwendi maruha aga va pa mazimo. Ntembeli yimo ngava zi tungira moruha oru.
9Pokatji kevega eli tapa kara evega lyokulikerera lyonokilometa murongo nambali noharufa, monompatji nokilometa murongo. Olyo kulipongwera Hompa. 10Mevega eli lyokupongoka vapristeli tava gwana mo ruha rwawo. Kutunda koUpumezuva kuza koUtokero ruha rwawo tava ru heteke ronokilometa murongo‐nambali noharufa, ano kutunda koMuzogo o vyuke koMbindakano nokilometa ntano. Ntembeli zaHompa tazi kara pokatji kevega eli. 11Evega eli lyokupongoka tali kara lyovapristeli ava va tunda mwaSadoko. Awo kwa ruganena nge mouhunga, kapi va lipakerera noVaisraeli peke mokurugana udona, moomu va rugana vakwaawo vemezimo lyaRevhi. 12Ano awo tava kara nevega lyokulikerera nzega nevega lyoVarevhi, ano alyo ngali kara lyokupongokerera kwanagenye. 13Varevhi nawo tava kara nevega lyokulikerera, koMbindakano zeli lyovapristeli. Nalyo tali kara lyonokilometa murongo nambali noharufa kutunda Upumezuva o ze Utokero, monompatji nokilometa ntano kutunda koMuzogo o ze koMbindakano. 14Evega eli va pongwera Hompa yilyo lyewa po mosirongo mudima, nokurandesa ko si ndi va li sinte ndi asi li ze momawoko gagumwe gwapeke. Alyo kwa pongoka, alyo hena lyaHompa.
15Ruha rokulikerera rokuhupa ko, nokilometa murongo nambali noharufa, monompatji nokilometa ntano, aro kapi rwa pongoka, nye taru kara rokuruganesa nkaramuntu. Awo kuvhura va tunge mo va ruganese sirongo. Sitata tasi kara pokatji karo, 16tasi kara sosikwambando, kusiheteka nometa 2 250 nkenye ruha. 17Kukundurukida sitata kwankenye ruha ngaku kara evega lyomawokowoko lyonometa 125 monompatji. 18Evega lyokuhupa ko nsene sitata sina pu kutunga mevega lyokorwaMbindakano zevega lyokupongoka — nokilometa ntano, monompatji nokilometa mbali noharufa koUpumezuva, ano nokilometa ntano, monompatji nokilometa mbali noharufa koUtokero — lyokulima vantu ava va kara mositata. 19Nkenye ogu ga kara mositata, kutupu mbudi asi gemezimo lyolye, kuvhura tupu a lime pevega olyo.
20Ano evega nalinye lyopokatji koruha oru va lipakera, ngaru kara sikwambando va heteka nokilometa murongo‐nambali noharufa kwankenye ruha, amo ngamu kara hena nevega lyositata.
21-22Upumezuva noUtokero wevega eli lya kara ntembeli nosirongo sovapristeli nesi soVarevhi nositata, sirongo esi sa hupa ko sahompa. Aso kwa vyuka Upumezuva dogoro komururani goUtokero, ano Utokero dogoro kEfuta lyopokatji. KoMuzogo kwa ka hagera kevega lyaJuda, ano koMbindakano kwa ka hagera kevega lyaMbenyameni.
Sirongo somazimo makwawo
23-27KoMbindakano zevega eli lyokulikerera, nkenye ezimo eli lina hupu ko tali gwana evega lyosirongo, kutundilira komururani gokoUpumezuva si ze Utokero dogoro kEfuta lyoPokatji, melikwamo eli kutunda koMuzogo o ze Utokero: Mbenyameni, Simiyoni, Isasikali, Seburoni, Gada.
28KorwaMbindakano zosigaununo esi va pa Gada, mururani kwa vyuka Mbindakano‐tokero kutunda Tamara gu vyuke komarunone gaKadesi, ntani Muzogo‐tokero, gu kwamese mururani gwaEgipite dogoro kEfuta lyoPokatji.
29 Hompa Mupangeli ta tanta asi: “Ngoso yimo nye ngomu si gaununa sirongo momaruha komazimo gaIsraeli, si kare sawo.”
Marungavero gaJerusarema
30-34Mavero gositata saJerusarema murongo‐nagavali. Makuma gane nkenye eli heteko zalyo nometa 2 250, mavero galyo gatatu, nkenye eli kwa li ruka ezimo limwe. Marungavero gokoMuzogo kwa ga ruka Rubena, Juda naRevhi; gekuma lyoUpumezuva, oJosefa naMbenyameni naDana; gekuma lyokoMbindakano, oSimiyoni naIsasikali naSeburoni; ano gekuma lyokoUtokero oGada naAseli naNafitali. 35Ekuma nalinye lyositata konombinga nadinye ne monaure walyo nometa mayovhi gatano‐nagane. Edina lyositata kutunda apa ngesi yilyo asi:
“Hompa‐mweli!”
Currently Selected:
HESEKIYELI 48: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
