HESEKIYELI 47
47
Mukuro gokupupa gu tunde montembeli
1Mugara ta tengwida nge kerungavero lyontembeli. Ni tare, mema kuna kupoposa konhi zosikuravero ga vyuke Upumezuva, morwa ntembeli kwa vyuka Upumezuva. Mema makura taga pupu konhi zekuma lyorulyo lyontembeli, ga pitakane koMbindakano zosizambero. 2Makura ogo mugara ta pwagesere nge kevero lyokoMuzogo, a kundwilise nge kerungavero eli lya tara Upumezuva. Kamukurogona ako kuna kupupa ka tunde koyiha yoMbindakano zerungavero. 3Mugara nongodi zendi zokuhetekesa ta heteke nometa mafere gatano a vyuke muwogedo koUpumezuva, ta tantere nge asi tu zauke nendi momukuro. Mema taga hulire nge mononcugu. 4Ta heteke ko hena nometa mafere gatano, mema taga hulire nge monongoro. Nometa hena dimwe mafere gatano, mema taga huru nge mombunda. 5Ta heteke ko hena nometa mafere gatano, hawe etondo nye, nokuvhura si hena kuzauka. Etondo kapisi lyokuzauka ntudi kuzoga. 6Ta tantere nge asi: “Munwamuntu, yi tara nawa eyi.”
Makura ogo mugara ta tengwida nge konontere domukuro, 7ano eyi na ka sika ko, tani mono yitji yoyinzi‐yoyinzi konontere nadinye. 8Ta tantere nge asi: “Aga mema taga pupu mosirongo ga vyuke Upumezuva, ga ka kunkumuke momuramba gwaJorodona ga ka sike kEfuta lyoKufa. Nsene gana bubuka mEfuta lyoKufa, mema gorungwa taga kara gomawa. 9Nkenye oku gana kuvyuka mema, ngaku kara marudi nagenye goyikorama nonomfi. Mukuro ngagu wapeka mema gemEfuta lyoKufa, ano nkenye oku ngagu vyuka, ngagu reta mwenyo. 10Kutundilira komarunone gaEngedi dogoro komarunone ga Enegerayimu, ngaku kara vakwati wonomfi konontere defuta, ano awo yiko ngava zaneka makwe gawo ga kukute. Ngaku kara marudi gomanzi gonomfi peke‐peke ngwendi demEfuta lyopokatji. 11Nye mema gomomakango noyidiva konontere defuta kapi ngaga wapa. Ngayi kara ngorooro mokutunda mungwa. 12Konontere nadinye domukuro yitji nayinye yomarudi peke‐peke ngayi kura, yi gave nondya. Yihako yayo kapi ngayi kukuta, ano enyango lyayo kapi ngali pwa ko. Nkenye kwedi tayi kara nenyango lyepe, yeeyi mema gayo kutunda montembeli. Enyango lyayo lyokulya, ano yihako yayo yokuruganesa mokuverura vantu.”
Nomururani dosirongo
13 Hompa Mupangeli ta tanta asi: “Edi yido nomururani dosirongo esi ngava gawinina mazimo murongo‐nagavali, ano Josefa ta gwana maruha gavali. 14Ame kwa tumbwidilire ozinyakurweni nomugano asi sirongo esi ngani si va pa si kare sawo; ngesi si ligawinineni si hetakane.
15“Mururani gokoMuzogo tagu vyuka Upumezuva gu tunde kEfuta lyoPokatji gu ze kositata saHetironi nokompito zaHamati nokositata saHedadi, 16nokoyitata yaBerota naSiburayimu (ayo kwa yi dika pokatji komukunda gountungi waDamasikusi nountungi waHamati), dogoro nokositatata saTikoni (esi va dika komururani gountungi waHaurani). 17Ano mururani gokoMuzogo tagu tundu kEfuta lyoPokatji gu vyuke Upumezuva gu ze kositata saEnoni, kumwe nomururani gonomukunda daDamasikusi naHamati koMuzogo gwendi.
18“Mururani gokoUpumezuva tagu gendi koMbindakano gu tunde pokatji kosirongo saDamasikusi naHaurani, ano mukuro gwaJorodana tagu kara mururani pokatji kosirongo saIsraeli koUtokero, Giliyata koUpumezuva, dogoro Tamara kEfuta lyoKufa.
19“Mururani gokoMbindakano kutundilira poTamara gu vyuke komarunone gaKadesi, ntani Muzogo‐tokero gu kwamese mururani gwaEgipite gu vyuke kEfuta lyoPokatji.
20“Mururani gokoUtokero gwEfuta lyoPokatji gu vyuke koMuzogo dogoro kevega lyokoUtokero waHamati.
21“Ligawinineni sirongo momazimo geni; 22aso ngasi kara emona lyeni lyanarunye. Vanayirongo ava mwa kara nawo yiyo va retera mo vana, nawo va gwane ko ruha rwawo, nsene tomu si gaununa. Nawo tomu va rugana ngwendi nomvharerwa daIsraeli. Nawo tomu va pe ko maruha gosirongo kumwe nomazimo gaIsraeli. 23Nkenye mukalimo gomunayirongo ta gwana ruha rwendi kumwe novantu vezimo eli ga tunga nalyo. Ame Hompa Mupangeli, nyame na yi uyunga.”
Currently Selected:
HESEKIYELI 47: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
