NDANIYERA 1
1
ESANSEKO LYANDANIYERA NOVAKWAWO
(1:1—6:28)
Vamati mombara zaNebukadenesara
1Momumvho gwautatu gwaJoyakimu mouhompa waJuda, hompa Nebukadenesara gwaBabironiya yimo ga homwene Jerusarema a kundurukide sitata. 2Hompa ta mu sigi a kwate hompa Joyakimu, a guse hena emona limwe lyontembeli. Age kwa gusire nonkwate dimwe a tengure nado kontembeli zovakarunga vendi moBabironiya, makura emona eli ga ka kwete, ta li tura mononzugo dokupungwira dontembeli.
3Makura hompa ta tumu Asipenasi, erenga lyenene lyombara asi a ka horowore mononkwate dovaIsraeli vamati vamwe mezimo lyohompa nomomapata govanamadina. 4Va kare womarutu gandjewa‐ndjewa womutaro, vakonentu wounongo mudima, wonomutwe dononderu dokukwata usimbu yininke, awo va kara hena nonkedi zokukeresa mombara. Asipenasi a va ronge kuresa nokutjanga eraka lyoVababironi. 5Hompa kwa pangere hena asi ava va pe nondya novhinyu ezi ava pe womombara. Konyima zonomvhura ntatu derongo lyawo ntani nye vana kuyamoneka kwahompa. 6Mokatji kowo va horowere mwa kere oNdaniyera naHananiya naMisayeli naAsaliya, navenye vemezimo lyaJuda. 7Erenga lyenene tali va ruku madina gomape aga: Belitesasara, Saduraka, Mesaka naAbetenego.
8Ndaniyera kwa tokwere asi age nokulinyateka si mwene pampo mokulya nondya nomokunwa vhinyu zombara, makura ta hundire Asipenasi a mu kwafe, 9ano Karunga ta ninki Asipenasi a mu tare nomeho gomawa Ndaniyera. 10Asipenasi kwa tjilire hompa, makura ta tantere Ndaniyera asi: “Hompa kwa mu tokwera yokulya neyi yokunwa, ano nsene mu kisumuka yipara yeni mu dire kulifana novamati vakweneni, ngano nga dipaga nge.”
11Makura Ndaniyera ta zi komunomeni ogu ga tulilire po Asipenasi oNdaniyera novakwawo vatatu. 12Ta tanta asi: “Tu heteka mazuva murongo, o tu pe ehidi lyokulya nomema gokunwa. 13Makura ntani nye ngo tu hetakanesa novamati ava ava li nondya dombara, makura to tokora nye moomu tuna fanene.”
14Gwina makura ta pura, ta va sigi va yi heteke mazuva murongo. 15Ga pita po ogo mazuva murongo, kuvatara vana nete kupitakana ava ngava li nondyazuni domombara. 16Kutunda opo munomeni ta va sigi ngorooro, va twikire kulya ehidi pevega lyeyi ga va pere hompa.
17Karunga ta pe owo vamati vane ediwo nonondunge domatjangwa nounongo. Ndaniyera ta mu pe hena nondunge dokufaturura mamoneko nononzodi.
18Da pwa odo nomvhura ntatu edi ga pakere po hompa, Asipenasi ta twara vamati navenye kwahompa Nebukadenesara. 19Makura hompa ta tameke kuvauyungisa navenye, ano oNdaniyera naHananiya naMisayeli naAsaliya tava mu zi unene komutjima kupitakana navenye. Makura tava kara nawo wokuruganena hompa. 20Nye nayinye younongo nomayere eyi nga va pura hompa, ga mwene asi awo kwa pita vapumbi nonompure domosirongo sendi nasinye romurongo. 21Ndaniyera kwa kere mombara dogoro hompa Koresi gwaPeresiya ta kwata Babironiya.
Currently Selected:
NDANIYERA 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
