HESEKIYELI 46
46
Hompa noyipito
1 Hompa Mupangeli kuna kutanta asi: “Muvero gokoUpumezuva gokuvyuka korugumbo romonda kuhepa kukara vana gu pata posiruwo somazuva gatano‐nalimwe goyirugana, nye momazuva gEsabata naga goyipito yokwedi kokupe tagu kara guna paturuka. 2Hompa a tunde morugumbo roponze a ze monzugo zonene a pitire mevero, makura a sikame poyiha yoyikuravero yomuvero siruwo esi vapristeli kuna kuswakerera nonzambo dendi deswakerero nokuzamba nonzambo dombili. Ano age a kandererere opo pevero, makura a pwage mo a ze. Muvero nokuguzedira si dogoro ngurova. 3Nkenye Esabata nosipito sokwedi kokupe, vantu navenye nawo va linyongamene va kanderere Hompa komeho zomuvero.
4“MEsabata hompa a rete kwaHompa nzambo zokuswakerera nuunu, nonzwigona ntano‐nazimwe nekungwe limwe, nayinye ya hana sipo. 5Nkenye ekungwe kulireta kumwe nonzambo zorukokotwa zonolita murongo nantano‐nambali, ano nkenye nzwigona kuzireta nankenye eyi ana hara kugava. Nankenye nzambo zangoso zonombuto a zi rete nonolita ntatu domagadi gononzwe. 6Posipito sokwedi kokupe a zambe ntwedugona nononzwigona ntano‐nazimwe nekungwe, nayinye ya hana sipo. 7Nankenye nzambo zontwedu nekungwe pa kare nolita murongo nantano‐nambali dorukokotwa, ano kumwe nonzambo zonzwigona hompa ta reta yeeyi ana hara kugava. Nolita ntatu domagadi gononzwe kudizamba kumwe nonzambo zangoso zonombuto dorukukotwa. 8Hompa a tunde monzugo zonene a pwagere zerungavero zeezi ka hwililire.
9“Nsene vana wiza vantu va ya tongamene Hompa pwankenye tupu sipito, ava vana kuhwililira kerungavero lyokoMuzogo, tava pwagere kerugavero lyokoMbindakano pokumana kutongamena, ano ava vana hwililire lyokoMbindakano, tava pwagere kweli lyokoMuzogo. Nagumwe si gokupwagera kweli ana hwililire, nye ta pwagere kekwawo. 10Hompa ta hwilire mo nsene vantu vana wiza, ano mokupwaga ta pwaga nsene tava pwaga. 11Pomazuva goyipito nzambo zonombuto nolita murongo nantano‐nambali noharufa mwankenye ntwedu nekungwe, neyi ana hara kugava mutongameni nankenye nzwigona. Nolita ntatu domagadi gononzwe kudizamba nankenye nzambo zangoso zonombuto.
12“Ano hompa nsene a hara kuzamba nzambo zemeharo lyamwene kwaHompa, zi kare zokuswakerera nuunu ndi zompandu, erungavero lyokoUpumezuva lyokutwara morugumbo romonda tava mu zegwilire. Ozo nzambo ta zi rugana moomu a rugana mEsabata, ano nsene ana pwaga mo, erungavero tava li zedire.”
Nzambo zankenye ezuva
13 Hompa ta tanta asi: “Nkenye ngurangura nzwigona zomvhura zimwe za hana sipo tava zi swakerere nuunu zi kare nzambo zakwaHompa. Nzambo ezi kuzirugana nkenye ezuva. 14Nonzambo hena zonokilogarama mbali dousura kuzininka nkenye ngurangura ano lita zimwe zomagadi gononzwe zokuduvisa usura. Nompangera edi donzambo zakwaHompa danarunye. 15Nzwigona, usura nomagadi gononzwe yokuzambera Hompa nkenye ngurungura dogoro narunye.”
Hompa nosirongo
16 Hompa Mupangeli ta panga asi: “Hompa nsene a gava ruha rumwe rwepya kwamunwendi gomugara uhwi, taru hamene kogoogo muna, ru kare ruha rougawo wepata lyendi. 17Nye hompa nsene a gava ruha kwagumwe gomoyirugana yendi, ngaru kara hena emona lyendi momumvho gwemanguruko. Aro kwa mu hamena, gelike novana vendi wovagara yiwo wokuruweka narunye. 18Hompa nokuvagusa si vantu emona lyawo. Nkenye ruha oru ana kupa vana vendi wovagara ru tunde kosirongo esi va mu pa asi ga ha hepeka vantu vange pokugusa sirongo sawo.”
Mavega gokuterekera gontembeli
19Mugara ta twara nge pevero lyononzugo edi da tara Muzogo pepi nerungavero lyokorwaMbindakano zorugumbo romonda. Edi yido nonzugo dokupongoka dovapristeli. Ta like evega lyokoUtokero wononzugo 20ta tanta asi: “Eli yilyo evega lyokuterekera vapristeli nyama zonzambo zononzo nononzambo detengwidokuwoko nomu mokuduvira nonzambo douzura, asi kutupu sokupongoka sokutwara morugumbo roponze, omu na si vhura kukoresa vantu konomutjima.”
21-22Makura ta twara nge morugumbo roponze ta likida nge asi mwankenye ekovhu lyomakovhu gane kwa kere mo karugumbogona, nometa nomurongo mbali monaure, monompatji nometa murongo nantano. 23Nkenye oru kwa ru kundurukidire rugumbo romamanya, nomavega gomundiro aga va tungilire kekuma. 24Ogo mugara ta tantere nge asi: “Aga yigo masuga gokuterekera vakareli wontembeli nonzambo edi ava zamba vantu.”
Currently Selected:
HESEKIYELI 46: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
