HESEKIYELI 45
45
Ruha rwaHompa rosirongo
1Sirongo nsene tomu si ligavere momazimo, ruha rumwe tomu ru pongwere Hompa. Monaure si hure ponokirometa murongo nambali noharufa, monompatji nokilometa murongo. Evega nalinye olyo ngali kara lyokupongoka. 2Omo ngoso mu kare evega lyontembeli lyosikwambando, nkenye ruha nometa 250, li li kundurukide evega lyomawoko‐woko lyonometa nomurongo mbali nantano monompatji. 3Mevega eli ono heteke to heteke mo evega lyonokilometa murongo‐nambali noharufa monaure ano monompatji nokilometa ntano; omo yimo nye ngamu kara ntembeli; evega lyokupongokerera kwanagenye. 4Aro ngaru kara ruha rokupongoka rosirongo, oru va gusira ko vapristeli ava ava kerere Hompa montembeli zendi. Yimo ngamu kara mambo gawo noruha rwevega lyontembeli. 5Harufa zimwe zevega tava zi lipakere zi kare ugawo woVarevhi, ava ava rugana yirugana montembeli. Omo yimo ngamu kara yitata yawo, ngava tunge mo.
6Evega limwe lyokukwama kevega lyokupongoka lyonokilometa murongo nambali noharufa monaure, monompatji nokilometa mbali noharufa tava li lipakere, alyo lyositata sokutunga nkara‐Muisraeli.
Evega lyahompa
7Kugusa ko hena evega limwe lyahompa. Kutundilira komururani gokoUtokero gwEvega lyoKupongoka tali vyuka Utokero dogoro kEfuta lyoPokatji; ano komururani gosirongo. Monaure walyo tali huru pevega lyezimo limwe aga va paapa mazimo gaIsraeli. 8Evega eli yilyo nye ngali hamena kwahompa mosirongo saIsraeli, asi nga dire hena kuhepeka vantu, nye ta sigi sirongo sokuhupa ko, si hamene komazimo gaIsraeli.
Noveta dahompa
9 Hompa Mupangeli ta tanta asi: “Nare mwa gusa kuzona, one vapangeli vaIsraeli! Zumbeni ukorokotji nehepeko lyeni. Omu rugane eyi ya hungama yousili. Nokanunu si hena ngomu tjide vantu vange mosirongo. Ame Hompa Mupangeli, nyame nina kuyimutantera eyi.
10“Nkenye ogu a ruganese noheteko domosili:
11“Heteko zoefa zeyi yoyikukutu zi hetakane noheteko zobata zeyi yomema. Heteko zohomere yilyo edi lyanayinye yivali. Noheteko yimo nye mwado ngesi:
Homere 1 = noefa 10 = nobata 10
12“Yiviha yoge yi kare ngesi:
Nogera 20 = sekeli 1
Nosekeli 60 = mina 1
13-15Ano nonzambo doge di kare ngesi:
Rukokotwa: 1/60 somomuzangu goge
Yilya: 1/60 somomuzangu goge
Magadi gononzwe: 1/100 semepya lyoge lyoyitji
(Yihetekeso noheteko zobata: nobata 10 = homera 1 ndi kora 1.)
Nonzwi: nzwi zimwe zomononzwi 200
“To zamba nonzambo dokuswakerera doyilya noyinamwenyo neyi yononzambo dombili asi nonzo doge ngava di dongonone po. Ame Hompa Mupangeli nyame na kuyitanta.
16“Vantu navenye womosirongo va hepa kutwara nonzambo edi komupangeli gwaIsraeli. 17Esi yiso sirugana sokugava yimuna va yi swakerere po nu, nonzambo doyilya nedi dovhinyu, morwa mbunga nazinye zaIsraeli poyipito yokwedi kokupe nomomazuva goMasabata noyipito yapeke. Age a gave nonzambo dononzo nedi donombuto nedi dokuswakererera nuunu nedi dombili dokugusisa po nonzo dombunga zaIsraeli.”
Yipito
(Ex 12:1-20; Lev 23:33-43)
18 Hompa Mupangeli ta tanta asi: “Ano mezuva lyomuhowo lyokwedi komuhowo, zambeni nzambo zontwedu ezi za dira kunyata, mu kuhure ntembeli. 19Mupristeli a guse honde zonzambo ezi zononzo, makura a zi gwaveke koyikuravero yontembeli, komakovhu gane gosizambero nokonongundi domavero gorugumbo romonda. 20Ano mezuva lyautano‐nauvali lyokwedi to rugana hena ngorooro pevega lyankenye ogu a zono ga hana kuyidivira ndi ga hana si mowina. Pankedi zangesi ngo ninka nye ntembeli zi kare zina pongoka.
21“Mezuva lyomurongo‐nane lyokwedi komuhowo, vareka nye kudana sipito soPaska. Nkenye ogu a lye mboroto ezi va dira kurugana noyihaheso, mazuva gatano‐nagavali. 22Mezuva lyomuhowo lyosipito ogu ana kupangera ga hepa kuzamba ntwedu zi kare nzambo zononzo dendi nedi dombunga nazinye. 23Nkenye mezuva lyautano‐nauvali lyosipito, a zambere Hompa nzambo zonontwedu ntano‐nambali noyikungwe yitano‐nayivali eyi ya dira kunyata, a yi swakerere po nuunu. Age hena a zambe nzambo zosikombo sosigara nkenye ezuva, zi kare nzambo zononzo. 24Nkenye ntwedu ndi sikungwe esi vana kuzamba nzambo, kugwederera ko rukokotwa ronolita ntano‐nambali noharufa nonolita ntatu domagadi gononzwe.
25“Pevareko lyezuva lyomurongo nantano lyokwedi kwautano‐nauvali kosipito soyikorogo, hompa a zambe nkenye ezuva lyautano‐nauvali nzambo zokufana zononzo, nononzambo dokufana dokuswakerera po nuunu nedi donombuto nedi domagadi gononzwe.”
Currently Selected:
HESEKIYELI 45: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
