HESEKIYELI 44
44
Eruganeso lyerungavero lyoUpumezuva
1Mugara kwa twere nge kerungavero lyoponze korwaUpumezuva wevega lyontembeli. Erungavero kwa li patere, 2makura Hompa ta tantere nge asi: “Erungavero eli yimo ngava li pata ngorooro, kapi ngava li zegurura nampili kanunu. Kutupu muntu gokupulisira asi a li ruganese, morwa ame Hompa, Karunga gwaIsraeli, nyame na hwililire mo. Yimo ngava li pata ngorooro. 3Ano kombinga zomupangeli, kuvhura a ze ko a ka lye nondya dokupongoka komeho zange. Kuhwilira ta pwagere zerungavero ezi za genda monzugo zonene kouhura womonda.”
Noveta depulisiro lyokontembeli
4Ogo mugara makura ta gusa nge a pitise nge merungavero lyokoMuzogo komeho zontembeli. Eyi na tara ko, tani mono ntembeli zaHompa zina zura uzera wokuvaima wekaropo lyaHompa. Tani liganda ni twe sipara pevhu, 5makura Hompa ta tantere nge asi: “Munwamuntu, pakera mbili nayinye eyi ono kumona neyi no zuhva. Ame tani ku tantere noveta nonompangera dontembeli. Yi kwata nawa‐mawa asi vantuke ava va pulisira kuhwilira nokupwaga montembeli nava va hana asi yiwo.
6“Tantera mbunga zaIsraeli zouhezuvhu asi, ame Hompa Mupangeli kapi ngani tarerera hena yininke yoyihuna eyi ava rugana. 7Awo kwa nyateka ntembeli zange pokutarerera vanayirongo ava va dira kurugana yovamba, vantu ava ava dili kulimburukwa nge, va hwilire montembeli apa ava zambere nge nonzambo domagadi nedi dohonde. Ano vantu vange va teza po egwanekero mokurugana yininke nayinye yoyihuna. 8Kapi ngava panga kombinga zonompo dokupongoka montembeli zange, nye awo kwa tura vanayirongo moupangi.
9“Ame Hompa Mupangeli kuna kuyizeresa asi, kutupu munayirongo ogu va dira kurugana yovamba, ndi a kare ogu a dili kulimburukwa nge, nga hwilira montembeli zange, nomunayirongo ogu ga kara mombunga zaIsraeli nage si.”
Varevhi tava va gusa mo moupristeli
10 Hompa ta tantere nge asi: “Ame tani futisa Varevhi noVaisraeli vakwaawo ava va zumba nge va kerere vakarunga woyimpempa. 11Awo kuvhura va kare moupangi womarungavero nomokurugana yirugana yontembeli. Kuvhura va dipage yimuna eyi vana kureta vantu yonzambo zeswakerero neyi yononzambo, va kare moyirugana yokuruganena vantu. 12Nye morwa yiwo ava pitisire Vaisraeli moukereli wovakarunga woyimpempa, va twaredese vantu monzo, yipo nina kuganena ame Hompa nawa‐nawa asi yiwo kuvafutisa. 13Kapi ngava ruganena nge hena ngovapristeli ndi asi va hede pepi nankenye esi va pongwera nge ndi asi va hwilire mEvega lyoKupongokerera. Eli yilyo efutiso lyoyininke yoyihuna eyi va rugana. 14Tani va tura moyirugana yosiukareli eyi ava rugana montembeli.”
Vapristeli
15 Hompa Mupangeli ta tanta asi: “Vapristeli ava va hamena kezimo lyaRevhi va tundilira mwaSadoko, yiwo va twikira kukerera nge nawa‐nawa, nye Vaisraeli vamwe va tunda ko kwange. Ano owo yiwo wokukerera nge va wize komeho zange va zambere nge nonzambo domagadi nohonde. 16Velike yiwo wokuhwilira mo montembeli zange, va rugane kosizambero sange oku tava pitisire ukereli womontembeli. 17Nsene tava vyuka zerungavero lyorugumbo romonda rontembeli, va dware yikoverero yolina. Va ha dwara yikoverero yonohuki, awo moyirugana yomorugumbo romonda ndi montembeli. 18Mokuninkira asi va dire kutjimpuka, va dware yinsumbere yolina nonomburukweva dolina, nye kapisi nomaliva. 19Awo simpe kapi vana pwaga morugumbo roponze omu ava kara vantu, tava hutura tanko yikoverero eyi kava dwara moyirugana yontembeli va yi sige mononzugo dokupongoka. Va dware yikoverero yapeke mokuninkira asi yikoverero yawo yokupongoka ya ha retera vantu udigu.
20“Vapristeli nokulimbarumuna si nomutwe ndi asi va sigilire nohuki dawo di repe. Va hepa kudininka di kare moure wa heteka. 21Vapristeli nokuhova si kunwa vhinyu awo va hana kuza simpe morugumbo romonda. 22Mupristeli hena nokukwara si mukadi ogu va zumba; a kware ntani Muisraeli gomukadona ndi mukadi ogu ga fisa yendi gomupristeli.
23“Vapristeli ava ronge mbunga zange malisigo pokatji keyi ya pongoka neyi ya dira kupongoka, nopokatji keyi ya kuhuka pampo neyi ya dira kukuhuka pampo. 24Nsene pa horoka nompata dopasinaVeta, vapristeli va tokore yuma oyo mokuliza nonoveta dange. Ava sikise mo yipito yopaukereli mokuliza nonoveta nonompangera dange, ano Masabata nago ava ga pongore ngorooro.
25“Mupristeli kapi a nyata pampo pokuguma simpu, ogo muntu ana fu ntudi oguhwe ndi ozina ndi munwendi ndi mukurwendi ndi mumbyendi gomugara ndi mpanzendi ogu ga dira kukwara, ntani a nyata. 26Apa nye nga kuhuka hena, a ndindire mazuva gatano‐nagavali 27ntani nye ana kuza morugumbo romonda rontembeli a zambe nzambo zekuhuro lyendi, asi a vhure kurugana hena montembeli. Ame Hompa Mupangeli, nyame na yi uyunga.
28“Upristeli sigwana sovapristeli mweyi na gava koVaisraeli asi, ava si litambaike mapupi nomapupi. Awo nokuweka si emona moIsraeli; ame ko nyame va hepa po makura. 29Nonzambo donombuto nedi dononzo nedi detengwidokuwoko, ngadi kara nondya dovapristeli, ano awo yiwo wokutambura nkenye aka moIsraeli, aka va tulira nge ntere. 30Vapristeli yiwo wokugwana yoyiwa po yomuhoverera yomuzangu nanayinye eyi ava zambere nge. Sinene vantu tava dosa nomboroto, vapristeli va va pe munhwi gopomuhowo ngozambo, makura etungiko lyange tali kara momambo gawo. 31Vapristeli nokulya si sidira ndi sikorama esi sina lifire sene ndi sesi sina dipaga sikwawo.”
Currently Selected:
HESEKIYELI 44: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
