HESEKIYELI 43

Hompa ta tengura kontembeli

1Ogo mugara kwa twere nge kerungavero eli lya tarera korwaUpumezuva, 2ano oko tani mono uzera wokuvaima wekaropo lyaKarunga gwaIsraeli una kutundilira koUpumezuva. Ezwi lyaKarunga tali hagara ngwendi epupiro lyomema gefuta, ano evhu tali tema ko uzera wokuvaima. 3Emoneko eli kwa lifana neli na mwene apa ga wizire Karunga a ya hanagure Jerusarema, neli na mwene pomukuro gwaKebara. Makura tani liganda ni twe sipara pevhu. 4Uzera wokuvaima tau piti merungavero lyokoUpumezuva u ze montembeli.

5Mpepo zaKarunga makura tazi zerura nge po zi tware nge morugumbo romonda, omu na ka monenene ntembeli zina zura uyerere waHompa. 6Ogo mugara kwa sikamene pwange, makura ame tani zuvhu ezwi lyaHompa lina kuuyungisa nge montembeli asi: 7“Munwamuntu, esi yiso sipundi sange souhompa. Ame ngani kara omu pokatji kombunga zaIsraeli, ngani va pangere dogoro narunye. Nombunga si zaIsraeli nohompa vawo si kapi ngava swawisa hena edina lyange lyokupongoka pokutongamena vakarunga peke ndi pokuvhumbika yimpu yohompa vawo mevega eli. 8Ohompa kwa tunga yokonhi zomavero noyikuravero, yombara zawo yi livyuke neyi yokonhi zomavero noyikuravero yontembeli zange, makura pokatji ketu nawo ekuma lyelike lya pitire po. Awo kwa swawisa edina lyange lyokupongoka moyininke nayinye yoyihuna eyi va rugana, makura mehandu lyange yipo na va hanagwire po. 9Ano ntaantani va hageke kutongamena vakarunga peke, ano yimpu yohompa vawo va yi guse mo. Nsene va yi rugana, ngano ngani kara pokatji kawo dogoro narunye.”

10 Hompa ta twikire ko asi: “Munwamuntu, tantera Vaisraeli yokuhamena ntembeli, o va ninke va lironge efano lyazo. Va ninka va fe nomuga koyirugana yawo yoyidona. 11Ano nsene vana fu nomuga kweyi va rugana, to va fatwilire nye efano lyontembeli: efano lyazo nomavero gokuhwililira naga gokupwagera, rupe rwazo nepompeko lyoyininke nayinye nonoveta nonompangera dazo nadinye. Yi va tjangera nayinye eyi va mone asi ngapi omu va yi pompeka nayinye, va sikise mo noveta nadinye. 12Veta zontembeli zezi: Evega nalinye eli lya zi kundurukida pondungu zondundu, kwa pongoka.”

Sizambero

13Yihetekeso eyi va hetekesere sizambero ngwendi yihetekeso eyi va hetekesere ntembeli. Kukundurukida etako lyosizambero kwa kere ko ruwombora ronosentimeta nomurongo ntano mosinko, monompatji hena nosentimeta nomurongo ntano, kumwe noukorekeso wokombinga zoponze wonosentimeta nomurongo mbali nantano momusika. 14Ruha rokonhiinhi rosizambero, rokontunda zetako, meta zimwe momusika. Ruha rokukwama ko kwa ru tulire oru rokonhi u kunduruke nosentimeta nomurongo ntano, ru ru pite konombinga nadinye, ano musika gwaro nometa mbali. Rokukwama ko naro kwa nenepere nosentimeta nomurongo ntano konombinga nadinye. 15Ruha oru rwa hura ko, pokuswakererera nonzambo, naro musika gwaro nometa mbali. Makovhu gane kwa pwaga mo ga pitakane nohuro nonkwawo. 16Huro zosizambero kwa kere sikwambando, nometa ntano‐nazimwe kwankenye mbinga. 17Ruha ropokatji naro rosikwambando. Kwankenye mbinga nometa ntano‐nambali, kumwe noukorekeso wokontunda wonosentimeta nomurongo mbali nantano momusika. (Ruwombora kwa kere ronosentimeta nomurongo ntano monompatji). Yirondero yokuza kosizambero kwa hamenene koUpumezuva wosizambero.

Epongoro lyosizambero

18 Hompa Mupangeli kwa tanterere nge asi: “Munwamuntu, purakena eyi nina kukutantera. Sizambero nsene tava si tungu, ove to si pongora pokuswakererera po nonzambo nopokusampera ko honde zoyimuna eyi vana kuzamba. 19Vapristeli ava va hamena kezimo lyaRevhi worudi rwaSadoko, yiwo velike wokuza komeho zange va kerere nge. Ame Hompa Mupangeli nyame nina kuyipanga eyi. Ngo va pe ntwedugona, ngava zambe nzambo zononzo. 20To gusa ko honde zimwe to zi kwita komakovhu aga ga pwaga mo gosizambero, nokomakovhu goruha ropokatji gosizambero nokonohuro daso nadinye. Monkedi ezi ngo kuhura nye sizambero to si pongora. 21To gusa ntwedu ezi vana zamba nzambo zononzo, makura to zi swakererere pevega eli va panga ponze zevega lyontembeli. 22Eyi kuna kusa, to gusa sikombo sosigara esi sa hana sipo, makura to si zamba nzambo zononzo. Kuhura sizambero nohonde zaso moomu tupu ko yi rugene po ntwedu. 23Nsene ono yi mana eyi, to gusa ntwedugona nekungwegona, nayinye ya hana sipo, 24makura to yi retere nge. Vapristeli tava kuwu ko mungwa va yi swakererere nge nzambo. 25Mazuva gatano‐nagavali nkenye ezuva nyove kuzamba sikombo nontwedu nekungwe yononzambo dononzo. Nayinye yi kare ya hana sipo. 26Mazuva gatano‐nagavali gokupongora vapristeli sizambero va si wapaikire eruganeso. 27Sivike nsene sina ka pita, vapristeli makura tava tameke nye kuzambera posizambero nonzambo deswakerero nedi dombili dombunga. Makura ntani ngani mu hafera namuvenye. Ame Hompa Mupangeli, nyame na yi uyunga.”

Currently Selected:

HESEKIYELI 43: KWN

Highlight

Compare

Copy