HESEKIYELI 42
42
Nonzugo mbali popepi nontembeli
1Mugara makura ta gusa nge po ta twara nge korugumbo roponze, ta vyukisa nge konzugo zokorwaMuzogo‐zogo gontembeli. Kapi rwa linapa nonzugo ezi za hura ko korwaUtokero wontembeli. 2Nzugo ezi kwa hulire monaure nometa nomurongo ntano, ano monompatji nometa nomurongo mbali nantano. 3Kombinga zimwe kwa vyukire kevega lyonometa murongo monompatji eli lya kurangedere kontembeli. Ano kombinga nkwawo, kwa vyukire korupanda rorugumbo roponze. Nonzugo edi kwa di tungilire pomarugorongwa gopatatu. Nkenye oru kwa lirondere ru nunupe koru rokonhi zaro. 4Koyiha yoMuzogo‐zogo gonzugo kwa kere ko mukara ogu gwa hulire ponometa ntano monompatji nomonaure nometa nomurongo ntano kumwe nomavero gombinga ozo. 5Nonzugo doporugorongwa rwepeguru kwa kere nonunu di pite pwedi dopokatji nedi depevhu, yeeyi ado kwa di tungilire koure nakauke. 6Nonzugo domarugorongwa nagenye gatatu kapi da di kwatere nongundi ngwendi matungo gapeke aga ga kere morugumbo. 7-8Porugorongwa rwepevhu, ekuma lyoponze zetungo kwa li tungire ekuma‐kuma nometa nomurongo mbali nantano, ano harufa zounaure walyo. Ano nometa nomurongo mbali nantano edi da hupire ko kwa kere mo nonzugo. Ano korugorongwa rwekeguru etungo nalinye kwa gwanekere nonzugo. 9-10Konhi zononzugo edi mbali korwaUpumezuva wetungo oku lya varekerere ekuma, kwa kere ko evega lyokupita, o vyuke morugumbo roponze.
KorwaMbindakano zontembeli kwa kere ko etungo lyokulifana. Alyo kapi lya linapere netungo lyokorwaUtokero wontembeli. 11Komeho zononzugo kwa kere ko mukara ogu gwa fene ngwendi gogu gwa kere kombinga zoMuzogo?-?zogo. Ako kwa kere noheteko zokulifana nomutungo gumwe tupu nomavero hena gokulifana. 12Ako kwa kere ko evero konhi zononzugo edi da hamenene korwaMbindakano zetungo korwaUtokero oku lya varekerere ekuma.
13Mugara ta tantere nge asi: “Nonzugo nadinye edi mbali kwa pongoka. Vapristeli kuhwilira mo kosipara saHompa, tava li nonzambo dokupongoka. Vapristeli kutura mo nonzambo dokupongoka, yeeyi asi nonzugo kwa pongoka: Nonzambo donombuto nedi deswakerero morwanonzo nononzambo domalivererero. 14Ano vapristeli ava vana kara montembeli nsene vana hara kupwaga va ze morugumbo roponze, awo kuhepa kusiga mononzugo edi yikoverero yokupongoka eyi kava dwara apa kava kara moukereli waHompa. Awo kuhepa kudwara yikoverero yapeke, awo simpe kapi vana pwaga va ze oku zina pongo mbunga.”
Noheteko devega lyontembeli
15Mugara eyi ana mana kuheteka evega lyomonda zorugumbo rontembeli, makura ta gusa nge, tatu pwagere mevero lyokorwaUpumezuva, ta heteke evega lyoponze. 16Age kwa gusire mpango zokuhetekesa, makura ta heteke mbinga zokoUpumezuva. Azo kwa hulire ponometa mafere gavali nonomurongo ntano. 17-19Age kwa hetekere korwaMuzogo‐zogo nokorwaMbindakano nokorwaUtokero; nkenye ruha kwa hulire porukwawo monaure, nometa mafere gavali nonomurongo ntano, 20ekuma makura tali siki pnometa mafere gavali nonomurongo ntano komaruha nagenye. Ekuma kwa gawinine yokupongoka kweyi ya dira kupongoka.
Currently Selected:
HESEKIYELI 42: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
