HESEKIYELI 41
41
1Konyima zeyi ta gusa nge, ta twara nge monzugo zopokatjiitji, Evega lyoKupongoka. Age makura ta heteke kankotje aka ka vyuka ko, ta gwana nometa ntatu monaure, 2nometa ntano monompatji nokonombinga nadinye ekuma lyonometa mbali noharufa mompu. Age kwa hetekere hena nzugo zene; monaure wazo kwa gwene nometa nomurongo mbali, ano monompatji dazo nometa murongo.
3Age kwa hwililire hena monzugo zomonda mwi, ta heteke kankotje aka ka vyuka ko: kwa gwene meta monaure nonometa ntatu monompatji nokonombinga nadinye ekuma lyonometa ntatu noharufa mompu. 4Age kwa hetekere hena nzugo zene: Komaruha nagenye gane kwa kere nometa murongo. Age makura ta tantere nge asi: “Eli yilyo Evega lyoKupongokerera.”
Nonzugo edi va tungilire komakuma gontembeli.
5Makura ta heteke mpu zekuma lyomonda lyetungo lyontembeli, makura ta gwana nometa ntatu. Kekuma eli lya kundurukidire ntembeli kwa kere ko tunzugo twa lisikwire tonometa mbali monompatji. 6Nonzugo edi kwa kere momarugorongwa gatatu gokulironda, nonzugo nomurongo ntatu mwankenye rugorongwa. Ekuma lyontembeli lyoponze mwankenye rugorongwa kwa nunupire li pitakane nzugo zepevhu asi nonzugo di vhure kukambama pekuma di dire kuzegama ko. 7Ano makuma gontembeli nsene o ga tarera kontunda, tomu ga mono asi nagenye kwa hetakana mompu dogoro keguru lyago. Kekuma lyokontunda lyontembeli konze zononzugo, kwa tunga ko yirondero yoyinene yivali va vhure kutunda korugorongwa zepevhu va ze korugorongwa ropokatji noru rwekeguru. 8-11Ekuma lyoponze lyononzugo edi kwa hulire ponometa mbali noharufa mompu. KorwaMuzogo‐zogo zontembeli kwa kere evero limwe lyokuhwililira o ze mononzugo. Ano ekwawo kwa hamenene korwaMbindakano. Ame kwa mwene hena rupanda oru rwa hulire ponometa mbali noharufa rwa kundurukida ntembeli nazinye. Aro kwa hulire ponometa ntatu momusika kutunda pevhu o vyuke keguru. Aro hena kwa hetakanene netateko lyononzugo komakuma gontembeli. Pokatji korupanda nononzugo edi ngava ruganesa vapristeli, kwa kere po evega lyomawoko‐woko lyonometa murongo mokulivindakana, alyo kwa likura kontembeli.
Nzugo zokorwaUtokero
12Ano kehagero lyevega lyomawokowoko korwaUtokero wontembeli, kwa kere ko nzugo ezi za hulire monaure nometa nomurongo ne nantano, monompatji nometa nomurongo ntatu nantano. Makuma gazo nagenye nometa mbali noharufa mompu.
Heteko nazinye zetungo lyontembeli
13Mugara ta heteke ponze zontembeli, makura ta gwana nometa nomurongo ntano monaure, ano kutunda konyima zontembeli o vindakane evega lyomawoko‐woko koyiha oku za hura nzugo korwaUtokero napo nometa nomurongo ntano. 14Ure wokuvindakana komeho zontembeli, rambangako evega lyomawoko‐woko konombinga nadinye nako kwa hulire ponometa nomurongo ntano. 15Age kwa hetekere hena unaure wonzugo zokorwaUtokero rambangako nonomukara dazo konombinga nadinye, kwa hulire nako ponometa nomurongo ntano.
Esanseko lyetungo lyontembeli
Uhwililiro wontembeli nEvega lyoKupongoka neli lyoKupongokerera 16kwa vindayikire ko nakunye yipirangi kutunda korugorongwa dogoro komakende. Makende aga kuvhura kugazedira. 17Makuma gomonda zontembeli dogoro papa ga hulire mavero keguru kwa ga kudumikire nuunu 18nonomurunga edi va tjokwerere mo yinamwenyo yomavava apa murunga, apa sinamwenyo dogoro kukundurukida nzugo nazinye. Nkenye sinamwenyo kwa kere noyipara yivali: 19sipara somuntu esi sa pirukilire komurunga kombinga zimwe, nosipara sanyime esi sa pirukilire murunga kombinga zimwe. Kekuma nalinye yimo kwa fene ngoso, 20kutunda porugorongwa dogoro keguru lyomakende. 21Yikuravero yEvega lyoKupongoka kwa kere sikwambando.
Sizambero soyitji
Ano komeho zEvega lyoKupongokerera kwa kere ko sininke sokufana ngwendi 22sizambero soyitji. Musika gwaso kwa hulire pometa zimwe noharufa nomonompatji daso meta zimwe. Etako lyaso nomakovhu gaso nomaruha gaso nagenye kwa yi rugana noyitji. Mugara ta tantere nge asi: “Esi yiso sitafura sina sikama kosipara saHompa.”
Nomuvero
23Kevega lyoKupongoka neli lyoKupongokerera kwa kere ko nomuvero. 24Nomuvero kwa kere mbali dokuzegwilira pokatji, ogu tagu zi oku, mukwawo kokwina. 25Konomuvero dEvega lyoKupongoka kwa tjokwerere ko nomurunga noyinamwenyo yina zanza mavava. Ayo kwa lifene nawa‐nawa neyi yokomakuma. Kouhwililiro kwa kere ko ndunda zo?-?yipirangi. 26Ano monompatji douhwililiro kwa kere mo makende, ano makuma kwa ga limbagwire nonomurunga.
Currently Selected:
HESEKIYELI 41: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
