HESEKIYELI 40
40
EMONEKO LYONTEMBELI ZOKOMEHO
(40:1—48:35)
Hesekiyeli tava mu twara koJerusarema
1Momumvho gonomurongo mbali nantano goupika wetu, pevareko lyomumvho mezuva lyomurongo lyokwedi, momumvho gomurongo naune konyima zokukwata sitata saJerusarema, mezuva tupu lyoolyo ame kwa zuvhire ekaropo lyaHompa, makura ta twara nge. 2Karunga kwa twere nge memoneko kosirongo saIsraeli, ta rondeke nge kondundu zonde. Ame tani mono komeho zange nonzugo dononzi edi da fene ngwendi sitata. 3Age kwa hedesere nge ko, makura tani mono muntu ogu ga paimine ngwendi ngoporo. Age kwa kwatererere sihetekeso solina nesi sompango, ta sikama perungavero.
4Age ta tantere nge asi: “Munwamuntu, tara nawa. Purakena nawa, ove o pakere mbili nkenye aka nina kukulikida, yeeyi yiyo yina ku retesa apa. Ano ove to ka tanta nkenye aka ono kumona kombunga zaIsraeli.”
Erungavero lyokoUpumezuva
5Ame kwa mwene ntembeli ezi lya kundurukidire ekuma. Mugara makura ta gusa sihetekeso sendi sompango soure wonometa ntatu, ta meta ekuma. Ekuma kwa kere nometa ntatu moure nonometa ntatu mounene. 6Age makura ta zi kerungavero eli lya pirukira koUpumezuva. Age ta rondo poyirondero, ano peguru makura ta heteke evero, alyo kwa kere nometa ntatu konhi. 7Ano konhi zalyo kwa kere ko evega eli lya kere nononzugo ntatu dokunomenena kwankenye ruha. Nkenye nzugo kwa hetakanene nometa ntatu kwankenye ruha. Ekuma eli lya kere pokatji kado kwa hulire ponometa mbali noharufa mounene. Ano konhi zononzugo kwa kere hena evega lya kere ure wokuhura ponometa ntatu. Alyo kwa vyukire konzugo zonene ezi za livyukire nontembeli. 8-9Age kwa hetekere nzugo ozo, makura ta gwana nometa ne konhi. Azo kwa kere ehagero lyerungavero eli lya kere pepi nontembeli. Ano keguru lyazo ekuma kwa kere meta zimwe mounene. 10(Nonzugo edi denomeneno, nkenye ruha kwa hetakanene, kwa sikire poheteko zimwe tupu, nomakuma aga ga kere pokatji kado kwa sikire pounene umwe tupu.)
11Eyi ya kweme ko, mugara kwa hetekere upapi wevega lyerungavero. Alyo kwa hulire nalinye ponometa ntano‐nazimwe noharufa. Ano evega lyopokatji komarungavero goporuzera kwa kere nometa ntano. 12Komeho zankenye nzugo zenomeno kwa kere ko ekuma lyesupi lyonosentimeta nomurongo ntano monaure, ano moupapi walyo namo nosentimeta nomurongo ntano (Nonzugo edi kwa hetakanene, kwa kere nometa ntatu.) 13Age kwa hetekere ure wokutunda konyima zekuma lyonzugo ezi za vindakana evega, makura ta gwana nometa murongo nambali noharufa. 14Nzugo ezi za kere kouhura kwa livyuka norugumbo. Age kwa hetekere nzugo ozo, makura ta gwana nometa murongo monompatji. 15Ure werungavero kutunda kekuma lyoponze zerungavero dogoro kombinga zokoure wonzugo za hulilira kwa kere nometa nomurongo mbali nantano. 16Momakuma gononzugo nadinye kwa kere mo nombendende dononunu dokunenepa mokuvyuka kwado monda. Momakuma gomonda kwa tjokwerere nomurunga.
Rugumbo roponze
17Mugara makura ta twara nge a pitisire nge merungavero lya vyuka morugumbo. Kekuma lyoponze kwa tungira ko nonzugo nomurongo ntatu, ano komeho zado kwa kere ko rupanda oru va tunga nomamanya, 18oru rwa twikira ru kundurukide rugumbo. Rugumbo oru roponze kwa lyatama ru pite porugumbo romonda.
19Kevega lyokutuntuka kwa kere ko nako erungavero eli lya vyuka morugumbo romonda. Mugara kwa hetekere ure wopokatji komarungavero gavali, awo kwa hulire ponometa nomurongo ntano ngoso.
Erungavero lyokoMuzogo
20Mugara ta heteke nzira zerungavero lyokoMuzogo ezi za vyuka morugumbo roponze. 21Nonzugo ntatu denomeno edi da kere kwankenye ruha nomakuma aga ga kere pokatji kado nononzugo dononene, nadinye kwa sikire poheteko zimwe tupu ngwendi zokonzira zerungavero lyokorwaUpumezuva. Sivaro nasinye kumwe sonzira zerungavero kwa hulire ponometa nomurongo mbali nantano, ano monompatji nometa murongo nambali noharufa. 22Nzugo zonene nomakende nonomurunga edi va tjwokwerere mo, kwa lifanene noheteko ngwendi zerungavero lyokoUpumezuva. Yilyatero yazo yitano‐nayivali eyi ya vyuka kerungavero nonzugo zonene kwa kere konontere zi vyuke korugumbo. 23Ano kuvindakana rugumbo pokutunda kerungavero yokorwaMuzogo, kwa kere ko erungavero lyapeke eli lya vyuka korugumbo romonda moomu ya kara nawa‐nawa koruha roUpumezuva. Mugara kwa hetekere ure wopokatji komarungavero aga gavali, makura ta gwana nometa nomurongo ntano.
Erungavero lyokorwaMbindakano
24Konyima zeyi mugara ta twara nge korwaMbindakano, oku twa ka mwene erungavero lyapeke. Age eyi ana li heteke, kwa sikire nawa‐nawa pononkwawo. 25Mononzugo derungavero edi kwa kere mo namo makende moomu nonkwawo. Ure werungavero kwa kere nometa nomurongo mbali nantano, monompatji nometa murongo nambali noharufa. 26Ano yirondero eyi ya vyuka ko, yitano‐nayivali ya kere. Ano nzugo zako zonene kwa kere nazo konontere zi vyuke korugumbo. Momakuma gomonda kwa tjokwerere mo nomurunga. 27Nako hena kwa kere ko erungavero eli lya vyuka morugumbo romonda. Mugara kwa hetekere ure wonzira ezi zauvali, makura ta gwana nometa nomurongo ntano.
Rugumbo romonda nerungavero lyokorwaMbindakano
28Mugara ta gusa nge a pitise nge merungavero lyokorwaMbindakano a tware nge korugumbo romonda. Age kwa hetekere nzira zerungavero, makura ta gwana asi azo kwa lifene nezi zerungavero lyekuma lyoponze. 29-30Ano nonzugo denomeneno nonzugo zonene nomakuma gomonda kwa sikire kumwe neyi yomarungavero gapeke. Nonzugo derungavero eli, nado kwa kere nomakende. Ure kwa kere nometa nomurongo mbali nantano nomonompatji nometa murongo nambali noharufa. 31Nzugo zako zonene kwa vyuka korugumbo rwapeke, ano momakuma kwa tjokwera mo nomurunga. Kerungavero eli kwa vyuka ko yirondero yitano‐nayivali.
Rugumbo romonda nerungavero lyokorwaUpumezuva
32Mugara ta gusa nge a pitise nge monzira zerungavero lyokorwaUpumezuva a tware nge korugumbo romonda. Age kwa hetekere ure werungavero, makura ta gwana asi azo kwa hulire pononkwawo. 33Ano nonzugo denomeneno nonzugo zonene nomakuma gomonda kwa sikire kumwe neyi yomarungavero gapeke. Mononzungo derungavero eli kwa kere ko hena makende. Ure werungavero kwa hulire ponometa nomurongo mbali nantano, ano monompatji nometa murongo nambali noharufa. 34Nzugo zonene, kwa vyukire korugumbo roponze, ano momakuma kwa tjokwererere mo nomurunga. Kerungavero eli kwa vyukire ko yirondero yitano‐nayivali.
Rugumbo romonda nerungavero lyokorwaMuzogo
35Mugara kwa gusire nge ta twara nge kerungavero lyokorwaMuzogo. Age kwa li hetekere, makura ta gwana asi alyo kwa hulire pononkwawo. 36Alyo kwa fene makwawo, kwa kere nononzugo denomeneno nekuma lyomonda lyokulimbagura nonzugo zonene ezi za kere nomakende aga ga zi kundurukidire. Ure walyo kwa hulire ponometa nomurongo mbali nantano, ano monompatji nometa murongo nambali noharuta. 37Nzugo zonene kwa vyukire korugumbo roponze, ano momakuma kwa tjokwererere mo nomurunga. Kerungavero eli kwa vyuka ko yirondero yitano‐nayivali.
Matungo gopopepi nerungavero lyokorwaMuzogo‐zogo
38Morugumbo roponze kwa kere sikwatakaneso sa kwatera kumwe evero lyomonda koyiha yoMuzogo‐zogo, esi sa vyukire korugumbo. Amo yimo nye ngava kuhwire yimuna eyi ngava dipagere nonzambo deswakerero. 39Monzugo zonene kwa kere mo yitafura yine. Yitafura eyi yine, kombinga nkenye monzugo kwa kere ko yivali. Poyitafura eyi yipo nye ngava dipagere yimuna yononzambo deswakerero, nsene dokuswakerera nuunu ndi dononzambo dononzo ndi nonzambo dokufuta nonzo. 40Ponze zonzugo kwa kere po yitafura yokufana yikwawo, ano yivali konombinga nadinye mbali derungavero lyokorwaMuzogo. 41Yitafura nayinye kumwe, apa ngava dipagere yimuna yononzambo deswakerero kwa kere yitano‐nayitatu: yine yomonda zonzugo, ano eyi yikwawo yine yoponze morugumbo. 42Yitafura yine yomokanzugogona, ngava wapaikire po nonzambo dokuswakererera nuunu. Yitafura eyi kwa kere yomamanya gokuhonga. Ayo kwa hulire monaure ponosentimeta nomurongo ntano, ano ntunda zayo kwa hulire ponosentimeta nomurongo ntano‐nambali nantano. Yiruganeso nayinye eyi ngava ruganesa yimuna yononzambo deswakerero, ngava yi pungura poyitafura eyi. 43Yinkongo kwa hulire ponosentimeta nomurongo ntano‐nambali nantano, ayo kwa kundurukidire konontere doyitafura. Ano nyama nazinye zononzambo deswakerero yiko nye ngava zi kuraike koyitafura yangoso.
44Age makura ta twara nge morugumbo romonda. Amo kwa kara mo nonzugo mbali domakende, zimwe kwa vyuka korwaMbindakano koyiha yerungavero lyokorwaMuzogo, ano ezi nkwawo kwa vyuka korwaMuzogo koyiha yerungavero lyokorwaMbindakano. 45Mugara makura ta tantere nge asi, nzugo ezi za vuykira korwaMbindakano zovapristeli ava ava zakura montembeli. 46Ano ezi nkwawo za vuykira korwaMuzogo, zovapristeli ava ava zakura kosizambero. Vapristeli navenye wokutunda mezimo lyaSadoko. Awo vemezimo lyaRevhi ava va pulisilire va ze kosipara saHompa va mu ruganene.
Rugumbo romonda netungo lyontembeli
47Mugara kwa hetekere rugumbo romonda, makura ta gwana nometa nomurongo ntano. Ntembeli kwa hamenene korwaUtokero, ano komeho kwa kere ko sizambero. 48Age ta twara nge perungavero lyontembeli; makura ta heteke uhwililiro: awo kwa hulire ponometa mbali noharufa monaure, ntano‐nambali monompatji nompu zekuma meta zimwe noharufa oku noku. 49Yirondero eyi ya vyuka kouhwililiro, monompatji kwa hulire ponometa murongo, ano nometa ntano‐nazimwe kutunda pevhu. Ako kwa kere ko nongundi mbali, nkenye kombinga zouhwililiro ngundi zimwe, za kere ko.
Currently Selected:
HESEKIYELI 40: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
