HESEKIYELI 39
39
Gogo tava mu fundu
1 Hompa Mupangeli kwa tanterere nge asi: “Munwamuntu, pumba kombinga zaGogo, mupangeli gomunene gonomuhoko daMeseki naTubali, o mu tantere asi ame nyame nkore zendi. 2Ame ngani mu pirukidisira kwapeke ni mu guse koure korwaMuzogo, dogoro ta ka sika konondundu daIsraeli. 3Makura ngani toone uta wendi wonkanza u gwe mo mokuwoko kwendi kokorumoho, ano yikutji yendi mokuwoko kwendi kokorulyo. 4Gogo nombunga zendi zovakwayita novahameni vendi ngava gwa tava fire konondundu daIsraeli, ano yimpu yawo ngani yi ninka yi kare nondya doyidira nayinye noyikasama yomowiza. 5Awo ngava gwa tava fire monzira. Ame Hompa Mupangeli, nyame na yi uyunga. 6Ame ngani ka hwameka mundiro mosirongo saMagogo nokonontere nadinye defuta oku va hingira vantu zengu zawo, makura nkenye ogu nga dive asi ame nyame Hompa. 7Ame ngani yi tara nawa asi mbunga zange Israeli ngazi dive edina lyange, hena kapi ngani tarerera asi edina lyange va li swaure hena. Makura nomuhoko ngadi dive asi, ame nyame Hompa, ame Karunga gokupongoka gwaIsraeli.”
8 Hompa Mupangeli ta tanta asi: “Ezuva eli na uyunga pokuwiza lina kerere nawa‐nawa. 9Vantu ava va kara moyitata yaIsraeli ngava pwaga mo, va ka pongaike yirwiso eyi va zumba yi kare yitare yokurada. Ngava rada yilikandwiso nomauta gonkanza noyikutji nomagonga nononkunya, ayo ngayi gwanena nomvhura ntano‐nambali. 10Kapi ngava ka tjava hena yitare mowiza ndi asi va ka komangere yitji momusitu, yeeyi ngava rada yirwiso eyi va zumba. Ngava kwata tava hakana ava va va kwete oku tava va hakana.” Hompa Mupangeli yige ana yi uyunga.
Evhumbiko lyaGogo
11 Hompa ana tanta asi: “Apa ngayi horoka eyi, ame ngani gava kwaGogo evhu lyokuvhumbika moIsraeli, moMuramba goVagendi, korwaUpumezuva wEfuta lyoNomfa. Gogo novakwayita vendi yimo ngava va vhumbika. Ano muramba ngava gu ruka asi: ‘Muramba goVakwayita vaGogo.’ 12Siruwo sokuvhumbika yimpu nayinye ngasi pura Israeli makwedi gatano‐nagavali mokuzereka hena sirongo. 13Nkenye ogu ga kara mosirongo, nga kwafa mokuvhumbika. Awo ngava va fumadekera sirugana esi mezuva lyefundo lyange. Ame Hompa Mupangeli nyame na yi uyunga. 14Makwedi gatano‐nagavali nsene gana piti po, ngava ka horowora nye vagara ava ngava ka genda mosirongo nasinye, morwa kuvhumbika yimpu eyi yina hupu po vana dili kuvhumbika va ka zereke sirongo. 15Apa ngava genda mosirongo, makura tava gwana sisupa, va ture po sidiviso poyiha yaso. Ano vavhumbiki nsene tava wiza va vhure nye kuvhumbika ‘moMuramba goVakwayita vaGogo.’ 16(Ako ngaku kara sitata popepi esi ngava rukira vakwayita). Ano sirongo ngava si zereka hena.”
17 Hompa Mupangeli ta tantere nge asi: “Munwamuntu, zigida yidira nayinye noyikorama yi tunde komaruha nagenye yi ya lye nzambo zokuswakerera ezi nina kuyiwapaikira. Konondundu daIsraeli ngaku ka kara sipito sosinene oku ngayi vhura kulira nyama nokunwa honde. 18Ayo ngayi ka lya marutu govakwayita nokunwa honde zovapangeli wopevhu ava ngava dipaga ngwendi nonzwi donongara noyikombogona noyikombo nonontwedu dokuneta. 19Apa ngani dipaga vantu ava ngwendi nzambo, yidira noyikorama ngayi lya magadi nagenye aga ngava kara nago nokunwa honde dogoro tayi korwere mo. 20Ano kositafura sange ngayi vhura ku ka lya nayinye yononkambe novarondi vado novakwayita novagara wokurwa. Ame Hompa Mupangeli, nyame na yi uyunga.”
Etengwido lyaIsraeli
21 Hompa ta tanta asi: “Ame ngani ka monekesa efumano lyange konomuhoko, tani va likida omu ani ruganesa nonkondo dange mokusikisa mo pauhungani matokoro gange. 22Kutunda opo, Vaisraeli ngava diva nye asi nyame Hompa Karunga gwawo. 23Ano nomuhoko ngadi diva nye asi Israeli kwa mu twarera koupika, morwanonzo edi ga zona kwange. Ame kwa tunda po pwawo, makura yiyo na siga nonkore dawo di va funde di va dipagere moyita. 24Ame kwa va pa eyi va liruganena monyata zawo nomoudinikarunga wawo, yiyo na tunda po pwawo.”
25 Hompa Mupangeli ana tanta asi: “Ano ame ngani fira nkenda maruvharo gaJakopo mbunga zaIsraeli, tani va ragopeke hena. Ame ngani gamena edina lyange lyokupongoka. 26Apa ngava tunga hena mosirongo sawo vana yoworoka, va hana hena ogu ana kuvarugana yoyidona, awo ngava vhura kudivara eswau lyokugombeka nge. 27Ame ngani tengwida mbunga zange ni zi guse koyirongo nayinye eyi da kara nonkore dawo, ni likide nomuhoko dononzi asi ame Mupongoki. 28Ano vantu vange ngava diva asi ame Hompa Karunga gwawo. Awo ngava yi diva eyi, yeeyi asi nyame na va tuma koupika, ano ntaantani kuna kuvapongaika, ni va tengwide kosirongo sawo, kapi ngani hupisa ko nampili gumwe konyima. 29Mbunga zange zaIsraeli ngani zi poomwena mpepo zange ezi ngava dira kugusa po hena pwawo. Ame Hompa Mupangeli nyame na yi uyunga.”
Currently Selected:
HESEKIYELI 39: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
