ESITERA 6
6
Hompa ta fumadeke Moredekayi
1Masiku googo hompa kapi ga ponyokere nampili nakauke. Age kwa ninkire va rete buke zoHistoli zosirongo va ya mu resere mo. 2Ruha oru va resere kwa kere mo nonkango daMoredekayi edi ga bufwire sibofa sokudipaga hompa sibofa esi oBigita naTeresi, marenga gokunomena nonzugo dahompa, yiwo va si katwire. 3Hompa ta pura asi: “Moredekayi ngapi omu twa mu fumadeka nomu twa mu futa mweyi?”
Vakareli vendi tava mu limburura asi: “Nayimwe si va mu ruganena.”
4Hompa ta va pura hena asi: “Yilye gomomarenga gange ogu ana kara mombara?”
Posiruwo oso age Hamani ntani ana kuhwilira morugumbo rombara, a ya pure hompa va mangerere Moredekayi koyitji eyi ya pwire kuwapaika. 5Vakareli vendi tava mu limburura asi: “Hamani gogu ana ku ndindire apa, kuna hara a ku mone.”
Hompa ta va tantere va mu rete mo.
6Ano Hamani eyi ana wiza mo, hompa ta mu tantere asi: “Pana kara gumwe ogu nina hara kufumadeka unene‐nene. Ngapi omu nani rugana muntu gwangoso?”
Hamani ta lipura asi: “Ogu ana hara kufumadeka hompa ntaantani unene, mpamwe yilye? Hawe, nyame tupu.”
7-8Age makura ta tantere hompa asi: “Tumina yikoverero yosiuhompa, va yi retere mugara ogu — yikoverero eyi o dwara nyaamoge. Tumina hena nkata zosiuhompa o ya zi dwareke kakambe koge. 9Ano zigida nye gumwe povanamakuto woge wovanene a ya dwareke mugara ogo nomudwaro odo, a ya mu pitisire, age kuna mu rondeke konkambe, a gende mononzira nadinye. Ninka munekuto ogo a gende oku ta divisa asi: ‘Tareni, hompa omu a futu mugara ogu ana hara kufumadeka!’ ”
10Hompa ta tantere Hamani asi: “Genderera, o ze o ka rete yikoverero nokakambe, o ruganene efumano eli Moredekayi goMujuda. Mu ruganena nayinye eyi ono tanta. No ka mu gwana, kuna hingire pevero lyombara.”
11Hamani ta zi a ka rete yikoverero nokakambe, makura ta dwakere yikoverero oyo Moredekayi. Moredekayi ta rondo pokakambe, makura Hamani ta mu pitisire komeho mositata nasinye oku ta divisa kovantu navenye asi: “Tareni, omu a futu hompa mugara ogu ana hara kufumadeka!”
12Moredekayi ta tengwire kerungavero lyombara, nye Hamani kwa gendererere a ze kembo age kuna kudumike sipara sendi nerengwe lyendi. 13Ta ka tantera mukadendi novakwawo navenye nayinye eyi ya mu horokerere. Ano mukadendi kumwe novakwawo owo wonondunge tava mu tantere asi: “Ove ntaantani ono zumbanesa nye nonkondo doge kwaMoredekayi. Age Mujuda, kapi ngo vhura hena kumufunda. Age yige nga ku funda nawa‐nawa.”
Hamani tava mu dipaga
14Ano hava za mokuuyunga, marenga taga genderere ga ka rete Hamani kosipito somumbanda Esitera.
Currently Selected:
ESITERA 6: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003