ESITERA 5
5
Esitera ta zigida hompa naHamani kosipito
1Mezuva lyautatu lyokulidilika, Esitera ta dwara mudwaro gwendi gosiumhompa, makura ta zi ta ka sikama monda zosinyanga seharango lyombara, ta livyuka nonzugo zahompa. Hompa kwa kere monzugo age kuna hingire posipundi souhompa ana pirukire kerungavero. 2Hompa apa ga mwene asi mumbanda Esitera kuna sikama ponze, makura ta mu fire nkenda, ta mu zerwire mburo zendi zongorodo zosiumhompa. Esitera ta hwilire ta gumu mburo kondungu zazo. 3Hompa ta pura Esitera asi: “Mumbanda, yinke eyi? Tantera nge eyi ono hara ni yi ku pe — nampili harufa zosirongo sange.”
4Esitera ta limburura hompa asi: “Nsene nayi mu wapera hompa, ame kuna hara hompa naHamani mu ya kare vagenda vange ngurova posipito esi nina wapaike.”
5Hompa ta tumine Hamani a genderere ko asi va vhure kukakara vagenda vaEsitera. Ano hompa naHamani, makura tava zi kosipito saEsitera. 6Pokunwa vhinyu, hompa ta pura Esitera asi: “Tantera nge eyi ono hara, makura ame tani yi ku pe. Nkenye eyi no hundira tayi siki mo, nampili o hundire ruha rumwe rosirongo sange.”
7Esitera ta limburura asi: 8“Hompa nsene o kara nonkenda zokusikisa mo ehundiro lyange, ame kuna hara hompa naHamani, ngomu kare mungura vagenda vange posipito simwe esi nina mu wapaikire. Posiruwo oso, ntani nye ngani ya uyunga eyi nina hara.”
Hamani ta liwapaikire kudipaga Moredekayi
9Ano Hamani kwa tundire posipito mompepo zongwa nehafo. Apa ga mwene Moredekayi age kuna sikama perungavero lyombara, kapi ana kankuka ndi asi pa moneke sidiviso sokumufumadeka apa ga pitire po, makura tayi mu handukisa unene. 10Nye age kwa kwatere mutjima, ta ka za kembo. Age makura ta zigida vakwawo kembo lyendi kumwe namukadendi Seresi. 11Age makura ta va likangangere ugawo wendi ou ga wekere nounzi wovana vendi wovagara nomu ga mu tumba hompa, yiyo ga mu ninka a kare munene kupitakana marenga gapeke gahompa. 12Hamani ta twikida ko hena asi: “Kupitakana pweyi, mumbanda Esitera kapi ga ruganena nampili gumwe sipito, nye hompa gelike name. Age ana tu zigida hena ngatu ze ko mungura. 13Nye nayinye eyi kwange neisi, siruwo nina kutara Mujuda ogo Moredekayi kuna hingire pevero lyombara.”
14Ano vakwawo navenye namukadendi tava mu tantere asi: “Morwa sinke ono dili kumudikira sitji sokumuzenzereka soure wonometa nomurongo mbali nambali? Makura mungura ngo hundire hompa nga ku pe Moredekayi ngo mu zenzereke ko, ove ngo ze nye nehafo kosipito?” Hamani kwa pandere unene egazaro lyangoso, makura ta dikisa sitji.
© Egwanekerobibeli Lyanamibia 1987, 2003
© Bible Society of Namibia 1987, 2003