ESITERA 7
7
1Hompa naHamani tava zi va ka lye kumwe naEsitera 2sikando sauvali. Pokunwa vhinyu, hompa ta pura hena Esitera asi: “Mumbanda, yinke eyi ono hara? Tantera nge makura o yi gwane. Nampili harufa zosirongo sange tani zi ku pe.”
3Mumbanda Esitera ta limburura hompa asi: “Nsene yi ku wapera ove hompa o tambure ehundiro lyelinunupiko, eharo lyange lyeli asi ngano ni kare nomwenyo, novantu vange ngano nawo va kare nomwenyo. 4Vantu vange nanyaamwange kwa tu randesa po, ngava tu dipage. Ano ngano si kwa tu randesa po tu kare tupu vapika, ame ngano kapi ono zuvhu nge ndi asi ni ku zogerere ngano morwayo. Nye ose popepi tuna kerere nokutuhanagura po nuunu!”
5Hompa Serekesesi ta pura mumbanda Esitera asi: “Ogu ana kulipepekera kurugana ngoso yilye? Oku ana kara mwene ogo muntu kupi?”
6Esitera ta limburura asi: “Munkore gwetu nomuheti gwetu mugara ogu gomudona ngesi, yige Hamani!”
Hamani ta nwike hompa nomumbanda, age una mu kwata woma. 7Hompa ta handuka unene, makura ta katuka a tunde mo monzugo, a pwage a ze koyikunino yombara. Hamani ga yi dimbwilire asi, hompa ana tokwerere mosininke esi, makura ta hupu mo monzugo a likwambere komumbanda Esitera, morwakuparura mwenyo gwendi. 8Age kwa liganderere pouro womumbanda a likwambere nkenda. Apa ga tengwilire hompa monzugo a tunde koyikunino a mone eyi makura ta pura asi: “Ogu mugara, kuna hara kurarera nge mumbanda kononkondo paapa ame kuna kutara mombara zaamwange ndi?”
Ano hompa tupu ga uyunga edi, vakareli tava kudumike mutwe gwaHamani. 9Ano gumwe gwawo gedina Harabona ta tanta asi: “Hamani kwa dika sitji ponzugo zendi asi va zenzereke ko ngano Moredekayi ogu ga parura mwenyo goge, ove hompa. Ure woyitji, nometa nomurongo mbali nambali!”
Hompa ta panga asi: “Zenzerekeni ko Hamani!”
10Hamani makura tava mu zenzereke koyitji eyi ga dikilire Moredekayi. Ehandu lyahompa ntani nye lina kulitura.
© Egwanekerobibeli Lyanamibia 1987, 2003
© Bible Society of Namibia 1987, 2003