ESITERA 4
4
Moredekayi ta pura ekwafo kwaEsitera
1Ano Moredekayi apa ga zuvhire nayinye eyi va rugene, makura ta taura yikoverero yendi morwaehandu. Age kwa dwarere nonsako, ta gwaveke mutwe gwendi enoto, makura ta zi a gende mositata, age kuna kulira unene‐nene, 2dogoro ta ka sika perungavero lyombara. Age kapi ga hwililire mo, yeeyi asi gokudwara nonsako, kutupu ko epulisiro lyokuza monda. 3Moyirongo nayinye apa lya sikire mo ediviso lyahompa, kwa kere mo nonkali dononene mokatji koVajuda. Awo kwa lidilikire, tava lili nokukuga, ano sinzi sawo tava dwara nonsako, makura tava rara menoto.
4Vakadona vaEsitera nomarenga apa va tanterere Esitera eyi ana kurugana Moredekayi, makura ta zuvhu yoyidona unene. Age kwa tuminine Moredekayi yikoverero a ka dware mevango lyokudwara nonsako, nye age kapi ga yi tambwire. 5Esitera makura ta zigida Hataka, gumwe govanomeni wombara ogu ga mu pere hompa a kare mukareli gwendi. Age kwa mu tumine a ze kwaMoredekayi a ka tare eyi yina mu gwana nokukoneka asi morwa sinke. 6Hataka ta zi kwaMoredekayi monzira zositata perungavero lyombara. 7Moredekayi makura ta mu sansekere nkenye eyi ya mu horokerere nounzi woyimaliva eyi ga tumbwidira Hamani a yi ture mougawo wombara asi ngava dipage Vajuda navenye. 8Age ta gava mbapira zimwe zediviso ezi va gaverere moSusa zina kuuyunga edipago lyoVajuda, kwaHataka. Moredekayi ta mu tantere a ka yi sansekere Esitera nokumufatwilira omu yina fana age a ka ze a ka likwambere kwahompa nokumulihenga a fire nkenda mbunga zovantu vendi. 9Hataka ta rugana moomu va mu tanterere. 10Esitera ta gava mbudi ezi kwaHataka, a zi tware hena kwaMoredekayi asi: 11“Ano nkenye muntu, a kare mugara ndi mukadi ogu ta zi kosinyanga sahompa somonda, makura a dimburure asi kapi vana mu zigida, muntu gwangoso, yige kufa. Ezi yizo veta. Nkenye ogu kutunda kovagavindunge vahompa dogoro kovantu vendi womosirongo va zi diva. Nzira zimwe tupu po zokuvhura kuparuka koveta ezi nsene asi hompa ana zerwire mburo zendi zongorodo komuntu. Mwenyo gomuntu gwangoso, tagu paruka nye. Nye ntaantani kwedi kuna piti po, hompa ga hana kuzigida nge kwendi.”
12Ano Moredekayi apa ga gwene mbudi zokutunda kwaEsitera, 13makura ta tumine Esitera erondoro eli asi: “Wa ha gazara asi, ove kuna yoworoka nye o pitakane Vajuda vapeke, morwakukara koge mombara. 14Ano ove nsene to mwena teete posiruwo sokufana ngesi, ekwafo lyoVajuda ngali tunda meguru lyokuvaparura, nye ove ngo fa nepata lyoguho ngali haga po. Nye yilye ogu ana yi diva eyi — mpamwe ove kwa ku tulira mumbanda, morwa siruwo sokufana ngesi?”
15Esitera kwa tumine eraka eli kwa Moredekayi asi: 16“Zende koSusa o ka pongaike Vajuda navenye, lidilikeni one mu kandererere nge. Mwa ha lya yuma mazuva gatatu. Ame novakareli vange wovakadona nose yimo ngatu rugana ngorooro ngoso. Konyima zeyi, makura ame ngani za kwahompa, nampili ngomu za dira kuyipulisira veta. Ano nsene ame tani ka fa, morwakuyirugana eyi, ni ka fe tupu.”
17Moredekayi ta tundu po a ze, makura ta ka rugana, moomu ga mu tanterere Esitera.
© Egwanekerobibeli Lyanamibia 1987, 2003
© Bible Society of Namibia 1987, 2003