ESITERA 3
3
Hamani ta katura sibofa sokuhanagura po Vajuda
1Ano konyima zeyi hompa Serekesesi, makura ta tumbu mugara gedina Hamani a kare minisiteli gomukurona. Hamani, munwaHamedata ga kere, gemezimo lyaAgage. 2Hompa ta gava mpangera kovakareli vendi navenye ava va kara moyirugana yendi asi va fumadeke Hamani va mu twire nongoro oku tava mu linyongamene. Navenye tava mu kwama makura tava yi rugana, Moredekayi gelike yige ga nyokere kuyisikisa mo. 3Vakareli vamwe woyirugana yomombara tava mu pura asi, yinke ga nyokerere kusikisa mo mpangera zahompa. 4Nkenye ezuva ngava mu ninki asi ngano a pure tupu, nye kapi ga va purakenene. Age ta va tantere asi: “Ame Mujuda, yipo nye asi ame nokuvhura si kulinyongamena kwaHamani.” Awo makura tava yi sansekere Hamani, va tare nsene na sigilira ukaro waMoredekayi. 5Hamani kwa yi handukire unene apa ga dimbwilire asi Moredekayi kapi a mu twire nongoro nokumulinyongamena. 6Apa ga dimbwilire asi Moredekayi Mujuda ga kere, makura ta tokora kudivyuka Moredekayi gelike. Age kwa paparere mpito zokudipaga Vajuda navenye womosirongo sendi.
7Momumvho gomurongo nauvali gepangero lyahompa Serekesesi, kwedi komuhowo, kuninka asi kwedi kwaNisani, Hamani ta gava mpangera asi pa kare fungu‐fungu (ezi ava tumbura asi “purim”), zokugwana ezuva lyokuzira mo, yimo hena kwedi yipo a sikise mo ehandu lyendi. Ezuva lyomurongo nagatatu lyokwedi komurongo nauvali kwaAdara yiko kwa tokokwere.
8Hamani ta tantere hompa asi: “Mwankenye sigaununorongo soge, kugwana mo muhoko gongandi ogu guna lihanene sirongo soge nasinye. Awo kudameka nompo edi da dira kufana dovakwaawo. Nye sosinene po sesi asi, kapi ava sikisa mo noveta dosirongo. Yangesi, kapi ya ku wapera ove hompa, asi o va tarerere. 9Ano ove hompa nsene yina ku wapere, gava mpangera asi, yiwo tupu kuvadipaga. Ano nsene to yi rugana, ame ngani tura mosikesa sombara sisiliveli sokupitakana ponokilogarama 340 000 ngayi kare meruganeso lyosirongo.”
10Hompa ta pweza ko kalinga kendi, aka ngava ruganesa mokukoreka madiviso paveta, makura ta ka gava konkore zoVajuda Hamani zaHamedata gezimo lyaAgage. 11Hompa ta mu tantere asi: “Vantu noyimaliva yawo yoge, yi ruganesa moomu ono yi harere.”
12Ano mezuva lyomurongo nagatatu lyokwedi komuhowo, Hamani makura ta zigida vahamutjanga vahompa va ya faturure ediviso mwankenye eraka eli ava ruganesa mokutjanga mosirongo, makura va tume kovapangeli nokomarenga nokovakareli vahompa. Ediviso eli kwa li tumine medina lyahompa Serekesesi, ako kuna tamba ko kalinga kendi. 13Vaduki kwa twere ediviso eli kwankenye sigaununorongo. Amo kwa kere mo mbudi zezuva limwe eli lyomurongo nagatatu gokwedi kwaAdara asi, Vajuda navenye, a kare mudinkantu ndi gokukurupa, vakondi ndi vanona va va dipage. Awo va va dipage pwa hana nkenda, ano maugawo gawo, va ga va guse. 14Mbudi zediviso zi sike kwankenye sirongo va zi divise kovantu navenye, asi nkenye ogu a vhure kuliwapaikira ezuva olyo, apa ngali sika mo.
15Mbudi tava zi divisa kovantu navenye mositata sepangero Susa pampangera zahompa. Vaduki yiwo va twere mbudi moyirongo. Hompa naHamana kwa hingilire va nwe siruwo esi sa kere sitata saSusa mevhundakano.
© Egwanekerobibeli Lyanamibia 1987, 2003
© Bible Society of Namibia 1987, 2003