ESITERA 2
2
Esitera ta kara mumbanda
1Konyima nampili ngomu lya litulire ehandu lyahompa, nga gazadara ngorooro eyi ga ruganene Vasiti neyi ga mu tokwerere. 2Vagavindunge vamwe vahompa ava ngava mu kara konyonga, tava tanta asi: “Morwasinke ono dilire kupapara o gwane ko vakadona vamwe wovawa? 3Hompa kuvhura o ture po marenga mwankenye sirongo soge, ove o va tantere va pongeke vakadona navenye wovawa mohotepopero zoge ezi zomoSusa, sitata sepangero. Va tura mosinka saHegayi ogu ga kara nosinka sovakadi woge, makura o ninke va va kuhure nawa. 4Ntani nye ono kuhorowora po mukadona gomuwa ogu ono hara, makura ta kara mumbanda mevega lyaVasiti.”
Hompa kwa gazarere asi epukururo lyangoso ewa, makura ta li kwama.
5MoSusa kwa kere mo muJuda, edina lyendi Moredekayi zaJaire. Age gemezimo lyaMbenyameni gemekoro lyaKisi naSimeyi. 6Apa ga twere hompa Nebukadenesara gwaBabironiya, hompa Jehoyakini gwaJuda koupika a mu guse moJerusarema, kumwe nombunga zononkwate, Moredekayi nage yimo ga kere mokatji kawo. 7Age kwa kere namunwahekurwendi Esitera. Ano edina lyendi lyoSihebeli, Hadasa. Age kwa kere mukadona gomuwa gosihanga sosiwa. Vakurona vendi apa va fire, makura Moredekayi ta mu gusa a mu rere ngwendi munwendi gomorutu rwamwene.
8Hompa apa ga divisire ediviso lyendi lyomuhowo, vakadona wovanzi, makura tava va twara koSusa, ano Esitera nage yimo ga kere mokatji kawo. Esitera nage kwa mu tulire mombara a kare mosinka saHegayi ogu nga fire sinka hotepopero. 9Hegayi kwa pandere Esitera ta mu hara unene. Age kapi ga hepekere ruveze mokumuwapaika a wape nokumupa nondya donongwa. Age kwa mu pere evega lyewa mohotepopero, makura ta mu horowere po vakadona vatano‐navavali womombara va mu zakure.
10Ano Esitera kapi ga lihorwere asi age Mujuda, morwa Moredekayi kwa mu tanterere asi ga ha yi horora. 11Nkenye ezuva Moredekayi nga gendi ga za ga tengura komeho zorugumbo ronzugo zovakadi a tare asi ngapi omu ana karere neyi nayi mu horokera asi yinke.
12Erugano lyewapeko lyovakadi eli lya kara po, ngali kara po mvhura zimwe — vakadi ngava va gwaveke nomagadi gomira makwedi gatano‐nakumwe, nomagadi gobalisemu napo hena makwedi gatano‐nakumwe. Konyima zeyi, nkenye mukadona kumutwara nye pamarufo kwahompa Serekesesi. 13Ano nsene ta zi kombara a tunde konzugo zovakadi, age kuvhura nye a dware nkenye eyi ana panda. 14Mukadona ta zi ngurova, makura ngurangura tava mu twara konzugo zovakadi zapeke va mu gave mefirosinka lyaSasigasi ogu nga kara nosinka soyihora yahompa. Age kapi ta zi hena kwahompa, ntudi hompa ana mu hara unene, a mu zigide kedina.
15Siruwo saEsitera sokuza kwahompa makura tasi siki mo: Esitera zaAbihayili munagona gwaMoredekayi. Age Moredekayi ga mu rerere ngwendi munwendi gomukadi gokutunda morutu rwamwene. Esitera nga tetura nkenye ogu nga mu mono. Ano siruwo sendi apa sa sikire, makura ta dwara nawa‐nawa, moomu ga mu tanterere Hegayi, erenga eli lya kere moupangi wonzugo zovakadi. 16Ano Esitera kwa mu twere kwahompa Serekesesi mombara zendi momumvho gwendi gwautano‐nauvali gwepangero lyendi mokwedi komurongo kwaTebete. 17Hompa kwa mu here unene, kupitakana vakadona navenye. Age kwa mu zire unene‐nene komutjima kupitakana vakadona navenye, makura ta mu dwareke nkata zosiuhompa komutwe gwendi, ta mu ninki a kare mumbanda mevega lyaVasiti. 18Hompa ta rugana sipito sosinene, morwakufumadeka Esitera, ta zigida marenga gendi nagenye novakareli vendi kosipito saEsitera. Age kwa gavere mpangera mosirongo si gave yigava kekuto lyahompa.
Moredekayi ta parura hompa
19Apa ngesi age hompa ana tura Moredekayi mourenga. 20Esitera simpe nokuhorora si asi age Mujuda ga kere. Moredekayi kwa mu tanterere asi ga ha yi tantera nampili gumwe. Age kwa limburukwire kweyi va mu tanterere, moomu nga mu limburukwa apa nga mu rere age simpe mukadonagona.
21Siruwo esi ga kere Moredekayi erenga lyombara, Bigitana naTeresi, marenga gamwe gavali gokunomena evero eli lya vyuka kononzugo dahompa, tava handukire Serekesesi, tava papara mpito zokumudipaga. 22Moredekayi eyi ana yi zuvhu eyi, makura ta yi tantere mumbanda Esitera, ogu ga sansekerere ko nage hompa eyi ga dimbwire Moredekayi. 23Ano eyi vana yi konakona, makura tayi moneka asi yosili. Vagara navenye mouvali wawo makura tava ka va sina nonongodi koyitji. Hompa ta gava mpangera asi va yi tjange mobuke zohistoli komeho zendi.
Currently Selected:
ESITERA 2: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003