ESITERA 1
1
Mumbanda Vasiti ta swawisa hompa Serekesesi
1-2Hompa Serekesesi nga pangerere mositata sepangero Susa moPeresiya. Age kwa pangerere yirongo 127, kutunda koIndiya dogoro koSudani.
3Momumvho gwautatu gwepangero lyendi, kwa ninkilire marenga gendi nagenye novakareli vendi sipito, azo mbunga zovakwayita vaPeresiya noVamediya kuna kutara, yimo hena vagara womakuto novapangeli woyirongo. 4Makwedi nagenye gatano‐nakumwe, kwa va likidire ugawo womombara nefumano nalinye nounene walyo.
5Eyi ya pwa, hompa ta ruganene vantu navenye sipito ava va tungire mositata sepangero Susa, nongawo nonohepere pwa hana malisigo. Sipito esi kwa kere ko sivike nasinye. Aso kwa si danenene moyipata yombara. 6Ano eharango kwa li limbagwire nomakehe gosineguru naga gomazera golina ta ga manga nonongodi dopurupuli zene‐zene di ka kwate monolinga dosisiliveli konongundi domamanya gomarumeli. Yipundi yokupwizumukira yongorodo nosisiliveli kwa yi tulire morugumbo oru va zere nomamanya gomazera gomarumeli naga gomageha gokilisitara naga gokuvaima naga gosineguru‐kwiliva. 7Yokunwa kwa yi nwisire nononkinda dongorodo dokudira kulifana, ano hompa kapi ga kere noudumbe mokugava vhinyu zombara. 8Kapi kwa kere esiliko lyongandi lyokuhamena kunwa. Hompa kwa gavere nompangera kovakareli vendi wombara asi nkenye gumwe va mu pe, moomu ana harere.
9Vasiti, mumbanda gwahompa, nage kwa ninkilire vakadi sipito monda zombara.
10Ano mezuva lyautano‐nauvali lyosipito sendi, hompa kwa korwere, makura ta hafa makuruhafa. Age makura ta zigida marenga gatano‐nagavali ava va kere vakareli vendi wokorutu, oMehumani naBisita naHarubona naBigita naAbagata naSetare naKarakasi. 11Age kwa va tanterere va ka rete mumbanda gwahompa Vasiti age kuna dwara nkata zosiuhompa. Mumbanda gwahompa wa wapere unene. Hompa kwa here kulikida marenga novagenda vendi navenye uwa womumbanda. 12Nye vakareli apa va tanterere mumbanda Vasiti eyi ga pangere hompa, makura ta nyoka kuza ko. Hompa kwa mu handukisire unene.
13Nkedi zahompa kwa kere ngesi asi, nga pura vanandunge yokuhamena mapuro gopaveta nompangera. Age makura ta zigida vagavindunge vendi wokuyadiva asi yinke yokuhepa kurugana po. 14Ava nga hepa unene epukururo lyawo vava: Karesena naSetare naAdimata naTaresisi naMeresi naMaresena naMemukani — marenga gatano‐nagavali gaPeresiya naMediya aga ga kere noyirugana yekuto mosirongo. 15Age kwa tanterere vagara ava asi: “Nyame, hompa, na tumu vakareli vange komumbanda Vasiti nompangera, nye age ana nyoka kuzilimburukwa! Veta ngapi omu zina kutanta omu ngano mokumurugana?”
16Ano Memukani makura ta tantere hompa nomarenga gendi asi: “Mumbanda Vasiti kapi ana zono kwahompa kwelike, nye nokomarenga goge hena — rambangako nankenye mugara ogu ga kara mosirongo! 17Nkenye mukadi gomosirongo nga dina mugara gwendi, sinene a zuvha eyi ana tengeneke mumbanda. Awo ngava uyunga asi: ‘Hompa Serekesesi apa ga zigidire mumbanda Vasiti a ze kwendi, amesi ga nyokere!’ 18Ano vakadi womarenga gaPeresiya naMediya, nsene va zuvha nonkedi domumbanda, tava tantere vagara vawo, alyo ezuva simpe kapi lina toko. Ano vakadi navenye nkenye oku kapi ngava fumadeka vagara vawo; makura vagara vawo ngava va handukire. 19Nsene yina ku wapere, hompa, ngano gava mpangera zopasiuhompa asi, Vasiti ga ha horoka hena kosipara soge ove hompa nampili nakauke. Panga va yi tjange monoveta doVaperesiya noVamediya, ntani ngava dira kuzirundurura. Ano evega lyendi lyoumbanda li ze kwagumwe gwapeke ogu a zuvhu. 20Ano mpangera zoge, nsene zi zuvhika mosirongo nasinye, nkenye mukadi nga fumadeka mugara gwendi nawa‐nawa, a kare ngawo ndi hepere.”
21Hompa nomarenga gendi kwa pandere magazaro gaMemukani aga ga retere po. 22Age makura ta tumu eraka koyirongo nayinye eyi ya hamene kwendi meraka lyankenye sirongo monkedi zokutjanga asi, nkenye mugara a kare nturagumbo gembo lyendi, age hena a kare, yige gononkondo po.
Currently Selected:
ESITERA 1: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003