MUUDISI 9
9
1Ame kwa gazara rure hena unene yokuhamena kwanayinye eyi, yiyo na mona asi Karunga kukonakona yirugana yovanongo novahungami, neharo lyawo lyeeli nonyengo zawo zeezi. Nagumwe si ga diva yuma yokuhamena kweyi yina mu kara komeho. 2Patupu malisigo. Sigwana simwe tupu komuhungami nokomudinikarunga, komuwa nokomudona, kwava va hamena koukereli nava va dira kuhamena ko, kwava ava zamba nonzambo nava ava dili kudizamba. Muntu gomuwa kapi ga pitakana munanzo; muntu ogu ga gana mugano kapi ga pitakana ogu ga dira kugana. 3Sigwana simwe asi wiza kwanavenye, ano eyi kwa puka ngwendi nayinye eyi ayi horauka mouzuni ou. Posiruwo soukaro wovantu, magazaro gawo kwa zura udona nougova, kuliharuka tupu nare vana fu. 4Nye nkenye ogu ga kara nomwenyo mokatji kovanamwenyo, ga kara nendindiro; mbwa zonzuni za pitakana nyime gokufa. 5Nhi, vanamwenyo va diva asi ngava fa, nye vafe kutupu eyi va diva. Kutupu hena awo mfeto zokomeho; awo kwa va divara nuunu. 6Eharo lyawo nonyengo zawo nomupampi gwawo, nayinye kufa kumwe nawo. Awo kapi ngava hamena ko hena nampili kanunu kweyi ngayi horauka mouzuni ou.
7Twikira nye — lya nondya doge o hafe; nwa vhinyu zoge o pembure. Nayinye oyo yiwa kwaKarunga. 8Yikoverero yeni yi kare narunye yina zere, ano magadi konomutwe deni ga ha pira ko. 9Hafesa mwenyo goge moukaro kumwe nomukadi ogu wa hara, siruwo esi ono kara moukaro wa hana sikwafa ou ga ku pa Karunga mouzuni ou. Nkenye ezuva lyamo lya hana sikwafa, lihafesa, morwa yiyo yooyo ngo gwana mo moudigu woge naunye. 10O rugane unene paapa wa hulira, yeeyi mosirongo sovafe omu ngo za, mutupu magazaro ndi unongo ndi ediwo.
11Na dimburura hena sininke simwe asi, vaduki wovanene kapi ava fundu nkenye apa elirombero, mapenda kapi aga fundu nkenye apa moyita. Vanongo kapi ava paruka nkenye apa, vanandunge kapi ava kara nkenye apa nongawo, ano vanamakuto kapi ava kara nkenye apa poyipundi yoyinene. Ehudi kuhorokera nkenye ogu. 12Narumwe si o dive asi siruwo soge ruvezeke ngasi sika. Moomu ayi fu mosikando yidira monontenda nonomfi mekwe, nose yimo ngava tu kwata posiruwo simwe sosidona, esi twa dira kugazara.
Magazaro gokuhamena unongo nougova
13Na mona hena sininke simwe, sihonena sosiwa asi unongo ngapi omu ava u tara mouzuni ou. 14Pa kere sitatagona omu mwa kere vantu wovasesu. Hompa gononkondo ta si homona. Ta si umbilikida, makura ta liwapaikire kuteza makuma a pitire po. 15Mwa kere mugara gumwe gomuhepwe ogu nkare a popere sitata oso. Nye nagumwe si ogu ga mu gazarere. 16Ame kutanta nkenye apa asi unongo wa pitakana nonkondo, nye nagumwe si ogu ga gazarere mugara ogo gohepere asi munongo ndi asi a pakere mbili eyi a tanta. 17Kupurakena ove ono mwena nonkango domunongo hasa, kwa pitakana kupurakena ezogerero lyomupanguli posigongi somagova. 18Unongo wa pitakana unene yirwiso yomoyita, nye munanzo gumwe kuvhura a zonagure yininke yoyinzi yoyiwa.
Currently Selected:
MUUDISI 9: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
