MUUDISI 10
10
1Nondi dokufa kuvhura di nukise ekende nalinye lyomurora, ano kaugovagona kuvhura ka zonagure unongo wounene.
2Eyi ya fira munandunge yokurugana youhunga, ano mugova yokurugana yepuko. 3Ugova wendi wene au litanta nokovanayirongo kooku ava ana kugwanekera nawo monzira; age kuninka a mu dive nkenye ogu asi age egova.
4Mupangeli goge nsene ana ku handukire, wa ha tunda mo moyirugana yoge; edidimiko kuvhura li guse po mapuko peke‐peke.
5Na mona uhahungami mouzuni — uhangungami ou ava rugana vapangeli. 6Vantu wovagova kuvatura kounene, ano nongawo tava di tura pousupi. 7Ame kumona nkenye apa vapika kuna rondo kononkambe, ano vanamadina kuna kugenda porupadi ngwendi vapika.
8Nsene o sima ndjombo, ngo gwira mo; nsene o teza ekuma, ezoka ngali ku huma. 9Ogu ana kutaura mamanya, taga mu keke, ano ogu ana kuvanda yitare, tayi mu remeke. 10Nzimbu zoge nsene kuna sumpa, nye o dire kuzirora, ntudi to dameke mokuziruganesa. Yoyiwa po yokuhova kugazara pomuhowo. 11Yokudiva omu ava gusa ezoka uhungu nayimwe si yi ku kwafa, nsene li hova ezoka kuhuma muntu. 12Munongo kufumanena mweyi a uyunga, nye mugova nonkango damwene adi mu hanagura po. 13Age kutameka kuuyunga nononkango dougova, na ka hagesa nononkango dousima wene‐wene. 14Egova sinene tupu tali uyunga tali zi.
Nagumwe si gokudiva eyi ngayi horoka, hena nagumwe si gokuvhura kututantera eyi ngayi horoka konyima zonomfa.
15Gokudira kudiva kuza kembo lyeeli egova lya hura ko, eli ali lirorora lyene noyirugana.
16Sirongo kukara moudigu nsene hompa gwaso munona, ano marenga gaso kukara moyipito masiku mudima. 17Nye sirongo serago seesi sa kara nahompa ogu ga kara nomatokoro gamwene novagendesi ava ava li posiruwo sosiwa, ava ava lipangere vene, kapi ava korwa.
18Mugara nsene a kara mudwa unene a dire kuwapeka ndunda zendi, tazi zoza, makura nzugo tazi gu.
19Yipito kukuhafesa, ano vhinyu kukundjangumuna, nye nsene pa pira yimaliva, kapi o yi gwane oyo.
20Walye o pe hompa usima nampili momagazaro moomu, ndi o pe ngawo usima nampili mokahore‐hore monzugo zokurara. Sidira kuvhura si damune mbudi, si ka va tantere eyi wa uyunga.
Currently Selected:
MUUDISI 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
