MUUDISI 3

Siruwo sanayinye

1Nayinye eyi ayi horoka mouzuni ou, kuhoroka posiruwo esi ga horowora Karunga.

2Age kwa paka po siruwo sehampuruko

nosiruwo sonomfa, siruwo

sokutapeka nosiruwo sokudura,

3Siruwo sokudipaga

nosiruwo sokuverura,

siruwo sokuzungurura

nosiruwo sokutunga.

4Age kwa paka po siruwo seguwo

nosiruwo soruhafo,

siruwo sokulira

nosiruwo sokudana,

5siruwo sokulihara

nosiruwo sokudira kulihara,

siruwo sokulincumita

nosiruwo sokudira kulincumita.

6Age kwa paka po siruwo sokugwana

nosiruwo sokuzumbanesa,

siruwo sokupungura

nosiruwo sokuzuguma,

7siruwo sokutavagura

nosiruwo sokuhonza kumwe,

siruwo sokumwena

nosiruwo sokuuyunga.

8Age kwa paka po siruwo

sokulihara nosiruwo sokulinyenga,

siruwo soyita nosiruwo sompora.

9Yinke atu gwana mo moyirugana yetu nayinye? 10Na diva nomudigo donondigu edi ga tu twika Karunga. 11Age kwa paka po siruwo sosiwa sankenye eyi. Age kwa tu pa eharo lyokudiva yokomeho, nye narumwe si kapi ga tu pa egwaneko lyesikiliromo lyekwategano lyeyi a rugana. 12Makura tani dimburura asi, nayinye eyi natu vhura kurugana kooko kuhafa nokurugana yoyiwa po paapa twa hulira siruwo esi tuna kara nomwenyo. 13Natuvenye twa fira kulya oku tatu nu, tu bodjane eyi twa ruganena.

14Na diva asi nkenye eyi a rugana Karunga ngayi karerera. Nokuvhura si o gwederere ko yuma ndi asi o guse ko yuma. Ano posili simwe esi a rugana Karunga, sokutuninka tu mu tjire. 15Nkenye aka aka horoka ndi kokuvhura kuhoroka, ka horoka nakwanare. Karunga kuninka sininke sooso si horauke.

Uhahungiki mouzuni

16Mokugwederera ko, ame kwa dimburura asi mouzuni kugwana mo udinikarunga omu mwa fira ngano kukara unasili nouhunga. 17Makura tani litantere nyaamwange asi: “Karunga nga pangura vahungami novadona simwe tupu, morwa nkenye kaninke, nkenye karugana ngaka horoka posiruwo sako esi va paka po.” 18Makura tani siki po asi Karunga ta tu heteke, a tu likide asi ose kapi twa livhura noyikorama. 19Kwanayinye, sigwana esi sa ndindira muntu nosikorama simwe tupu. Nayinye kufa simwe tupu. Nayinye yisitwa yimwe tupu. Muntu napamwe si apa va lipitakanena nosikorama, morwa ukaro nayimwe si kwayo. 20Nayinye kuvyuka kevega limwe tupu — mbundu. Nayinye yimo ya tunda, nayinye yimo ngayi tengwira. 21Ngapi nye omu no yi diva nawa‐nawa asi mpepo zomuntu kuza meguru, ano zosikorama kuzamevhu? 22Makura yipo na dimburura asi sosiwa po sokubodjana eyi twa ruganena. Kutupu hena yapeke eyi natu vhura kurugana. Patupu nzira zetu zokudiva eyi ngayi horoka konyima zonomfa detu.

Currently Selected:

MUUDISI 3: KWN

Highlight

Compare

Copy