NDANIYERA 8

Emoneko lyaNdaniyera lyekungwe lyonzwi neli lyosikombo

1Momumvho gwautatu gwaBelisasara, tani mono hena emoneko lyauvali. 2Na liharuka ko tupu, monili mositata somakuma saSusa mosirongo saEramu. Ame kwa sikamene pomukuro gwaUrayi, 3ano mesinya mwina lyomukuro tani mono ekungwe lyonombinga mbali dononde, rumwe po yiro rure unene aro rupe unene korukwawo. 4Tani tara ekungwe omu lina kutwa nombinga dalyo koUtokero nokoMuzogo nokoMbindakano. Kutupu sikorama sokulikandana ndi asi si li tewese. Tali rugana moomu lina hara dogoro tali litumbire mo.

5Ame simpe kuna kutara‐tara ame ni koneke eyi yina kutanta, na liharuka ko, sikombo kuna kutunda koUtokero megenderero. Aso kwa gendererere unene‐nene nomakondo gaso kapi gana gumu pevhu. Sikombo esi kwa kere nomeho pokatji komeho gaso. 6Sikombo tasi hedere ekungwe eli lya sikamene pepi nomukuro. Aso kwa wundumukilire kwalyo nononkondo daso nadinye, 7ame kuna kutara apa sa di sarere ekungwe. Aso kwa handukire unene tasi tezagura nombinga odo mbali. Ekungwe kapi lya kere nononkondo dokulipopera. Alyo kwa lirundumwinine pevhu tava li sambanga, nye kapi kwa kere nampili gumwe ogu ga vhulire kuliparura.

8Sikombo tasi kuru tasi kara nononkondo dononene, nye kondungu zoruvinga rwaso, nonkondo kwa di teza ko. Pevega lyado yiyo pana hokere nombinga ne dononene, nkenye oru taru livyukire noruha rwaro. 9Ano mwankenye ruvinga pwaga gane kwa hokere mo karuvingagona, aka ka lihanenene nonkondo dako korwaMbindakano nokorwaUpumezuva nokosirongo somatumbwidiro. 10Ado kwa kulire tadi kara nononkondo dokurwisisa mbunga zovakwayita vemeguru, nombungururu taka zugumine dimwe pevhu, makura taka di lyatanga. 11Aro kwa linenepekere nomukurona govakwayita vemeguru googu, taru silike nonzambo edi ava mu zambere nkenye ezuva nokunyateka ntembeli. 12Mbunga zina zonene ko mevega lyokugava nonzambo dene‐dene dankenye ezuva, ano eruganenokarunga lyousili nalyo tava li sundura. Ruvinga kwa ragopere mwankenye eyi rwa rugene.

13Makura ame tani zuvhu muengeli gumwe ana kupura mukwawo asi: “Siruwo sokuhura kupi ngayi twikira yininke eyi yina moneka memoneko? Siruwo sokuhura kupi ngadi lisinta nonzo doyihuna nononzambo dankenye ezuva? Siruwo sokuhura kupi ngava lyatanga vakwayita vemeguru nontembeli?”

14Ame tani zuvhu hena muengeli gwapeke ana kulimburura asi: “Aso ngasi twikira mazuva 1 150 apa ngava dira kugava nonzambo dongurova nongurangura. Makura ntembeli ntani nye ngava zi wapukurura.”

Muengeli Ngabiliyera ta faturura emoneko

15Ame kwa kambadarere kukwata egano lyemoneko eyi lina kutanta, apa ga sikamene gumwe mokuliharuka komeho zange. 16Ame kwa zuvhire ezwi lina kuzigida pomukuro gwaUrayi asi: “Ngabiliyera, mu fatwilira eyi ana mono.” 17Ngabiliyera ta wiza, makura ta sikama pwange. Ame kwa tjilire unene, makura tani rwapama pevhu.

Age kwa tanterere nge asi: “Munwamuntu, yi ku faturukire. Emoneko kuna tamba ehagero lyouzuni.” 18Haga za mokuuyungisa nge, tani rwapama pevhu tani pwilire. Nye age ta kwata nge ta yambura nge a sikameke nge, 19makura ta tanta asi: “Ame kuna kukulikida eyi ngayi kwama ko kehandu lyaKarunga. Emoneko kuna kulikida koruveze rwehagero.

20“Ekungwe eli ono mono lina kara nonombinga mbali, kwa kerera po yirongo yaMediya naPeresiya. 21Sikombo kwa kerera po sirongo saGereka, ano nombinga edi da kara pokatji komeho gaso, yige hompa gomuhowo. 22Nombinga ne edi da hokere apa va tezagwire romuhowo, kwa kerera po yirongo yine eyi ngayi kara po momuhoko ogo ogu ngagu dira kukara nononkondo ngwendi sirongo somuhowo.

23“Uhura woyirongo oyo apa ngau heda pepi, awo nawo vana nkundipara va hepa kuvapangera, ngaku kara nye erundomutwe noudona nahompa goyimpempa. 24Age nga kara munankondo — nye kapisi kononkondo damwene. Age nga reta ezonauko lyedona, nga radipa mwankenye eyi nga rugana. Age nga retera vagara wononkondo ezonauko nokombunga zovantu vamwene Karunga. 25Yeeyi age kwa rungurukwa, nga ragopa mononzira dendi doyimpempa. Age nga linenepeka mwene, ta hanagura po vantu wovanzi ga hana kuvarondora. Nahompa gomunene googu nage nga mu nyateka, nye nga hanagura po ga hana kuruganesa nonkondo dopasintu. 26Emoneko lyononzambo dongurova nongurangura edi vana ku fatwilire ngayi kara yousili. Nye eyi yi paka komutjima ntaantani, yeeyi ngapa pita siruwo sosire, ntani ngayi ka sika mo.”

27Ame kwa kere moruhodi rorunene tani vera‐vera mazuva gamwe. Ame makura tani sikama tani zi koyirugana eyi ga pa nge hompa, nye emoneko eli kwa reterere nge udigu, kapi na li kwete egano lyalyo.

Currently Selected:

NDANIYERA 8: KWN

Highlight

Compare

Copy