NDANIYERA 7
7
NDANIYERA TA TJANGA MAMONEKO GENDI
(7:1—12:13)
Emoneko lyaNdaniyera lyoyikasama yine
1Momumvho gomuhowo gwahompa Belisasara gwaBabironiya, ame kwa rotere nzodi, tani mono emoneko momasiku. Tani zi tjanga ozo zondi, ano eyi na tjangere 2yokuhamena eyi na mwene masiku yeyi:
Nompepo dokutunda komaruha nagenye kwa pepere kontunda zefuta. 3Makasama gane taga tundu mefuta, nkenye eli kwa lifanena. 4Lyomuhowo lyokufana nyime, nye kwa kara nomavava ngwendi gekangakodi. Ame kuna kutara, mavava galyo tava ga zupagura ko. Ekasama kwa li zerwire va li sikameke ngwendi muntu. Makura tava li pe nondunge dosiuntu.
5Sikasama sauvali kwa fene ehumbu eli lya ndjakekesere maguru goruha rumwe tupu. Alyo kwa kere nonompatji ntatu pokatji komazego galyo, makura ezwi tali li tantere asi: “Lya ngorooro nyama paapa wa hulira!”
6Ame simpe kuna tara, ekasama limwe tali horoka. Alyo kwa fene ngwe, nye pomugongo gwalyo mavava gane ga kere po, ngwendi mavava gosidira, alyo hena kwa kere nonomutwe ne. Alyo kwa monekere unankondo.
7Ame kuna kutara, ekasama lyaune tali horoka. Alyo lyononkondo, lyokureta mahwilili, lyokutjilisa. Tali papagura marambo galyo nomamuzego galyo gomanene gosivera, makura tali ga myonanga po. Alyo kwa kere nonombinga murongo, kapi lya lifanene noyikasama yikwawo. 8Ame kuna kutarurura odo nombinga, tani mono karuvinga kana kupwagera pokatji kononkwawo. Taka gugura ko nombinga ntatu edi da hovere kukara po. Ruvinga oru kwa kere nomeho gomuntu nokana aka ka uyungire yininke yoyinene.
Emoneko lyagumwe ga kererera po narunye
9Ame kuna kutura, na liharuka yipundi youhompa vana kutura pevega. Gumwe ogu ga kererera po ta hingire posipundi simwe souhompa. Sikoverero sendi sosizera ngwendi mungwa, ano nohuki dendi ngwendi nohuki dononzwi dononzera. Sipundi sendi souhompa esi sa kere komakoso gomundiro, kuna kutwera ko mundiro, 10makura mukonkomoko gomundiro tagu konkomoka mo. Apo kwa kere po mayovhi gomanzi govantu wokumuruganena, ano nomiliyona dovantu kwa sikeme komeho zendi. Mbangwiliro tazi tameke nye, nobuke tava di penuna.
11Ame kuna kutara, nye simpe kuna kuzuvha ruvingagona omu runa kulikanganga oku taru litanga. Hana za kutara, ekasama lyaune tava li dipaga, rutu rwalyo tava ru zugumine momundiro taru hanauka po. 12Makasama makwawo kwa ga gusire nonkondo dago, tava ga pulisire ga kare nomwenyo siruwo esi va panga.
13Memoneko eli masiku, tani mono yuma yokufana ngwendi muntu. Age kwa hederere nge, ago maremo kuna mu kundurukida, ta zi kogu ga kererera po narunye, ta ka kara komeho zendi. 14Makura tava mu pe epangero nefumano nononkondo dosiuhompa, asi vantu wonomuhoko nadinye nomarudi nomaraka nagenye va mu ruganene. Epangero lyendi ngali karerera, ano untungi wendi kapi ngau haga po.
Efwatururo lyomamoneko
15Mamoneko kwa tororokesere nge, taga limbilirwisa nge unene. 16Makura tani zi kwagumwe gwava va sikeme po ni ka mu pure a yi fwatwilire nge nayinye. Makura ta tantere nge eyi yina kutanta. 17Ta tanta asi: “Aga mamukasama gane, yirongo yine eyi ngayi tumba pevhu. 18Ano vantu vaKarunga gekeguru‐guru ngava gwana nonkondo dosiuhompa tava kara nado narunye nanarunye.”
19Ame kwa here kudiva nawa yokuhamena ekasama lyaune, eli lya dilire kulifana nomakwawo — ekasama lyokutjilisa eli lya lipapagwilire marambo galyo nomambwara galyo gongoporo nomazego galyo goyivera, makura li ga myonange. 20Ame kwa here hena kudiva yokuhamena nombinga murongo dokomuntwe gwalyo noruvinga oru rwa hulililire kupwaga mo, ru gande ko nombinga ntatu. Aro kwa kara nomeho nokana kana kuuyunga yomalikangango. Alyo kwa kere lyokutjilisa unene kupitakana makwawo.
21Hana za kutara, oro ruvinga taru rwisa vantu vaKarunga, taru va fundu. 22Makura ogu gokukererera ta wiza ta ya divisa epanguro a hamene kovantu vaKarunga gekeguru‐guru. Siruwo sovantu vaKarunga sokugwana nonkondo douhompa sina siki mo.
23Efwatururo eli ga pere nge lyeli: “Ekasama lyaune yiso sirongo saune esi ngasi kara pevhu, aso kapi ngasi lifana noyirongo nayinye. Aso ngasi tavagura evhu nalinye tasi li lyatagura. 24Nombinga murongo yiwo ohompa ava ngava pangera sirongo. Makura ntani nye ngapa horoka hompa gumwe; age kapi nga lifana nava womuhowo, makura nga zugume ko ohompa vatatu. 25Age nga uyunga yokulilimba naKarunga gekeguru‐guru oku ta hepeke vantu vaKarunga. Age nga hetekera ko kupirura noveta deruganenokarunga noyipito, ano vantu vaKarunga ngava kara konhi zendi nomvhura ntatu noharufa. 26Makura mpanguro zemeguru ntani zina kukara po nye, tazi gusa po nonkondo dendi, makura tava mu hanagura po nuunu. 27Nonkondo nounene nomauntungi nagenye gepevhu makura tava yi pe vantu vaKarunga gemeguru‐guru. Nonkondo dawo dosiuhompa kapi ngadi haga hena, ano vapangeli navenye vepevhu ngava va ruganena, tava va limburukwa.”
28Yuma eyi yipo nye ya hagera opo. Ame kwa tjilire unene, tani kisumukire mo, ano yininke nayinye tani yi pungura momutjima gwange.
Currently Selected:
NDANIYERA 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
