NDANIYERA 9
9
Ndaniyera ta kandererere mbunga zendi
1Daliusi zaSerekesesi goMumede kwa pangerere sirongo saBabironiya. 2Momumvho gomuhowo gwepangero lyendi, ame kwa konakonene nobuke dokupongoka nokugazadara nomvhura nomurongo ntano nambali edi nga kara Jerusarema mapuku, moomu ga yi tanterere Hompa muporofete Jeremiya. 3Ame tani kanderere unene kwaHompa Karunga, tani mu likwambere, tani lidilike nondya ame kuna dwara nonsako nina hingire menoto. 4Ame tani kanderere Hompa Karunga gwange ni tongonone nonzo dombunga zange.
Tani tanta asi:
“Hompa Karunga gomunene, ose kuna kukufumadeka. Ove mulimburukwi kelikwatakano lyoge, yiyo o horwere eharo lyoge lyanarunye ava va ku hara, ava sikisa mo mpangera zoge.
5“Ose kwa zona yiyo tuna kara vantu wovadona, kwa rugana yoyidona. Ose kwa nyoka kurugana eyi o tu tantere, yiyo twa pa nyima eyi ono tu likida yoyiwa. 6Ose kapi twa purakena vakereli woge vaporofete, ava ngava uyunga medina lyoge kohompa vetu nokovapangeli nokozinyakurwetu nokomuhoko gwetu nagunye. 7Ove Hompa narunye kurugana youhunga, nye ose tatu liretere nkenye apa nyamwetu eswau. Esi sina tu zerere natuvenye ose ava twa tunga moJudeya nomoJerusarema nokoVaisraeli navenye ava wa haraganesera moyirongo yopopepi neyi yokoure, asi morwa yeeyi va dira kulimburukwa koge. 8Ohompa vetu novapangeli vetu nozinyakurwetu kwa rugana yifisamuga, yiyo va zona koge ove Hompa. 9Ove mufenkenda nomudongwenenipo, nampili ngomu twa ku vyuka. 10Ose kapi ngatu ku purakene, Hompa Karunga gwetu, apa ngo tu tantere tu kare paVeta zoge ezi wa tu pera movakereli woge vaporofete. 11Vaisraeli navenye va teza noveta doge, yiyo va nyoka kupurakena eyi ngo tanta. Ose kwa zona koge, makura yiyo ono tu retere efingiliro eli va tjanga moVeta zaMosesa, mukereli goge. 12Wa sikisa mo eyi wa uyunga ngo tu ruganena novapangeli vetu. Ove kwa futisa unene Jerusarema kupitakana nkenye sitata esi sa kara apa pevhu, 13yiyo wa tu futisa nankenye ehandu eli va tjanga moVeta zaMosesa. Nye Hompa Karunga gwetu, kapi atu kambadara kukuhafesa mokutengura ko kononzo detu tu kwame usili woge. 14Ove Hompa Karunga gwetu wa liwapaikira nare kutufutisa, yiyo wa yi rugana, yeeyi ove kurugana nkenye apa ya hungama. Nye ose kapi atu yi purakene.
15“Hompa Karunga gwetu ove nyove wa tu likida nonkondo doge pokupwagesa mbunga zoge mosirongo saEgipite, ano nonkondo doge simpe kuna kudidiworoka. Ose kwa zona; kwa rugana yoyidona. 16Ove nyove wa tu popera nokwanare, wa ha handukira simpe Jerusarema. Aso sitata soge, ndundu zoge zokupongoka. Vantu navenye woyirongo yopopepi kuna kuzora Jerusarema novantu woge, morwa nonzo detu noudona ou va rugana ozinyakurwetu. 17Karunga, zuvha ekanderero lyange nelikwambero lyange. Wapukurura ntembeli zoge ezi va zonagura po, zi wapukurura, yipo nkenye ogu a dive asi ove nyove Karunga. 18Tu purakena Karunga ove o tu pakere mbili, koneka udigu ou tuna kara nawo nomahepeko gositata esi sa simba edina lyoge. Ose kuna kukanderera, yeeyi asi ove o mufenkenda, nampili kapi tuna rugana yoyiwa. 19Hompa tu zuvha. Hompa tu dongwenena po. Hompa tu purakena ove o rugane, yipo nkenye ogu a dive asi ove Karunga, wa ha liranga‐ranga! Sitata esi novantu ava yoge.”
Ngabiliyera ta faturura uporofete
20Ame na twikilire kukanderera nokutongonona nonzo dange nononzo dombunga zange Israeli nokulikwambera Hompa Karunga gwange, a wapukurure ntembeli zendi zokupongoka. 21Ame kuna kukanderera, ni liharuke ko Ngabiliyera ogu na mwene memoneko lyomuhowo ta wiza ta teremba apa na kere. Siruwo oso kwa kere sokugava nzambo zongurova. 22Age ta faturura asi: “Ndaniyera, ame kuna wiza ni ya ku kwafe o zuvhe ko uporofete. 23Apa wa varekere kulikwambera Karunga, age ga ku limbwilire. Age kwa ku hara, yipo nye nina wizire ni ya ku tantere elimbururo. Pakera nye mbili efatururo eli nina kukutantera lyemoneko.
24“Yiruwo yitano‐nayivali nomvhura nomurongo ntano nambali, yiwo ure wosiruwo esi ga tura po Karunga sokumangurura mbunga zoge nositata soge sokupongoka kononzo nokoudona. Nonzo ngava di dongonona po, makura uhungami wanarunye ngava u ture po asi emoneko nouporofete ngayi sike mo nontembeli zokupongoka ngava zi pongora. 25Koneka esi, ove o si kwate egano: Kutunda posiruwo esi va tantere asi va tungurure Jerusarema dogoro paapa ga horokere muhoroworwagendesi gwaKarunga, ngapa pita yiruwo yitano‐nayivali nonomvhura ntano‐nambali. Jerusarema ngava mu tungurura nononzira nomapoperokuma aga ngaga sikama yiruwo yitano‐nayivali nonomvhura nomurongo ntano nazimwe nonomvhura mbali, nye ngasi kara siruwo somaudigu. 26Ano pehagero lyosiruwo oso, muhoroworwagendesi gwaKarunga ngava mu dipaga ga hana nzo. Sitata nontembeli ngava yi hanagura po vakwayita wovahomoni womupangeli gomunankondo. Ehagero ngali horoka po ngwendi ruhanzo, tali reta yita nezonauko eli ga wapaika Karunga. 27Mupangeli ogo nga lizuvha novantu wovanzi nawa‐nawa ure wonomvhura ntano‐nambali. Nye harufa zosiruwo esi, nsene zina piti, age nga hagesesa po nonzambo deswakerero nedi donondya. Efano lyedona unene ngava li tulika koruhungu rontembeli, ngali kare ko dogoro ogu nga li tulika ko ta siki kehagero eli ga mu wapaikira Karunga.”
Currently Selected:
NDANIYERA 9: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
