NDANIYERA 6
6
Ndaniyera mekero lyovanyime
1Daliusi kwa tokwere kutura mo noforomani efere nonomurongo mbali mosirongo nasinye. 2Ta tura hena Ndaniyera novakwawo vavali wokutakamesa noforomani oku tava tara emona lyahompa. 3Ndaniyera makura ta piti nominisiteli nonoforomani nadinye, morwa age kwa kere nompepo zongwa unene. Yipo nye ga gazarere hompa kumupa epangero lyosirongo nasinye. 4Vatali nonoforomani makura tava papara edi lyokuheta Ndaniyera kombinga zepangero, nye nayimwe si va gwene, morwa age kwa kere gokulimburukwa, kapi nga rugana yepuko ndi ya hana kuvyuka. 5Makura tava litantere vene‐navene asi: “Kapi ngatu gwana yuma yokuhetesa Ndaniyera, ntudi yuma yokuhamena kombinga zeruganenokarunga lyendi ntani.”
6Makura tava zi kwahompa, tava mu tantere asi: “Hompa Daliusi ngano ta kara ngorooro nomwenyo! 7Navenye ava atu ruganene sirongo soge — vatali, noforomani, nonoforomanigona nomarenga gapeke — tuna lizuvhu asi ove hompa tura po mpangera o zi koreke momunene. Gava mpangera asi momazuva nomurongo ntatu kutupu gokupulisira a hundire yuma kwakarunga peke ndi komuntu kwa hana asi koge ove hompa. Nkenye ogu ana kudina mpangera ezi va mu zugumine mekero lyovanyime. 8Tura po nye esiliko, hompa, o tjange mpangera zokudira kurundurura paveta zoVamede noVaperesiya.” 9Makura hompa Daliusi ta tjanga nye mpangera nesiliko. 10Tupu ga zuvhire Ndaniyera asi vana tjanga mpangera, makura ta hwilire membo lyendi. Konzugo zendi zekeguru makende ga kere ko aga ga tara koyiha yaJerusarema. Omo yimo ga zire, moomu mwanare, ta ka tongeka nongoro pomakende gokuzeguruka a kanderere Karunga rutatu mezuva.
11Vagara owo ngapa kava gu, va ya mu gwana Ndaniyera age kuna kukanderera oku ta kugu kwaKarunga gwendi. 12Makura tava zi navenye kumwe va ka hete Ndaniyera kwahompa. Tava tanta asi: “Hompa, nani kapi wa tjanga mpangera asi, nkenye ogu ana kuhundira momazuva nomurongo ntatu kwakarunga ndi komuntu, kwa hana asi koge ove hompa, tava mu zugumine mekero lyovanyime?”
Makura hompa ta limburura asi: “Oyo kwa kara po paveta zoVamede noVaperesiya za hana kurunduruka.”
13Makura awo tava tantere hompa asi: “Ndaniyera nkwate zimwe zoVajuda, koge ove hompa nompangera ezi wa tjanga, age nombili si. Age kuna kukanderera moomu mwanare rutatu mezuva.”
14Apa ga yi zuvhire hompa oyo, makura ta guwu unene, ta gazadara nzira zokuyoworora Ndaniyera. Age kwa kondjere dogoro tali litokere. 15Makura owo vagara tava tengwire kwahompa, tava tanta asi: “Wa yi diva hompa asi mokuliza nonoveta doVamede noVaperesiya asi mpangera ezi a gava hompa kapi ava zi rundurura.”
16Makura hompa ta gava mpangera va ka kwate Ndaniyera, va mu zugumine mekero lya zura vanyime. Ta tantere Ndaniyera asi: “Karunga goge ogu o fumadeke nkenye apa, ngano ta ku parura.” 17Kevero lyekero makura tava swike ko emanya, ano hompa ta li roteresa nosirotereso sendi nesi somarenga gendi, asi kutupu hena ogu gokuyoworora Ndaniyera. 18Hompa makura ta tengura kombara zendi, ta rara nazo, novahafesi peke‐peke kapi va wizire pwendi, tali lipumine a mone rupofu.
19Makura hompa ta meneka, mwina yipo muna kuzera a ze kekero. 20Eyi ga sika pepi, ta zigire nezwi lyoruhodi asi: “Ndaniyera, muntu gwaKarunga gomwenyo! Karunga goge ogu o kerere nkenye apa, nye ana yi vhuru tupu yokukuparura kovanyime?”
21Makura Ndaniyera ta limburura asi: “Hompa ngano ta kara ngorooro nomwenyo! 22Karunga gwange kuna tumu muengeli a ya kumateke tuna tovanyime, yiyo vana dili kukwata nge, morwa kapi na moneka unzoni kosipara sendi, noku koge si ove hompa, neisi na zona ko.”
23Makura hompa ta hafa unene, ta panga asi, va ka mu koke mo Ndaniyera mekero. Ndaniyera makura tava mu koko mo, nye nokato si kokumuvarera, morwa age kwa huguvarere mwaKarunga gwendi. 24Makura hompa ta panga asi, vagara ava va hetere Ndaniyera, vene novakadi vawo novana vawo vava zugumine mekero lya zura vanyime. Awo simpe nokukasika si mekero konhi, vanyime nare vana va vatukire noyisupa nayinye nare yina pu kumburukuta.
25Makura hompa Daliusi ta tjangere vantu wonomuhoko nadinye nomarudi nagenye nomaraka nagenye asi: “Tani mu kundu! 26Tani panga asi navenye womosirongo sange ava tjire oku tava fumadeke Karunga gwaNdaniyera.
“Age yige po Karunga gomwenyo,
age nga pangera narunye.
Sirongo sendi nokanunusi
kusihanagura po,
epangero lyendi ngali kara ko
dogoro nokouhura.
27Age kuparura oku ta yoworora;
age kurugana yidiviso noyitetu
meguru nepevhu.
Age kwa parura Ndaniyera
konomfa dovanyime.”
28Ndaniyera googu kwa kere
nekuto nefumano lyenene
mepangero lyaDaliusi
nemepangero lyaKoresi, Muperesiya.
Currently Selected:
NDANIYERA 6: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
