NDANIYERA 3
3
Nebukadenesara ta pangere navenye va tongamene efano lyongorodo
1Hompa Nebukadenesara kwa rugene efano lyongorodo. Musika gwalyo nometa nomurongo mbali nantano‐nambali, ano monompatji dalyo nometa ntatu ngoso. Age kwa li dikire medamenena lyaDura mosigaununo saBabironi. 2Ga ninka hompa Nebukadenesara, ta pongaike vapangeli nomarenga nonoforomani novatokoli wononkango novapanguli novalirongi wonoveta novanankondo vakwawo navenye woyirongo, va ya kare po pepongoro lyefano eli ga dikisire Nebukadenesara. 3Marenga nagenye eyi gana lipongaike pepongoro lyefano, makura tava sikama komeho zefano. 4Muzigili makura ta zigire nezwi lyenene asi: “One nombunga nonomuhoko nomaraka nagenye, 5nsene ngomu zuvha ezwi lyonombendo peke‐peke noyiumba nonofiyoli noyisiko peke‐peke, tomu gu pevhu mu kanderere efano lyongorodo eli ga dika hompa Nebukadenesara. 6Ano nkenye ogu ana kudira kutwa nongoro a kanderere, yige kumuzugumina poopo mesuga lyomundiro gokutwera.” 7Ano posiruwo tupu oso, apa da zuvhire nombunga nadinye ezwi lyonombendo peke‐peke, makura nombunga nadinye nomazimo nomaraka tava gu, va kanderere efano eli ga dikire hompa Nebukadenesara.
Vakwawo vaNdaniyera vatatu tava va pe usima wokudira kulimburukwa
8Vababironiya vamwe tava wiza, makura tava pe Vajuda usima. 9Awo tava tantere hompa Nebukadenesara asi: “Hompa ngano ta kara nomwenyo narunye‐narunye! 10Ove hompa amesi nyove wa panga asi, nkenye muntu nsene ta zuvhu ezwi lyonombendo peke‐peke noyisiko peke‐peke, a gwe a kanderere efano lyongorodo, 11nye ogu ana kudira kugwa a kanderere, yige kumuzugumina mesuga lyomundiro gokutwera. 12Poveli vagara vamwe woVajuda ava wa tura mepangero lyosigaununo saBabironi oSaduraka naMesaka naAbetenego, vagara ava hompa, yoge kapi va yi pakera mbili, neli efano lyongorodo eli wa dika, kapi ava li kanderere.”
13Nebukadenesara makura ta handuka unene, ta tumine oSaduraka naMesaka naAbetenego va ka wize. Owo vagara makura tava va reta kosipara sahompa. 14Age ta va tantere asi: “Saduraka naMesaka nove Abetenego, nye yosili tupu asi one kunyoka kukanderera karunga gwange nokutwira nongoro efano lyongorodo eli na dika ndi? 15Ntaantani ngesi, sinene nomu zuvha ezwi lyonombendo nonofiyora neli lyoyiumba peke‐peke neli lyoyisiko peke‐peke, gweni, mu kanderere efano eli na rugana, hawe, ngano nawa, nye nsene kapi tomu kanderere, mosikando ngava mu zugumina mesuga lyomundiro. One tomu gazara asi kweli nye Karunga gokuvhura kumuparura ndi?”
16OSaduraka naMesaka naAbetenego tava limburura asi: “Hompa, ose kapi tatu vhuru kulipopera nyaamwetu. 17Nye Karunga ogu atu ruganene, nsene a hara kutuparura, age kuvhura a tu yoworore mo mesuga lyomundiro gokutwera nomokuwoko koge, ove hompa. 18Nye nampili ngano a dire kuyivhura, hompa eyi yi diva asi ose kapi ngatu kanderera karunga goge gefano lyongorodo eli wa rugana.”
Vakwawo vaNdaniyera vatatu tava va tokwere nomfa
19Nebukadenesara makura ta handuka unene, sipara sendi tasi lipirura kowo oSaduraka naMesaka naAbetenego. Age ta tantere vantu vendi va pupyareke esuga rutano?-?varuvali kupitakana apa va hepera. 20Hompa Nebukadenesara makura ta handuka unene. Ta tantere vagara vamwe womovakwayita vendi asi, va mange vagara owo vatatu, va va zugumine mesuga lyomundiro gokutwera. 21Vagara owo makura tava va manga, awo nonohema dawo nomarwakani gawo noyinsumbere yawo nonomudwaro peke‐peke, makura tava va zugumine mesuga lyomundiro gokutwera. 22Morwa eraka lyahompa edigu unene lya kere, alyo emusuga hena kwa pupyarere unene, makura maraka gomundiro taga dipaga owo vanomeni ava va va twere kesuga lyomundiro. 23Nye vagara owo oSaduraka naMesaka naAbetenego kwa gwililire mokatji kesuga lyomundiro guna hwama, awo kuna va manga.
24Hompa Nebukadenesara tagu mu pwaga ta tukuka, ta gusa marenga gendi asi: “Ee, nani kapi katu zuguminine mo momundiro vagara vatatu, awo kuna va manga?”
Awo tava mu limburura asi: “Yimo nawa‐nawa hompa.”
25Age makura ta va tantere asi: “Tareni, ame kuna kumona vagara vane vana kugenda momundiro. Kapi vana va manga, awo hena kapi vana kumoneka asi kuna kuzuvha kukora — ano gwaune gwawo kwa fana ngwendi karunga.”
Vagara vatatu tava va mangurura nokuvatumba
26Nebukadenesara makura ta zi pepi nevero lyesuga lyomundiro, ta zigida asi: “Saduraka naMesaka naAbetenego, vantu vaKarunga gekeguru‐guru, tundeni mo, mu wize oku!” Makura oSaduraka naMesaka naAbetenego tava tundu mo mesuga lyomundiro. 27Ohompa navenye novapangeli novakurona wovakwayita nomarenga gapeke gahompa, tava lipongaike va ya tare vagara owo vatatu ava gwa dilire kuguma mundiro nonohuki si dokonomutwe dawo nado kapi gwa di vavagwire, ano yikoverero yawo nayo kapi gwa yi hwikire, nedumba si lyomundiro kapi lya va kundamene.
28Hompa Nebukadenesara ta tanta asi: “Karunga gwaSaduraka naMesaka naAbetenego va mu hamberere, ogu ana tumu muengeli gwendi a ya parure vantu vendi ava va mu huguvara. Awo kapi va limburukwa konompangera dange, yiyo va lizumbilira nomwenyo dawo, va nyoke kufumadeka karunga peke ndi va mu kanderere, ntudi Karunga gwawo gelike.
29“Ame tani gava pampangera asi, nkenye mbunga ndi rudi ndi eraka lyokudira kufumadeka Karunga goSaduraka naMesaka naAbetenego, kumutopagura, ano nzugo zendi zi kare ndambo zohando, morwa kutupu karunga gwapeke a vhuru kuzowora ngogu.”
30Makura hompa ta gava epangero koSaduraka naMesaka naAbetenego mosigaununo saBabironi.
Currently Selected:
NDANIYERA 3: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
