NDANIYERA 4
4
Nzodi zauvali zaNebukadenesara
1Hompa Nebukadenesara kwa tumine mbudi ezi kovantu wonomuhoko nomarudi nomaraka nagenye mouzuni asi:
“Tani mu kundu! 2Purakeneni kediviso lyange lyoyitetu noyidiviso eyi ga likida nge Karunga gekeguru‐guru.
3“Ee, yireru omu ya nenepa yitetu
eyi ga tu likida Karunga!
Yidiviso eyi ga rugana asi nonkondogona!
Karunga nga kara Hompa narunye;
age nga pangera narunye‐narunye.
4“Ame kwa hingilire zengu zange mombara zange na ragopa unene. 5Nye ame na rota nzodi zokutjilisa, tani mono mamoneko gokutukukisa ame kuna rara. 6Makura tani gava mpangera asi, vagavindunge womombara navenye moBabironiya va va rete kwange va ya tantere nge eyi zina kutanta nzodi. 7Makura vapumbi navenye nonompure nononganga novalirongi wonombungururu tava va reta mo, makura ame tani va tantere nzodi zange, nye awo tazi va vhuru kuzisingwenena nge. 8Ndaniyera nage ta wiza mo. (Age ngava mu tumbura hena asi Belitesasara, edina lyakarunga gwange.) Mpepo zovakarunga wokupongoka kwa kara mwendi, makura tani mu tantere eyi na rotere. Tani mu tantere asi: 9Belitesasara, mukurona govapumbi, na diva asi mpepo zovakarunga wokupongoka moge za kara, ove hena kuzuvha yihoramo nayinye. Nzodi zange zezi. Tantera nge eyi zina kutanta.
10“Ame kuna rara, tani mono emoneko lyetji lyenene pokatji kouzuni. 11Oso sitji tasi kuru oku tasi nenepa dogoro tasi ka twa keguru, nkenye muntu gomouzuni ta si mono. 12Yihako yaso yiwa, ano enyango lyaso enzi — lyokuvhura kuparuka uzuni mudima. Yikorama yomowiza kugomba momundwire gwaso, yidira kutunga yikorogo yayo konomutayi daso, ano nkenye esi sa kara nomwenyo kulya enyango lyaso.
13“Hana za mokugazara yokuhamena emoneko, tani mono muengeli ta tundu meguru, ga takamesa ga teta pomeho. 14Ta zigire unene asi: ‘Komangereni sitji mu tetagure ko nomutayi daso; rembeni ko yihako yaso mu haraganese enyango lyaso. Yikorama noyidira yi tjideni mo monda nomonomutayi daso. 15Nye sisindi si sigeni mevhu, aso kuna si manga nomalyenge gosivera songoporo. Tomu si sigi moomo mosanzara kumwe nowayi.
“ ‘Makura eme li gwire mugara ogu a kare kumwe noyikorama noyimeno. 16Nomvhura ntano‐nambali kapi nga kara nonondunge dosintu, nye dosiukorama. 17Eli yilyo etokoro lyovaengeli ava va takamesa va teta pomeho. Ano vantu navenye nakunye va dive asi Karunga gekeguru‐guru ga kara nononkondo komauntungi govantu, age hena kuvhura kuvagava kwankenye ogu ana horowora — noku kogu gomusupi kovantu navenye.’ ”
18Hompa Nebukadenesara ta tanta asi: “Yizo nye nzodi ezi kani rotere ozo. Belitesasara, ngesi zi tantera nge eyi zina kutanta. Vagavindunge vange womombara yina va vhuru, nye ove kuvhura, morwa mpepo zovakarunga wokupongoka kwa kara moge.”
Ndaniyera ta faturura nzodi
19Eyi Ndaniyera ogu ngava tumbura hena asi Belitesasara, tayi mu tukukisa, neisi a tanta a diva. Hompa ta mu tantere asi: “Belitesasara, nzodi nombudi zazo ya ha ku tukukisa.”
Belitesasara ta limburura asi: “Hompa, nzodi nefatururo lyazo ngano tali hamene kononkore doge, kapisi koge. 20Sitji sosire sa ka twa keguru, nkenye ogu mouzuni ta si mono. 21Yihako yaso yiwa, enyango lyaso enzi, kuvhura kuliparuka uzuni mudima. Yikorama yomowiza yimo ayi gombo, ano yidira yimo ya tungira yikorogo yayo monomutayi daso.
22“Hompa, ove nyove sitji sosire sononkondo. Ove kwa kura unene yiyo wa ka twa keguru, ano nonkondo doge yiyo da lihanena uzuni mudima. 23Ove hompa kuna kutara, muengeli ta tundu meguru a tante asi: ‘Oso sitji si teteni po mu si hanagure po, nye edi li sigeni mevhu. Edi li mangeni nelyenge lyosivera nongoporo, mu li sige mosanzara kumwe nowayi. Sigeni eme li mu gwire mugara ogu, mu mu sige a kare kumwe noyikorama nomvhura ntano‐nambali.’
24“Eyi zina kutanta ove hompa, eyi ana ku horwere Karunga gekeguru‐guru asi ngayi horoka yeyi. 25Ngava ku tjida po povantu, makura ngo ka kare kumwe noyikorama yomowiza. Nomvhura ntano‐nambali ngo lya wayi ngwendi ngombe, ngo rara poruzera?-?zera, eme tali ku gwire. Makura ngo pure asi Karunga gekeguru‐guru kupangera mauntungi nagenye govantu, age hena kuvhura kugagava kwankenye ogu ana horowora. 26Vaengeli kwa panga asi, edi va li sige moomo mevhu. Eyi kuninka asi ngo kara hena hompa apa ngo diva asi Karunga kupangera uzuni mudima. 27Ano ove hompa, kwama epukururo lyange. Hageka kuzona, rugana eyi ya hungama, oku to fire nkenda vahepwe. Makura ntudi ntani ngo ragopa ngorooro.”
28Nayinye eyi ya mu horokerere hompa Nebukadenesara. 29Nomwedi murongo nambali tupu da pitire po, age ta gendi kontunda zombara zendi moBabironi, 30ta tanta asi: “Tara tupu omu ga nenepa Babironi! Ame kwa mu tunga a kare nkurusitata sange si tumbukise nonkondo nefumano nouhompa wange.”
31Age simpe ana kuuyunga, ezwi tali tundu meguru li tante asi: “Hompa Nebukadenesara, purakena eyi nina kuuyunga! Nonkondo doge dosiuhompa ngesi vana di ku gusa. 32Ngava ku tjida po povantu, to ka kara kumwe noyikorama, ngo lye wayi ngwendi nongombe nomvhura ntano‐nambali. Makura ngo divire po asi Karunga gekeguru‐guru ga kara nononkondo komauntungi govantu, age kuvhura kugagava kwankenye ogu ana horowora.”
33Kapi pa kara, odo nonkango tadi siki mo. Nebukadenesara tava mu tjida po povantu, ta ka lya wayi ngwendi nongombe. Eme tali mu gwire korutu, nohuki dendi tadi repa ngwendi nohunga domakangakodi, ano mambwara gendi taga repa ngwendi mambwara goyidira.
Nebukadenesara ta panda Karunga
34“Nomumvho ntano‐nambali eyi da pita po,” hompa ta tanta asi, “ame kwa tere keguru, makura nondunge dange tadi tengwire nge. Tani panda Karunga gekeguru‐guru, tani fumadeke oku tani yererepeke ogu a karerere narunye.
“Age nga pangera narunye,
ano untungi wendi wanarunye.
35Vantu vepevhu age kuvatara
nayimwe si;
vaengeli vemeguru novantu vepevhu
mepangero lyendi va kara.
Nagumwe si a patana eharo
lyendi ndi a mu pure
eyi ana kurugana.
36“Nondunge dange eyi da tengura, makura etumbuko nouhompa nefumano lyountungi wange tava u tengwidire nge. Marenga gange novanenentu vange tava tambura nge, makura nonkondo dange dosiuhompa tava di tengwidire nge kumwe nefumano lyenene kupitakana pwanare.
37“Ano ntaantani, ame Nebukadenesara, tani tanga, tani fumadeke oku tani yererepeke Hompa geguru. Nayinye eyi a rugana yiwa ayo kwa hungama, age kuvhura kununupika ogu a linenepeke.”
Currently Selected:
NDANIYERA 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
