NDANIYERA 2
2
Nzodi zaNebukadenesara
1Momumvho gwauvali gwaNebukadenesara mouhompa, age kwa rotere nzodi. Azo ngazi mu hepeke unene kapi nga rara, 2makura ta tumine vapumbi vendi nonompure novarodi nononganga va wize va ya mu zagwire nzodi. Eyi va wiza va ya sikame komeho zahompa, 3gwina ta va tantere asi: “Ame kapi na kara nombili kombinga zonzodi ezi na rota. Ame kuna hara ni dive asi yinke zina kutanta.”
4Vena makura tava mu limburura moRuarameya asi: “Hompa ngano ta kara ngorooro nomwenyo! Tu tantera nzodi zoge, makura ose tu zi ku singwenene.”
5Hompa ta va tantere asi: “Ame kuna tokora asi tomu tantere nge nzodi, one hena mu singwenene nge eyi zina kutanta. Nsene kapi nomu yi tompora, ngano tava mu topagura moyintokora, nonzugo deni nado ngava di ninke di kare nondambo dohando. 6Nye nsene nomu zi tantera nge ozo nzodi nezaguro lyazo, ngano tomu gwana uhwi nekuto lyenene kwange. Ngesi tantereni nge asi nzodi musinke, neyi zina kutanta asi yinke.”
7Vena tava limburura hena hompa asi: “Hompa ngano kutusansekera tupu ozo nzodi, makura ose tu zi singonone.”
8Opo ngoso, hompa ta zigire, asi: “Moomu na yi gazara yimo! One kuna hara tupu mu manene mo siruwo, morwa muna yi mono asi ame na manene mo kutokora 9mokumufitisa one namuvenye simwe, nsene kapi muna kusansekera nge nzodi. One kuna kuuyunga nonkango doyimpempa dokulikumbagera dogoro siruwo si lipwire. Sansekereni nge nzodi, ntani nani diva asi one kuvhura kudivisa nge ezaguro lyazo.” 10Vagavindunge tava limburura asi: “Kutupu konauzuni oku ogu gokuvhura kukutantera eyi ono hara kudiva ove hompa. Nayene hena kutupu hompa, a kare munene ndi gononkondo, ogu ga yi pura rumwe eyi vapumbi nonompure nononganga dendi. 11Eyi ono kupura ove hompa yidigu, kutupu ogu gokuyivhura, ntudi vakarunga ava va dira kutunga povantu.”
12Hompa yipo ga handukire unene, ta gava mpangera asi, vakonentu womoBabironiya navenye va va dipage. 13Lya zuvhika olyo eraka asi vakonentu va va dipage, oNdaniyera novakwawo nawo tava va papara asi va va dipage.
Karunga ta likida Ndaniyera eyi zina kutanta nzodi
14Ndaniyera makura ta zi kwaAliyoko, mukurona govakungirutu vahompa, ogu va pangerere asi yige na yi sikisa mo eyi. Ta gazara po nonkango domayere donondunge, 15ta pura Aliyoko asi hompa yinke ana gavere mpangera zondigu ngoso. Aliyoko makura ta tantere Ndaniyera eyi yina horoka po.
16Ndaniyera yipo ga zire kwahompa, a ka mu hundire asi ngano a mu pe evega lyokudivisa hompa eyi zina kutanta nzodi.
17Ndaniyera makura ta zi konzugo zendi, ta ka divisa ko vakwawo oHananiya naMisayeli naAsaliya eyi yina horoka. 18Ta va tantere asi, va kanderere kwaKarunga gemeguru a va fire nkenda oku tava mu hundire a va fatwilire yihoramo ngava dire kuvadipaga kumwe novagavindunge womoBabironiya. 19Masiku googo makura Ndaniyera tava mu horwere sihoramo oso memoneko, ta tanga Karunga gemeguru asi:
20“Karunga munongo, age munankondo
a fumane narunye nanarunye.
21Age yige a pangere yinema noyiruwo;
yige a tura ohompa koyipundi
ta va gusa ko hena;
yige a gava unongo nonondunge.
22Yige a horora eyi ya vanda ya horama;
ga diva eyi ya horama momundema,
age ko mwene kwa mu
kundurukida uzera.
23Tani ku panda oku tani ku fumadeke,
ove Karunga gomama.
Ove kwa pa nge unongo nononkondo;
ono limburura ekanderero lyange
yiyo ono tu likida yokutantera hompa.”
Ndaniyera ta tantere hompa nzodi oku ta zi faturura
24Ndaniyera makura ta zi kwaAliyoko, ogu ga tanterere hompa asi a dipage vanongo womoBabironiya. Ta mu tantere asi: “Wa ha va dipaga. Twara nge kwahompa ni ka mu tantere eyi zina kutanta nzodi zendi.”
25Usimbu‐usimbu Aliyoko ta twara Ndaniyera komeho zahompa Nebukadenesara, ta mu tantere asi: “Na gwana ko gumwe mononkwate doVajuda gokuvhura kukutantera ove hompa eyi zina kutanta nzodi zoge.”
26Makura hompa ta tantere Ndaniyera (ogu ngava tumbura hena asi Belitesasara), asi: “Kuvhura o sansekere nge ove, eyi kani rotere neyi yina kutanta?”
27Ndaniyera ta limburura asi: “Hompa, kutupu nganga ndi mpure, mupumbi ndi mukonentu gonombungururu gokuvhura kuyikutantera oyo. 28Nye pweli Karunga gemeguru ogu a horora yihoramo. Age yige ana ku divisa ove hompa eyi ngayi horoka komeho. Ano ngesi tani ku fatwilire nzodi, emoneko eli ko mwene ove kuna rara.
29“Apa ko rere ove hompa, ko rotere yokuhamena yokomeho; ano Karunga ogu a horora yihoramo, yige ka ku likidire eyi ngayi horoka. 30Ano ame ko, sihoramo esi vana si horwere nge, kapisi morwa ni munongo unene kupitakana vapeke, nye mokuninkira asi ove hompa va ku divise eyi zina kutanta nzodi zoge, o dive magazaro gomutjima goge.
31“Hompa, memoneko lyoge ko mwene sinhwi sefano lyenene lina sikama komeho zoge. Musika gwaso mure, ano site saso sinene, nye yimoneka yaso to tenge. 32Mutwe gwaso gongorodo zene‐zene; ezimo nombunda yongoporo; 33maguru gaso gosivera, ano nompadi daso, ruha oru sivera, ruha oru erova. 34Ano ove kuna kusitara, emanya tali bamuka korukenka ga hana kuliguma muntu, tali daya nompadi dosivera nerova lyosinhwi sefano, tali di myona. 35Poopo ngoso makura sivera nongoporo nosisiliveli nongorodo, tali yi myona, tayi kara ngwendi rungu rokurombo ponompare, oru azi reragura mpepo, nokuruvarera po si. Nye emanya eli lya myonene sinhwi sefano, tali nenepa, tali kara ndundu zonene, makura tali zwida uzuni naunye.
36“Yimo kazi kere ngoso nzodi. Ngesi tani ku tantere nye eyi zina kutanta nzodi, hompa. 37Ove hompa, nyove munene po kohompa navenye. Karunga gemeguru kwa ku ninka o kare hompa, yiyo ga ku pa nonkondo nounene nefumano. 38Age kwa ku ninka o pangere uzuni naunye ou va tunga vantu noyikorama yomowiza noyidira nayinye. Ove nyove mutwe gongorodo. 39Konyima zoge ngaku kara sirongo, nye kapi ngasi sika mo mwesi soge, ntani ngaku kwama sautatu songoporo, esi ngasi pangera uzuni mudima. 40Makura ngapa kare hena sirongo saune, aso ngasi kara sosikukutu ngwendi sivera, esi asi myona tasi tezagura nayinye. Moomu tupu asi myona sivera nkenye eyi, naso yimo ngasi myona tasi sansununa yirongo yanare. 41Ko mwene hena nompadi nomambwara, ruha oru erova ruha oru sivera. Eyi kuna kutanta asi sirongo ngasi ligaununa. Ngasi kara noyuma yononkondo dosivera, morwa kapa kere sivera va vhonga nerova. 42Mambwara — ruha oru sivera ruha oru erova — kutanta asi ruha rumwe rosirongo ngaru kara nonkondo, ano oru rumwe kapi ngaru paka nonkondo. 43Ko mwene hena sivera sokuvhonga nerova. Eyi kuninka asi vapangeli woso sirongo ngava kambadara kugwanekedesa mapata gawo mokulikwara‐kwara, nye kapi ngava likwata kumwe, moomu tupu asi dili kulikwata kumwe sivera nerova. 44Posiruwo sohompa owo Karunga gemeguru nga dika sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye. 45Ko mwene emanya eli kali bamukire kondundu, ako ga hana kuguma ko muntu nomu kali hanagwire sivera nongoporo nerova nosisiliveli nongorodo. Karunga gomunene ta ku tantere ove hompa, eyi ngayi horoka komeho. Ame na ku tantere nawa‐nawa omu ko rotere, yiyo nina ku pe hena ezaguro lyonzodi lyouhunga.”
Hompa ta futu Ndaniyera
46Hompa Nebukadenesara ta ligandere pevhu, ta gava mpangera asi Ndaniyera va mu retere nonzambo nomauhwi. 47Hompa ta tanta asi: “Karunga gweni munene kovakarunga navenye, age Hompa gohompa, muhoroli goyihoramo. Apa na tundire ni yi dive pokusingonona ove sihoramo esi.” 48Makura hompa ta zerura Ndaniyera, ta mu pe mauhwi gomanzi gomawa, ta mu tura mepangero lyosirongo saBabironiya, ta mu ninki a kare mukurona govagavindunge womombara. 49Kehundiro lyaNdaniyera, makura hompa ta tura oSaduraka naMesaka naAbetenego, va kare vapangeli wosirongo saBabironiya, nye Ndaniyera age kwa kere mombara zahompa.
Currently Selected:
NDANIYERA 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
