AMOSA 8
8
Emoneko lyosikumba senyango
1Ame kwa kere hena nemoneko limwe lyakwaHompa. Mwalyo ame kwa mwene mo sikumba senyango. 2Hompa ta pura asi: “Amosa, yinke ono kumona?”
“Sikumba senyango,” yimo na limbwilire.
Hompa ta tantere nge asi: “Ehagero lyovantu vange Vaisraeli lina wiza. Kapi ngani rundurura hena magazaro gange gokuvafutisa. 3Mezuva olyo nonsumo domombara ngadi kara malirankali. Napenye ngapa kara yimpu. Ayo ngava yi zuguma mo memweno.”
Israeli tava mu pangura
4Purakeneni edi, one ava omu lyatanga vatokere, tomu kambadara kuhokora vahepwe mosirongo. 5One kulitantera nyaamweni asi: “Ose tatu ndindire mazuva gokupongoka ga pite po, makura ngatu vhure kurandesa yilya yetu. Esabata ezuvake ngali haga ngatu vhure hena kutameka kurandesa? Ose makura ngatu vhure kuninkilira mo mokuruganesa heteko zoyimpempa nokununupika yihetekeso, tu kumbagere varandi vetu. 6Ose ngatu vhura kurandesa yilya ya hana mulyo nomfuto zondiro. Ose ngatu gwana muntu gohepwe gokudira kuvhura kufuta nomukuli dendi, nomfuto si zoyicamakaku zeezi, makura ngatu mu rande po a kare mupika.”
7 Hompa Karunga gwaIsraeli ga gana mugano asi: “Ame narumwe si asi ngani divare yirugana yawo yoyidona. 8Ano evhu ngali kankama, nkenye ogu ga kara mosirongo, nga kara noruhodi. Sirongo nasinye ngasi kankama; ngasi sikama, makura tasi gu ngwendi mukuro gwaNili. 9Ruveze runa siki mo rokuninka ezuva li toke pomutwekatji, nevhu li sovagane poruveze romutenya. Ame Hompa Mupangeli nyame na yi uyunga. 10Ame ngani ninka yipito yeni yi kare nontoko, nomarusumo geni gehafo ga kare nonkugo doruhodi. Ame ngani mu ninka mu kurwise nomutwe deni nokudwara nonsako, makura ngomu kare ngwendi vakurona ava vana kara mononkali damunwawo ogu va hara unene. Ezuva olyo ngali kara lyedigu unene dogoro pehagero.
11“Ruveze runa siki mo ni tume erumbu mosirongo. Vantu ngava fa nzara, nye kapisi zomboroto. Awo ngava fa enota, nye kapisi lyomema. Nye awo ngava fa nzara nenota lyononkango daHompa. Ame Hompa Mupangeli, nyame na yi uyunga. 12Vantu ngava gendagura kutundilira Muzogo va vyuke korwaMbindakano, nokutunda korwaUpumezuva va vyuke koUtokero. Awo ngava papara nonkango daHompa nakunye, nye kapi ngava di gwana. 13Mezuva olyo novadinkantu vaava vandjewa‐ndjewa novakadi ngava ka fa unene enota. 14Ava ava gana kovakarunga woyimpempa vaSamaliya va tante asi: ‘Karunga gwaDana’, ndi asi ‘Karunga gwaBereseba’, — vantu ava ngava liganda, nye kapi ngava pinduka po.”
Currently Selected:
AMOSA 8: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
