AMOSA 7
7
Emoneko lyasimbonde
1Ame kwa mwene emoneko lyakwaHompa Mupangeli. Mwalyo ame kwa mu mwene ta siti edugi lyasimbonde, tupu va mana kukasura mapya gahompa wayi, u tameke kuhoka hena. 2Omo memoneko lyange ame kwa mwene simbonde ana kulya nkenye kaninke kokatarara mosirongo, makura ame tani tanta asi: “Hompa Mupangeli, dongwenena po vantu woge! Ngapi omu nava vhura kuparuka? Awo vanunu, awo hena kapi va paka nonkondo!”
3 Hompa makura ta rundurura magazaro gendi ta tanta asi: “Eyi ono kumona, kapi ngayi kara po.”
Emoneko lyomundiro
4Ame kwa mwene hena emoneko limwe lyakwaHompa Mupangeli. Mwalyo ame kwa mu mwene, ta liwapaikire kufutisa vantu vendi nomundiro. Mundiro kwa pwilikire efuta lyenene, tagu rungwinike evhu, makura tagu tameke kuhwika sirongo. 5Makura ame tani tanta asi: “Hageka, Hompa Karunga! Vantu woge ngapi omu nava vhura kuparuka! Awo vanunu, awo hena kapi va paka nonkondo!”
6 Hompa ta rundurura hena magazaro gendi ta tanta asi: “Neisi nayo kapi ngayi kara po.”
Emoneko lyongodi zokuhetekesa
7Ame kwa mwene tupu hena emoneko limwe lyakwaHompa. Mwalyo ame kwa mu mwene, age ana sikama kekuma eli va tunga nekwafo lyongodi zokuhetekesa, ano mokuwoko kwendi kwa kere mo ngodi zokuhetekesa. 8Ta pura nge asi: “Amosa, yinke ono kumona?”
Ame tani limburura asi: “Ngodi zokuhetekesa.”
Makura age ta tanta asi: “Ame kuna kuziruganesa ni likide asi vantu vange kuna fana ekuma eli lya penga, li tunde ko kongodi. Ame kapi nani rundurura hena egazaro lyange lyokuvafutisa. 9Mavega aga adi tongamenene nontekuru daIsaka, ngaga hanauka po. Mavega gokupongoka gaIsraeli ngaga kara nondambo dohando. Ame ngani hageka epangero lyahompa Jerobiyamu.”
Amosa naAmasiya
10Amasiya, mupristeli gomoBeteli, kwa divisire Jerobiyamu, hompa gwaIsraeli asi: “Amosa kuna kutukura sibofa mombunga a ku vyuke. Yiuyunga yendi ngayi hanagwisa po sirongo. 11Age kutanta asi: ‘Jerobiyamu nga fa moyita, ano Vaisraeli ngava va gusa mo mosirongo sawo va va tware koupika.’ ”
12Makura Amasiya ta tantere Amosa asi: “Hawe makura nye, ove muporofete! Tengura koJuda, yiko no ka udisira. Owo yiwo ngava ka ku futa. 13Wa ha porofetera mo hena omu moBeteli. Eli evega lyaHompa lyokutongamenena nontembeli zosirongo.”
14Amosa ta limburura asi: “Ame kapisi ni muporofete ogu a porofetere mfuto. Ame ni musita goyimuna, ame hena ni mutakamesi goyitji yomaukuzu. 15Nye Hompa makura yiyo ga gusa nge ko kousita, makura yiyo ga pangera nge asi ni ka porofetere mbunga zendi zaIsraeli. 16Ano ngesi purakena nye eyi ana kutanta Hompa. Ove kuna tantere nge asi ni hageke kuporofeta, hena asi na ha kavaukira mbunga zaIsraeli. 17Ano Amasiya, Hompa ta ku tantere asi: ‘Mukadoge nga kara hondedi zomonzira, ano vana woge ngava va dipagera moyita. Sirongo soge ngava si tavagura, tava si gava kovantu peke, ano ove ko nyaamoge ngo ka fira kosirongo sovapagani. Vantu vaIsraeli ngava va gusa mo nawa‐nawa mosirongo savene va va tware koupika.’ ”
Currently Selected:
AMOSA 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
