AMOSA 6
6
Ehanauko lyaIsraeli
1Ee, udigu musi ngau kara kweni one wokatjakara moSiyoni nava mwa hana sinka moSamaliya — one vanenentu womuhoko ogu gomunene gwaIsraeli, oku ava zi vantu va ka papare ekwafo! 2Zendeni mu ka tare sitata saKaline. Mu ka ze hena kositata sosinene saHamati ntani muna kukunkumuka kositata soVafilisiti Gata. Ayo kwa kere ko nye hasa kupitakana mauntungi gaJuda naIsraeli ndi? Ndi evhu lyayo enene lya kere kupitakana lyeni? 3One kuna kunyoka kupura asi ezuva lyezonauko tali wiza, nye eyi omu rugana kuna kulihedesa pepi. 4Asi nani udigu musi ngau kara kweni one muna kuligonona poyipundi yoyiwa yomapwizumukiro, oku tomu li nompunya nononzwigona! 5One kwa fana nonsumo dokutota, moomu ga rugana Ndafita, tomu di siki koyiumba. 6One kunwina vhinyu monondama, tomu gwava murora gondiro, one nye mwa hana kulira ezonauko lyaIsraeli. 7Ano nyone ngomu hova kuza koupika. Yipito nomadjobwano geni yipo ngayi hagera.
8 Hompa Mupangeli gononkondo nadinye kwa gava erondoro lyendi nomugano asi: “Ame kwa tonda ukeka wovantu vaIsraeli; nombara dendi ame kwa di nyenga. Sikurutata sawo nanayinye eyi ya kara mo ngani yi gava kononkore.”
9Nsene pwa hupa vagara murongo pezimo, ngava fa. 10Gekoro lyomugara gokufa, ogu nga pitisira evhumbiko nga gusa mo simpu monzugo. Gekoro nga zigira ogu ana hupu mo monzugo asi: “Mweli hena gumwe ogu ana kara noge ndi?” “Hawe!”
Ezwi ngali limburura asi:
Makura gekoro nga tanta asi: “Mwena! Tu takamese asi twa ha tumbura nampili nakauke edina lyaHompa.”
11 Hompa apa nga gava mpangera, makura nonzugo dononene nedi dononunu ngadi tekauka po. 12Nonkambe kuvhura kundjandjara komamanya ndi? Vantu kupurura nonohove mefuta ndi? Nye one yiyo mwa pirura usili u kare uhungu, ano uhunga u kare epuko.
13One kulikanganga asi mwa kwata sitata saRodebara. Tomu likanganga asi: “Ose kwa kere nononkondo dina gwana po dokukwata Karenayimu.”
14 Hompa Karunga Munankondo nadinye, mwene ta tanta asi: “Mbunga zaIsraeli, ame ngani tuma mbunga zovakwayita wovanayirongo, ngava ya kwate sirongo seni. Azo ngazi mu hepeka kutunda koHamati koMuzogo dogoro komuramba gwaAraba koMbingakano.”
Currently Selected:
AMOSA 6: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
