AMOSA 5
5
Ezigidiro kelitezururo
1Purakeneni rusumo romalirankali oru nina kudimba, one mbunga zaIsraeli oru asi:
2Mukadona Israeli ana gu,
kapi nga katuka po hena!
Kuna rwapama pevhu,
nagumwe si ogu
ana kumuzerura po.
3 Hompa Mupangeli ta tanta asi: “Mositata moIsraeli ngamu tunda vakwayita eyovhi, nye efere limwe tupu yilyo ngali ka tengura ko; mwasimwe ngamu tunda efere, nye murongo gumwe tupu ngagu ka tengura ko.”
4 Hompa ta tantere mbunga zaIsraeli asi: “Wizeni kwange, ngomu paruke. 5Mwa ha za koBereseba mu ka tongamene. Mwa ha papara nge moBeteli — Beteli nayimwe si ngayi kara po. Mwa ha za koGiligali — vantu vamo kwa va tokwera koupika.”
6Zendeni kwaHompa, makura ngomu kare nomwenyo. Nsene mu dira kuyirugana, ngano nga komba po Israeli moomu agu veveke mundiro. Mundiro ngagu veveka vantu womoBeteli, kutupu ogu nga vhura kugudimisa. 7Muna pu kupangura one ava omu patanesa usili oku tomu kumbagere vantu kweyi ya va tumbukira!
8 Hompa kwa rugana nombungururu,
Vana vaMuzogo‐zogo naNtunguru.
Age kupirura mundema
tagu kara uzera,
ano mutenya tagu kara masiku.
Age kuzigida mema gefuta
taga powomwene pevhu.
Edina lyendi yige Hompa.
9Age kureta ezonauko kovanankondo
nonohotepopero dawo.
10Vantu one kwa nyenga ogu a horora usima a uyunge usili wene pompanguro. 11One kuhepeka nohepwe, tomu di hakana nombuto dado. Nonzugo deni domamanya gomawa edi mwa tunga, kapi ngomu kara mo, yi kare yindjembere yoyiwa eyi mwa tapeka vhinyu zayo, kapi ngomu zi nwa. 12Na diva asi nonzo deni nondingu unene ano yirugana yeni eyi mwa rugana yidigu unene. One nonkore dovantu wovawa, kugusa nomfuto dombumbo, ano nohepwe tomu di dongadongere yado pompanguro. 13Yokumwena pore poyiruwo yangoso, yininke yoyiwa?
14Sitambo seni si kare sokurugana uwa, kapisi udona, nkumwe ngomu kare nomwenyo. Ano Hompa Munankondo nadinye nga kara nawa‐nawa kumwe neni, moomu omu yi likarwire. 15Omu nyenge eyi ya yipa, tomu hara yoyiwa, tomu takamesa asi uhungami u pangere ponompanguro. Mpamwe Hompa nga fira nkenda vantu womuhoko ogu ava vana hupu po simpe.
16Ano Hompa Karunga Munankondo nadinye kuna kutanta asi: “Ngapa kara nonkali netakumo lyeguwo mononzira dositata. Novanamapya vaava ngava va zigida va ya lire vafe kumwe nava ava futire kulira. 17Moyikunino yomandjembere namunye ngamu kara malirankali. Nayinye eyi ngayi kara po morwa ngani mu futisa.” Hompa yige ana yi uyunga.
18Asi udigu musi ngau kara kweni one ava muna diworoka ezuva lyaHompa! Ezuva olyo, uwa musinke ngali mu pa one? Kweni one ngali kara ezuva lyomundema kapisi lyouzera. 19Ngali kara ngwendi muntu ana kuduka nyime a gwanekere nerundu! Ndi ngwendi mugara ana wiza kembo a diginine kuwoko kwendi kekuma, makura ezoka tali mu humu! 20Ezuva lyaHompa ngali reta mundema, kapisi uzera; ngali kara ezuva lyodovera pwa hana kauzera.
21 Hompa ta tanta asi: “Yipito yeni youkereli ame kwa yi nyenga, kapi na yi hara! 22Apa ngomu retera nge nonzambo deswakerero nedi donondya, kapi ngani di tambura; ndi asi ngani tambure nonzambo doyimuna eyi ya lilira ya neta. 23Hagekeni ezogerero lyononsumo deni; kapi na hara kupurakena yiumba yeni. 24Sigeni uhunga u gende moomu aga pupu mema, ano uhungami ngwendi mukuro ogu gwa ha pwire.
25“Mbunga zaIsraeli, ame kapi na mu hundira yigava ndi nonzambo nomvhura nadinye nomurongo ne, edi na mu pitisira momburundu. 26Ano ntaantani, morwa mwa tongamena mafano gaSakutu hompa karunga gweni naga gaKaiwani, karunga gweni gombungururu, mwa hepa kusimba mafano ogo 27apa ngani mu twara koupika kosirongo sa kara kesinya kwina lyaDamasikusi,” yimo ana kutanta Hompa. Edina lyendi Karunga Munankondo nadinye.
Currently Selected:
AMOSA 5: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
