AMOSA 4
4
1Purakeneni eyi, one vakadi vaSamaliya, ava mwa neta ngwendi nondidi daBasani edi da lilira da neta, ava omu rugana momudona, tomu hepeke vahepwe, omu hundire vagara veni asi ava mu paape yinwa! 2Hompa Mupangeli gokupongoka kwa tumbwidira asi: “Mazuva taga wiza apa ngava mu kokorora nomarowo; nkenye ogu gomumweni nga kara ngwendi mfi kerowo. 3Ngava mu kokwerera komufa gopopepi gemekuma, tava mu zuguma mo.”
Usuntu waIsraeli kulironga
4 Hompa Mupangeli ta tanta asi: “Mbunga zaIsraeli, zendeni kevega lyokupongoka moBeteli mu ka zone paapa mwa hulira! Zendeni koGiligali mu ka zona paapa da hulira nonkondo deni! Twikireni ngorooro kureta yimuna yokuzamba nonzambo nkenye ngurangura, oku tomu reta yiumurongo nkenye ezuva lyautatu. 5Twikireni kuzamba nomboroto deni donzambo zompandu kwaKarunga, oku tomu likangangere yikambekanzambo eyi omu reta! Eyi ngesi yiyo mwa tokomena po kurugana one.
6“Ame nyame na retere erumbu moyitata yeni nayinye, nye one nokutengwira si kwange. 7Ame kwa gusire ko mvhura apa da zi hepere unene nombuto deni. Tani rokesere mvhura mositata simwe, ano omu mwasimwe nokurokesera mo si. Mvhura tazi roko mepya limwe, ano omu mwalimwe mwanywe. 8Enota kwa kotongwerere vantu woyitata peke‐peke, tava litutire kositata simwe asi yiko nava ka gwana mema, nye nokugakumwa si. Naposi one nokutengura si kwange.
9“Na tumine mpepo zompyu zi kukutike nombuto deni. Simbonde ta li po yikunino yeni nayinye noyikunino yoyindjembere nomaukuzu geni nomauzwe geni. Napo si one nokutengura si kwange.
10“Na tumine ehepeko ngwendi lyeli na tumine moEgipite. Tani dipagesa vadinkantugara veni moyita, nonkambe deni tava di kwata. Mazuru geni tani ga fumbwilisa uworedi wovantu wokufa monokamba deni. Napo si one nokutengwira si kwange.
11“Na hanagwire vakweneni vamwe moomu na hanagwire Sodoma naGomora. Ava mwa hupire po, tomu fana ngwendi sitare vana zokora momundiro. Napo si nokutengwira si kwange, yimo ana kutanta Hompa. 12Ano one Vaisraeli, ame ngani mu futisa. Morwa asi yiyo ngani rugana eyi, yipo nye liwapaikireni kuvyuka kepanguro lyange!”
13Karunga yige ga rugana nondundu
yiyo ga sita nompepo.
Age kudivisa magazaro gendi kovantu;
age kupirura mutenya, tagu kara mundema.
Age kugenda konondundu depevhu.
Edina lyendi lyeli: Hompa
Karunga Munankondo nadinye!
Currently Selected:
AMOSA 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
