AMOSA 3
3
1Mbunga zaIsraeli, purakena kombudi ezi ana kuuyunga Hompa kombinga zoge, muhoko nagunye ogu ga gusa moEgipite asi: 2“Konomuhoko nadinye depevhu, nyonelike na diva, nava ani pakere mbili nyone makura. Oyo yiyo nye yina kudigopeka unene nonzo deni, ayo hena yiyo nye nani di mu futisilira.”
Sirugana somuporofete
3Vagara vavali kuvhura va gende kumwe, awo va hana kulizuvha tanko pomuhowo ndi?
4Nyime kuvhura a nunge mowiza, age ga hana kugwana erambo ndi?
Nyimegona kuvhura a gone mosiwarambo sendi, age ga hana kukwata yuma ndi?
5Sidira nye kuvhura si fe morutenda, aro va hana kurutega ndi?
Rutenda kuvhura ru mahuke, ya hana kurumahura yuma ndi?
6Mbendo zoyita kuvhura zi hagere mositata, za hana kutjilisa vantu ndi?
Ehanauko kuvhura li gwane sitata, ga hana kulituma Hompa ndi?
7 Hompa Mupangeli narumwe si a rugana yuma ga hana kuyihorwera vakereli vendi, vaporofete.
8Nyime nsene ta nungu, yilye gokunyoka kutjira?
Hompa Mupangeli nsene ta uyunga, yilye gokunyoka kuudisa mbudi zendi?
Etokoro lyaSamaliya
9Divisireni ava va kara monombara daEgipite naAsidodo asi: “Pongeni konondundu edi da kundurukida Samaliya, mu tare epiyagano lyenene noyirugana yoyidona eyi vana kurugana ko.”
10 Hompa ta tanta asi: “Vantu ava kwa zwida mamunzugo gawo yininke eyi va gusa mokurugana udona nomoukorokotji. Kapi va diva asi kukara mousili ngapi. 11Ano nkore ngazi kundurukida sirongo sawo, tazi hanagura mapopero gawo, makura tazi teza mamunzugo gawo.”
12 Hompa ta tanta asi: “Moomu tupu a gwana po musita yikondongororo yivali ndi kutwi konzwi ezi ana li nyime novantu womoSamaliya vangapi tupu ngava hupa mo, ava vana kurara ntaantani poyipundi yokupwizumukira yombeyo. 13Karunga Mupangeli noMunankondo nadinye ta tanta asi, purakena o rondore nontekuru daJakopo.” 14“Mezuva eli ngani futisira vantu vaIsraeli nonzo dawo, ngani hanagura po yizambero yaBeteli. Nombinga dosizambero ngava di teza ko, tadi gwire pevhu. 15Ngani hanagura po mambo gokufu naga gokurombo. Nonzugo edi va limbagura nonombinga danzovhu, ngadi kara nondambo dohando; nkenye nzugo zonene ngazi hanauka po.”
Currently Selected:
AMOSA 3: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
