Yirugana Yovapositoli 24
24
Paurusa tava mu heta
1Eyi pwa pita mazuva gatano, makura mupristeli gomunene Ananiyasa kumwe nomasimbi gamwe goVajuda nomunaveta gumwe Teruturusi, tava zi koKesareya va ka hete Paurusa kwamupangeli Felikisi. 2Paurusa kwa mu zigida tupu, makura Teruturusi ta tameke kumuheta asi: “Gekuto, ezi mpora tuna kara nazo mwaroge, ga kare mawapeko aga va reta mosirongo setu morwaunandunge woge, 3oyo kapi ngatu yi divara, hena ngatu ku pandura nkenye apa. 4Kapi nina hara ni ku manene po ruveze, nye tani ku hundire o tu purakene nakauke nombili. 5Mugara ogu tuna mu mono muhanesi goudona, age hena mureti gondjorongani moVajuda mouzuni mudima. Age hena yige mupitisili gosimpangu soVanasareta. 6Ano nontembeli zeezi yizo a kondjesa asi a zi nyateke, nye ose yiyo tuna mu kwata. 7Nye Lisiyasa, mupitisili govakwayita eyovi, makura ta wiza, ta mu tu hakana mononkondo. 8Nsene to mu pururura, no gwana tupu usima ou tuna mu monene.” 9Vajuda nawo tava pura, tava tanta asi, hawe, oyo yimo.
Paurusa ta lipopere kosipara saFelikisi
10Mupangeli eyi ga ninka Paurusa asi a uyunge, makura Paurusa ta limburura asi:
“Ame guna dama nge mokulipopera nyamwange komeho zoge, yeeyi na diva asi nomvhura nonzi wa pangura muhoko ogu. 11No yi mona tupu nyamoge asi, kapisi mazuva gokupitakana murongo nagavali gana piti po, kutunda apa na kandukire koJerusarema ni ka kanderere. 12Kapi va gwana nge montembeli tatu lipatana nomuntu ndi asi ni yoronganese mbunga, nomosinagoge si nomontembeli si nomositata si. 13Noyininke eyi asi yiyo vana monene nge usima, nokuyitanta si awo. 14Nye eyi tani yi ku divisa asi, erongo eli vana kutumbura epiyaganeko, Karunga gozinyakurwetu ani kerere, ame nye na pura nayinye eyi va tjanga moVeta nomovaporofete. 15Ehuguvaro lyomwaKarunga eli na kara nalyo, nawo yilyo va kara nalyo, asi vantu navenye, va kare vawa ndi vadona, ngava va pindura koufe. 16Yiyo nye ani liyomberesere hena narunye asi ni kare nezwi lyewa lyokomutjima kwaKarunga nokovantu.
17“Eyi pwa pita nomvhura dononzi, makura yiyo na reterere vahepwe uhwi, ame ni ya zambe hena nonzambo. 18Hana hokwa eyi, makura Vajuda vamwe ava va tundire moAsiya tava ya gwana nge montembeli, ame vana zeresa nge, nye kapisi nombunga ndi mondyorongani. 19Awo yiwo va fira kuwiza kosipara soge, va ya pe nge usima, nsene asi pouli. 20Ndi nampili vava yiwo muna ninki va tante udona wange ou va mwene nge, apa na kere mosigongi sosinene somasimbi, 21ntudi morwazeezi nkango na zigilire ame nina sikama pokatji kawo, ni tante asi: ‘Evhumbuko yilyo lina reta nge komeho zoge mombangwiliro!’ ”
22Ano Felikisi eyi ga yi zuvha, nampili ngomu ga divire nawa yerongo lyoukriste, ta tanta asi: “Mupitisili govakwayita eyovi Lisiyasa, tanko nga wize, ntani ngani ya tara po nawa poyininke yeni.” 23Age makura ta tantere mupitisili govakwayita efere asi Paurusa va mu takamese. Nye a gwane emanguruko kanunu, age hena vakwawo va ha va silika mokumukwafa.
Paurusa tava mu nomene
24Ga pita po mazuva gamwe, makura Felikisi ta wiza namukadendi goMujuda, edina lyendi Durusira. Awo tava ninki nye va ka rete Paurusa va ya zuvhe yepuro lyomwaKristusa. 25Nye apa ga uyungire yokuhamena uhungami nomalikandano gomuntu nyamoge nepanguro lyokomeho, makura Felikisi tagu mu pwaga unene, ta limburura asi: “Oru ngesi zende tanko. Ntene ngani gwana ruveze, ngani ku tumina va ka ku zigide.” 26Opo ngoso hena age kwa here asi, Paurusa ngano a mu pe yimaliva, makura a mu sige a ze. Yiyo nye nga ninka‐ninkire nkenye apa, va ka zigide Paurusa va ya likunde nendi.
27Nomvhura mbali tadi ka pita, mevega lyaFelikisi makura tamu zi Porokiusi Fesitusa. Ano Felikisi morwa kwa here kulimonekesa uwa koVajuda, yiyo ga mu sigilire Paurusa modorongo.
© Egwanekerobibeli Lyanamibia 1987, 2003
© Bible Society of Namibia 1987, 2003