Yirugana Yovapositoli 23
23
1Paurusa makura ta rerurura kutara vanasigongi, ta tanta asi: “Vakwetu, ame kwa genda nezwi lyewa lyomomutjima kosipara saKarunga dogoro nanaina ngesi.” 2Makura mupristeli gomunene Ananiyasa ta tantere ava va sikamene pepi nendi asi va mu toone kokana. 3Ano Paurusa ta mu tantere asi: “Karunga na ku toona — ekuma ove va kwita yoyizera! Ove ono hingire oko asi o pangure nge paVeta. Nye ove kuna kutaguruka Veta pokuninka asi va toone nge!” 4Ava va sikamene pepi naPaurusa tava tanta asi: “Ove kuswaura mupristeli gomunene gwaKarunga ove?” 5Makura Paurusa ta tanta asi: “Kapi na yi diva vakwetu asi, ogo mupristeli gomunene, yeeyi kwa tjanga asi, ‘Nokuuyungira si momudona mupangeli gomuhoko goge.’ ”
6Ano Paurusa apa ga divire asi, vamwe mo Vasadukayi, ano ava vamwe mo hena Vafalisayi, makura ta zigire mosigongi asi: “Vakwetu, ame ni Mufalisayi, ame hena ni munwaMufalisayi. Eyi yina retesa nge kompanguro, ntudi yeeyi sa na ndindira evhumbuko lyokoufe ayi huru sa!” 7Tupu ga yi tanta ngoso, makura nompata tadi vareke nye pokatji koVafalisayi noVasadukayi. Mbunga makura tazi ligaunuka. 8Yeeyi Vasadukayi kutanta asi kutupu evhumbuko novaengeli si nonompepo si, ano Vafalisayi awo va pura nayinye eyi. 9Makura tapa katuka nzogera zonene. Valirongi womatjangwa ava va hamena koVafalisayi tava patana unene, tava tanta asi: “Mutupu udona momugara ogu. Nampo Mpepo za mu uyungisa ndi muengeli.”
10Ano dina kuyadida nompata, makura mupitisili govakwayita eyovi, tau mu kwata woma asi nampo nava mu lipapagwira Paurusa. Makura ta tantere vakwayita asi, va mu guse po mononkondo pokatji kawo, va mu tware mokamba.
11Masiku ga kweme ko, Hompa ta ya sikama pwaPaurusa, ta tanta asi: “Kwata mutjima, Paurusa! Moomu wa gavera nge umbangi moJerusarema nomoRoma, yimo ngorooro ngo ka u gava.”
Paurusa tava mu liyongo omu nava mu rugana
12Kwa sa ko, Vajuda tava lizuvhu, makura tava liganangeda asi nokulya si ndi asi va nwe, age Paurusa ga hana kufa. 13Ava va liganangedere kupita ponomurongo ne. 14Makura tava zi kovapristeli wovanene nokomasimbi goVajuda va ka tante asi: “Ose kuna liganangeda asi twa ha makera yuma, ntudi Paurusa tuna dipaga ntani. 15Ano one nosigongi somasimbi, tumineni eraka mupitisili govakwayita eyovi, nga mu tumine Paurusa mungura kweni, ngwendi nyone ava asi kuna hara mu ya mu pururure nonkango dendi. Yeeyi ose kuna mu liwapaikire kumudipaga, age simpe kapi ana ya siki kweni.”
16Simpumba saPaurusa gomugara nani nye ana yi zuvhu omu vana mu liyongo, makura ta zi mokamba zovakwayita a ka yi sansekere Paurusa. 17Makura Paurusa ta zigida mupitisili gumwe govakwayita efere, ta tanta asi: “Twara ogu munona komupitisili govakwayita eyovi, yeeyi noyuma ana kara yokumutantera.” 18Makura mupitisili govakwayita efere ta mu twara komupitisili govakwayita eyovi, ta mu tantere asi: “Nkwate Paurusa kuna zigida nge, yiyo ana tanta asi ni rete ogu mudinkantu koge, morwa noyuma ana kara yokuyakutantera.” 19Mupitisili govakwayita eyovi ta mu kwata kokuwoko, va lipore po, makura ta mu pura asi: “Yuma musinke eyi ono hara kusansekera nge?” 20Age makura ta mu limburura asi: “Vajuda kuna lizuvhu asi va ku hundire, nkumwe ngo tware Paurusa kosigongi sovakurona vawo mungura, ngwendi nyove ogu asi kuna hara hena o ka pururure nonkango dendi. 21Nye ove wa ha yi tarerera, yeeyi koveli vagara wokupita ponomurongo ne vana mu vandere, awo kuna gana asi nokulya si ndi asi va nwe yuma, awo va hana kudipaga Paurusa. Awo nare vana mana kumuliwapaikira. Nye epulisiro lyoge lyelike vana kundindira.” 22Mupitisili govakwayita eyovi ta ninki ogo mudinkantu a ze, makura ta mu tantere asi: “Nokuyitanta si asi ono ya yi divisa nge.”
Paurusa tava mu tumu komupangeli Felikisi
23Makura mupitisili govakwayita eyovi ta zigida vapitisili vavali novakwayita efere, ta tanta asi: “Wapaikeni vakwayita mafere gavali va ze koKesareya, varondi nawo nomurongo ntano‐nambali, ano vagara womagonga nawo va kare mafere gavali. Liwapaikeni usimbu mu ze koKesareya masiku poyiha yotundi zautano‐nane. 24Kutireni hena ukambe ou na ronda Paurusa, mu ka mu sikise nawa kwaFelikisi, mupangeli gosirongo.” 25Age makura ta tjanga mbilive zoyikaramo yangesi:
26“Keraudiusi Lisiyasa ta kundu mupangeli gekuto, Felikisi! 27Mugara ogu Vajuda va mu kwete asi ngano va mu dipage, ano ame novakwayita vange tatu kara po nye tu mu popere, yeeyi ame kwa zuvhire asi age Muroma. 28Morwa ame kwa here kudiva unzoni ou va mu pere, yiyo na mu twere kosigongi somasimbi gawo. 29Ni ka yi gwane, doodo nompata doVeta zawo yido vana kumupera unzoni, nye kapisi yuma yokumudipagesesa ndi yokumumangesesa. 30Neyi hena na zuvhu asi Vajuda kuna mu lizuvhu va mu vandere, yiyo nye na mu tumine koge kumwe nava wokumumona unzoni. Ame kuna va tantere asi ngava ya u mu monene nye kosipara soge.”
31Vakwayita tava gusa Paurusa moomu va va tanterere, va mu tware masiku koAntipatilisi. 32Lina kusa ko, makura tava mu pe varondi wononkambe va mu tware, nye woporupadi tava tengura kokamba. 33Awo eyi va ka sika koKesareya, makura tava gava mbilive komupangeli, awo tava mu likida Paurusa. 34Mupangeli ta zi resa ozo mbilive, age ta pura hena asi kosirongoke ga hamena. Ano apa ga zuvhire asi koKilikiya ga tunda, 35ta tanta asi: “Tanko ngava wize ava wokumupa nzo, ntani ngani ya ku pura.” Age ta panga asi va mu takamesere mosinyanga saHerodesa.
© Egwanekerobibeli Lyanamibia 1987, 2003
© Bible Society of Namibia 1987, 2003