Yirugana Yovapositoli 25
25
Paurusa kwahompa gwaRoma
1Fesitusa makura ta zi mosirongo. Ano pwa pita mazuva gatatu, ta tundu mo moKesareya a ze koJerusarema. 2Vapristeli wovanene novanamadina tava ya heta Paurusa kwendi, 3tava mu sininike asi, ngano a pure tupu va rete Paurusa a wize koJerusarema, yeeyi kwa here kumuvandera asi ngava mu dipagere monzira. 4Nye Fesitusa ta limburura asi: “Paurusa kuna kumukunga moKesareya, name si ntaantani ni tengure mo. 5Ano vagara womokatji keni ava ya tumbukira, tu ze nawo. Nsene epuko mo mogu mugara, ngava ka mu pe unzoni.”
6Kapi ga kere mo hena mazuva gokupita gatano‐nagatatu ndi murongo ngoso, makura ta zi koKesareya. Ano eyi kuna kusa, ta hingire kosipundi sombangwiliro, makura ta tumine ko, va ka rete Paurusa. 7Tupu ga horoka, Vajuda ava va tundire koJerusarema, tava mu umbilikida, va rundaike marundiro Paurusa. Nye kutupu madi gago. 8Paurusa ta lipopere asi: “Ame kapi nina kulipoperera nampili nakauke asi morwakuzona Veta zoVajuda ndi ntembeli ndi asi hompa gwaRoma.” 9Fesitusa morwa kwa here a limonekese uwa koVajuda, ta pura Paurusa asi: “Kapi ono hara o ze koJerusarema ni ka ku purakenene ko yininke eyi?” 10Paurusa ta mu limburura asi: “Ame komeho zombangwiliro zahompa gwaRoma na sikama, yipo namu tokwera nge paapa. Vajuda kapi na va rugana yoyidona ame, nove wa yi diva tupu. 11Nomfa kapi na di nyoka, nsene asi ame kwa zona ndi yuma yokudipagesa nge na rugana. Nye nsene mutupu yuma moyininke eyi vana kupera nge unzoni, makura nagumwesi gokuvhura kugava nge kwawo. Ame kwahompa gwaRoma nina tara!” 12Apa ga mene Fesitusa kulikunda nosigongi, ta limburura asi: “Moomu ono tara kwahompa gwaRoma, kwahompa gwaRoma ngo za!”
Paurusa kosipara saAgilipa naBerenike
13Kapi pwa pita mazuva gomanzi, makura hompa Agilipa naBerenike tava wiza moKesareya kwaFesitusa va ya mu kunde. 14Mazuva aga va kere ko, makura Fesitusa ta sanseke nonkango daPaurusa kwahompa, ta tanta asi: “Mugara ogu ga siga Felikisi modorongo, gogu. 15Age kwa mu hetere vapristeli wovanene nomasimbi goVajuda, asi va mu pangure ame simpe moJerusarema. 16Ame makura tani va limburura asi, nkedi ezi zokutokwera muntu konomfa, age munzoni ga hana kukara koyipara yava vana mu mono unzoni a lipopere, kapisi zoVaroma. 17Eyi va ya ponga apa, kapi na yi twara hena ntando, kwa sa tupu makura tani ka hingira posipundi sombangwiliro, tani tumu va mu rete ogo mugara. 18Nye wokumupa usima tava patukire po, nye kapi va gwene usima womutompo moomu na gazarere. 19Awo kwa lipatanene nendi yokuhamena erongo lyawo neyi yokuhamena Jesus ogu ga fa, nye Paurusa kumutanta asi muzuni. 20Ame kwa limbire nge, nayimwe si eyi nkare ni guse po, makura yiyo na pulire Paurusa asi ntene ana hara kuza koJerusarema, va ka lipulire oko yininke oyo. 21Ano Paurusa apa ga here asi nga ka mu tokore hompa gwaRoma, ame makura tani ninki asi va mu takamese dogoro noku ngani mu tuma kwahompa gwaRoma.” 22Makura Agilipa ta tantere Fesitusa asi: “Name na hara ni mu zuvhe ogo mugara.” Gwina makura ta mu limburura asi: “Mungura ngo mu zuvha.”
23Ngurangura oAgilipa naBerenike awo vana porere, tava wiza monzugo zomapangwiro kumwe novapitisili wovakwayita eyovi novanamadina womositata. Fesitusa makura ta tumine Paurusa va ka mu rete mo. 24Fesitusa makura ta tanta asi: “Hompa Agilipa novagara namuvenye one muna kara apa kumwe nose, mu tareni nye ogu mugara gwa sininikire nge muhoko nagunye goVajuda moJerusarema oku tava zigire asi ga ha kara hena nomwenyo. 25Ano ame na mono asi age kutupu yokumutwaredesa konomfa, age mwene ga lihamesera kwahompa gwaRoma, yiyo nye na tokora asi ni mu tume ko. 26Apa na kara neyi nani tjangera hompa, yina limbi nge, yiyo nye nina mu retere koyipara yeni, nye unene koge ove hompa Agilipa, asi apa na pwa kumupururura, mpamwe nani tjanga ko yuma. 27Yeeyi kutuma nkwate ove wa hana kuhorora usima wendi, kapi ya wapa hena.”
© Egwanekerobibeli Lyanamibia 1987, 2003
© Bible Society of Namibia 1987, 2003