Yirugana Yovapositoli 22
22
1“Vakwetu none oguhyavanona, purakeneni omu nina kulipopera komeho zeni.” 2Ano eyi va zuvha asi ta va uyungisa meraka lyoSihebeli, makura tava mwena nye teete. Age ta tanta asi:
3“Ame Mujuda kwa vharera nge moTaruso somoKilikiya, nye omu moJerusarema yimo na kulira, ano Gamaliyera yige nga rongo nge mokukwama nawa‐nawa Veta zozinyakurwetu. Ame gomupampi mweyi yaKarunga na kere ngwendi nyone. 4Erongo eli ame kwa li hepekerere vantu dogoro konomfa. Ame ngani pandeke vagara novakadi ni va gave kodorongo. 5Mupristeli gomunene nosigongi somasimbi yido nombangi dange. Yiwo va pere nge nombilive, ni ze kovakwetetu ava va kere moDamasikusi asi ni ka va rete koJerusarema awo kuna va manga, va ya va futise.
Elitezururo lyaPaurusa
6“Hana hokwa monzira zange asi ni ze koDamasikusi ago mutwekatji, na liharuka ko, uzera wounene una kutunda keguru u minikire nge. 7Ame makura tani ligandere pevhu, tani zuvhu ezwi lina kutantera nge asi, ‘Sauru, Sauru, yinke ono kuhepekera nge?’ 8Makura ame tani limburura asi, ‘Nyove yilye Hompa?’ Age ta tantere nge asi, ‘Nyame Jesus, Munasareta, ogu ono kuhepeka.’ 9Ava twa kere nawo, uzera nawo va u mwene, nye ezwi lyogu ga uyungire name kapi va li zuvhire. 10Makura ame tani pura asi, ‘Yinke nani rugana Hompa?’ Age makura ta tantere nge asi, ‘Katuka o ze koDamasikusi, oko yiko nava ka ku tantera nayinye eyi vana ku harere asi ngo yi rugane.’ 11Meho gange kwa twikire kowo uzera, makura vakwetu tava kwata nge komupango dogoro koDamasikusi.
12“Mugara gumwe Ananiyasa kwa kere muntu gomuhungami mokuhamena koVeta. Vajuda navenye womoDamasikusi ngava mu fumadeke. 13Makura age ta wiza kwange, ta tantere nge asi, ‘Hewa Sauru, mona hena!’ Poopo ngoso makura tani tara ko, tani mu mono. 14Age makura ta tanta asi, ‘Karunga gozinyakurwetu, yige ga yi ku pa asi o dive mpango zendi, ove hena o mone Mukereli gwendi goMuhungami, ove o zuvhe ezwi lyomokana kendi. 15Yeeyi ove ngo kara mbangi zendi kovantu navenye kweyi ono mono neyi ono zuvhu. 16Ntaantani yinke hena ono kundindira? Katuka o kuge edina lyaHompa, va ku kuhwe, nonzo doge va di ku dongwenene po.’
Paurusa tava mu tumu kovapagani
17“Eyi na tengura koJerusarema, hana hokwa kukanderera montembeli, tani mono emoneko. 18Makura tani mono Jesus, age ta tantere nge asi, ‘Genderera kutunda mo omu moJerusarema, yeeyi umbangi woge wokuhamena nge, kapi ngava u tambura.’ 19Ame tani mu limburura asi, ‘Navenye va yi diva tupu asi, ame ngani va tura modorongo oku tani va toonene monosinagoge, navenye ava va ku pura; 20napa va dipagere Sitefanesa, mbangi zoge, ame nyame ogu, nolyo edipago lyendi ame kwa li pandere. Ano yikoverero yava va mu dipagere nyame na yi kungire.’ 21Nye age ta tantere nge asi, ‘Zende, yeeyi ame kuna hara ni ku tume ure kovapagani.’ ”
Paurusa nomukurona govakwayita goVaroma
22Mbunga kwa mu purakenene dogoro ponkango ezi, makura tava zogomoka asi: “Muntu gwangesi kumudimisa ko ntani konauzuni! A fe ntani!” 23Hava za kuzogomoka oku tava natagura yikoverero yawo nokurafagura evhu, 24makura mupitisili govakwayita eyovi ta tanta asi, va mu tware mokamba, awo va mu sopore oku tava mu pururura asi, Vajuda yinke vana kumuzogomokerera. 25Ano eyi vana kumumanga nomaliva, Paurusa ta tantere mupitisili govakwayita efere asi: “Ayo sili va yi gava tupu yokutoona Muroma gomvharerwa, age va hana kumupangura muhowo ndi?” 26Mupitisili govakwayita efere kwa yi zuvha tupu, makura ta zi a ka tantere mupitisili govakwayita eyovi asi: “Yinke ono hara kurugana no? Mugara ogu Muroma.” 27Mupitisili govakwayita eyovi ta mu wizire, ta mu pura asi: “Tantera nge, nani o Muroma?” Paurusa ta limburura asi: “Nhi.” 28Mupitisili govakwayita eyovi ta tanta asi: “Ukwasirongo wange, ame kwa u randa noyimaliva yoyinzi.” Paurusa ta mu tantere asi: “Ano ame wange kwa vhara nge nawo.” 29Ano ava nkare va mu pururure, yipo va ninkire va mu sige usimbu‐simbu. Mupitisili govakwayita nage kwa mu pwagere, apa ga ya zuvhire asi muntu ogu Muroma, nye age yiyo ana mu manga.
Paurusa kosigongi somasimbi
30Eyi kwa sa ko, makura mupitisili govakwayita eyovi ta hara a dive nawa‐nawa asi yinke eyi vana kumurundaikira Vajuda. Age makura ta mu mangurura, ta tumine vapristeli wovanene asi va ponge nosigongi sawo sosinene nasinye. Age makura ta reta Paurusa, ta ya mu sikameke komeho zawo.
Currently Selected:
Yirugana Yovapositoli 22: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003