Yirugana Yovapositoli 21
21
Rugendo rwaPaurusa rokoJerusarema
1Eyi twa ligaunuka nawo, makura tatu sura nye tu vyukilire dogoro koKoso. Lya sa ko, tatu ka sika poRodesi. Twa tunda po, poPatara. 2Opo tatu gwana po sikepa ezi za vyukire koFenisiya, omo yimo twa rundurukilire, tatu ka za. 3Ano Kipurusi eyi tuna kuyamumona, tatu mu hamesere korumoho, makura tatu zi koSiliya. Tatu wiza poTirusi, yeeyi sikepa yipo sa ka rongwerere murongero gwazo. 4Omo kwa gwene mo varongwa, makura tatu kara mo mazuva gatano‐nagavali. Mpepo tazi va ninki, va rondore Paurusa asi ga ha za koJerusarema. 5Nye ga tu pwa mazuva getu omo, makura tatu katuka tu ze nonzira zetu. Awo navenye kumwe novakadi vawo novanona, makura tava tu sindikire va tu pwagese mo mositata. Konontere defuta makura tatu tongeke nongoro tu kanderere 6oku tatu lirekera‐rekere. Ose makura tatu perama nye, ano awo tava tengauka komambo gawo.
7Ose makura tatu twikire nzira zetu zokutunda koTirusi, tu wize poPutoremaisi, makura tatu kundu vakwetetu, tatu kara pwawo ezuva limwe. 8Eyi kwa sa, makura tatu katuka tu ze moKesareya. Tatu zi membo lyaFilipusa, muudisi goMbudi zoNgwa, ogu ga kere mukwawo govakuafi wombungakriste vena vatano‐navavali. Ose makura tatu kara pwendi. 9Age kwa kere novana vendi wovakadona vane wovadike, ava va kere nosigava sokuporofeta. 10Ha twa hokwa kukara oko mazuva gamwe, muporofete gumwe ga tundire koJudeya, edina lyendi Agabusi, ana wiza. 11Age kwa wiza tupu, makura ta gusa liva rwaPaurusa, ta limanga mwene komawoko nokonompadi, ta tanta asi: “Mpepo zoKupongoka kuna kutanta asi, mwenyaliva oru yimo ngorooro ngava ka mu rugana Vajuda moJerusarema, awo ngava ka mu gava momawoko govapagani.” 12Ano eyi twa yi zuvha eyi kumwe novakwetetu vepevega olyo, makura tatu likwambere Paurusa asi, ga ha za koJerusarema. 13Nye Paurusa ta limburura asi: “Yinke oyo muna kurugana, tomu lili mu dombese mutjima gwange? Yeeyi ame kapisi dorongo zelike na litokwere, nokufira edina lyaHompa moJerusarema kooku.” 14Eyi ga tu tjindira, makura tatu tanta asi: “Mpango zaHompa zi zike mo!” Makura tatu mwena.
15Ano ga pwa mazuva aga, makura tatu liwapaike tu kanduke koJerusarema. 16Varongwa vamwe womoKesareya kumwe nawo twa zire, makura tava tu twara kembo lyaMunasoni gomoKipurusi, murongwa gwanare, asi ngano yimo natu ka kara.
Paurusa ta tarere po Jakopo
17Twa wiza moJerusarema, vakwetetu tava tu tambura nehafo. 18Eyi kuna kusa, Paurusa tatu zi nendi kembo lyaJakopo; twa za, vakurona navenye wombungakriste awo vana pongo. 19Ga mana kuvakunda, makura ta va sansekere nayinye eyi ga mu ruganesesa Karunga movapagani. 20Apa va yi zuvhire, makura tava fumadeke Karunga, tava tanta asi: “To mono, mukwetu, Vajuda ava va litezurura mayovi, nye navenye kwa kondyerere Veta. 21Awo hena kwa zuvha asi, ove kuna kukaronga Vajuda ava va kara movapagani, va zumbe yaMosesa, pokutanta asi walye ava rugana yovamba vana vawo, hena asi nonkedi doSijuda nado nokudisikura si. 22Ngapi nye natu rugana? Tuna yi diva asi vanzi nava ponga, nsene va ka zuvha asi ko wizire. 23Ano rugana nye moomu tuna kukutantera. Ose kuna kara novagara vane ava va gana mugano. 24Zende nye novagara ava, ove o ka lizerese kumwe nawo, ove hena o ka va futire, va ka kururwise nohuki dokonomutwe dawo. Ano navenye ava nava ka mona eyi, tava ka uyunga, asi eyi vana kuuyunga nani yomawoko‐woko, yeeyi nove kusikisa mo Veta nawa‐nawa. 25Nye mokuuyunga yokuhamena kovapagani ava va pura, tuna va tjangere mbilive zeteto asi, walye ava li nkenye nondya edi va zamba kovakarunga, ndi honde ndi sinamwenyo sokudipaga nkumatere ndi asi va kare norukehe.” 26Paurusa ta zi nye novagara. Eyi lya sa ko, makura ta ka lizeresa kumwe nawo. Age ta zi nye montembeli a horore asi ezuva lipi ngali pwa ezereso lyawo, asi nzambo zankenye ogu nkumwe va zi rete mo, aro ruveze kapi runa pu po.
Paurusa tava mu kwata montembeli
27Ano mazuva gatano‐nagavali eyi ga pwa, makura Vajuda wokutunda moAsiya tava mono Paurusa montembeli. Awo makura tava piyaganeke mbunga mudima va kwate Paurusa, 28tava zigire unene asi: “Vagara one woVaisraeli, tu kwafeni! Muntu ogu a rongo napenye vantu navenye va lilimbe nomuhoko gwetu nevega eli, gogu! Age hena kureta noVagereka vaava montembeli a nyatekese evega eli lyokupongoka.” 29Yeeyi va mwene pomuhowo Torofimusi Muefeso kumwe nendi, yipo va gazarere asi Paurusa ga mu twere mo montembeli. 30Sitata nasinye makura tasi kara mondjorongani, vantu tava dukire simwe, awo makura tava kwata Paurusa, tava mu kokere ponze zontembeli, ngapa katu popi mavero nare vana ga pata. 31Vana kuninka asi ngano va mu dipage, nani nye ezwi lina ka sika nare komupitisili govakwayita eyovi woVaroma asi Jerusarema nazinye mondjorongani zina kara. 32Age makura ta genderere kugusa vakwayita novapitisili wovakwayita efere, makura tava duka va ze ko. Awo kwa mona tupu mupitisili govakwayita, makura tava hageke kutoona Paurusa. 33Mupitisili govakwayita eyovi makura ta wiza, ta mu kwata, ta tanta asi, va mu mange nomalyenge gavali. Age ta pura asi yige yilye neyi ana rugana asi yinke. 34Mbunga makura tazi zigire ava ngesi ava ngesi. Ano morwa nzogera nzi, kapi hena ga divilisire asi yosili po yipi. Age ta tanta asi, va mu tware mokamba zovakwayita. 35Va ya sika posirondero, makura Paurusa tava mu damuna vakwayita, morwandjorongani zovantu. 36Yeeyi mbunga zovantu kwa kwamene ko oku tazi zigire asi: “A fe!”
Paurusa ta lipopere
37Ano tupu vana kuninka asi va mu hwilide mokamba, makura Paurusa ta tantere mupitisili govakwayita eyovi asi: “Enye kuvhura tupu asi ni ku tantere ko ndi?” Gwina ta mu limburura asi: “Nye wa diva Rugereka ndi? 38Nani kapisi nyove Muegipite ogu ga retere ndjorongani yiyo ka twere vakorokotji mayovi gane momburundu?” 39Paurusa ta limburura asi: “Ame ni Mujuda gomoTaruso, vharerwa zositata sa fumana moKilikiya. Na kanderere, pe nge evega ni uyunge novantu.” 40Ano eyi va mu pa evega, makura Paurusa ta zi a ka sikame poyirondero a kave mbunga nokuwoko. Eyi vana kumwena pore, age ta va tantere meraka lyoSihebeli asi:
© Egwanekerobibeli Lyanamibia 1987, 2003
© Bible Society of Namibia 1987, 2003