Yirugana Yovapositoli 20
20
Rugendo rwaPaurusa rokoMakedoniya naGereka
1Ndjorongani eyi za pwa, makura Paurusa ta zigida varongwa, ta va korangeda ta va rekere, ta katuka a ze koMakedoniya. 2Age kwa gendere a pite moyirongo oyo oku ta korangeda vantu nononkango dononzi, makura ta wiza mosirongo saGereka. 3Omo kwa kere mo makwedi gatatu. Apa ga ninkire asi a ze koSireya, nani nye Vajuda vana mu lizuvhu va di mu vyuke, age makura ta tokora a gende zaMakedoniya pokutengura. 4Sopateli, munwaPirusi gomoBereya kwa mu sindikilire, ano kutunda moTesaronika oAresitalikusi naSekundusi naGaiyusi gomoDerube naTimoteusa, oTikikusi naTorofimusi womoAsiya. 5Awo kwa pitire komeho, tava ka tu ndindilira moTorowasa. 6Konyima zomazuva gosipito soNomboroto da hana Muhahu, makura tatu tundu moFilipi tu gende zomomema. Mazuva gatano makura tatu ka va gwana moTorowasa, tatu kara mo mazuva gatano‐nagavali.
Etareropo lyaPaurusa lyokuhulilira moTorowosa
7MoSondaha apa va pongere varongwa va lye Murarero goKupongoka, Paurusa makura ta likundu nawo dogoro pokatji komasiku, morwa age kwa here asi eyi kuna kusa, age makura ta zi. 8Noramba nonzi da kere mo monzugo zekeguru ezi twa pongere. 9Mumati gumwe Eutikusi kwa hingilire pekende, makura ta sonotokere monompofu. Ano Paurusa age simpe kapi ana gumbura kuuyunga, nompofu dina mu dekerere nye. Age makura ta gu konzugo zautatu zekeguru. Simpu nye va ka damuna. 10Paurusa makura ta humburuka pevhu, ta mu lidingire momawoko, ta tanta asi: “Gwa ha mu pwaga, yingasi simpe moguli!” 11Age makura ta rondo hena konzugo zekeguru, makura ta bamuna mungome a lye. Kwa uyunga ko siruwo sosire, ezuva nalyo tali pumu, age ta katuka a ze. 12Ogo mumati va mu twara kembo, age muzuni. Nye kwa va hengagwidire unene.
Paurusa ta tundu moTorowosa a ze koMiretusi
13Ose kwa livindukire kupita komeho nosikepa, tatu wiza moAsosi. Amo yimo twa gazarere asi, yimo natu ya perekera Paurusa, yeeyi yimo ga yi penge. Age mwene kwa gendere korupadi a ze oko. 14Ano eyi ga ya tu gwana moAsosi, makura tatu mu pereke tu ze koMitirene. 15Eyi twa tunda opo, lina kukasa ose tuna siki apa pwa livyuka naKiyosi. Ezuva lya sikwire ko tatu vindakana tu ze koSamosi. Ano lina kusa ko hena, tatu wiza nye moMiretusi. 16Paurusa kwa tokwere kupitakana Efeso, neisi na manena siruwo moAsiya. Age kwa genderere asi ntene yi mu wapera, ngano nga ka danene Pentekoste moJerusarema.
Paurusa ta rekere vakurona woMbungakriste womoEfeso
17Paurusa kwa tumine ntumi zi tunde moMiretusi zi ze koEfeso, zi ka zigide vakurona wombungakriste. 18Ano apa va ya mu gwene, ta va tantere asi: “One mwa diva sa asi kutundilira kezuva lyopomuhowo eli na wizire moAsiya, yipo na gusa kukara neni. 19Ame ngani ruganene Hompa mokulisupipika nomoruhodi nomomahepeko, aga ngaga tundilire mokuvandera nge Vajuda. 20Mwa yi diva asi ame kapi na mu horeka ko yimwe yokumukwafa, nye ame ngani mu udisire oku tani mu rongo moyipafi nomomambo geni. 21Vajuda noVagereka na va tantera asi va litezurure va rugwire kwaKarunga, awo hena va pure Hompa gwetu Jesus Kristusa. 22Nye ntaantani ame tani zi koJerusarema momusinininko goMpepo, nye kapi nina yi diva eyi ngayi ka gwana nge ko. 23Eyi na diva ko yeyi asi Mpepo zoKupongoka za pukurura nge ko, asi mwankenye sitata nomango nomaudigu gana ndindire nge mo. 24Nye ame nombili si zayo ndi asi ni ruve mwenyo gwange. Sinene tani sikisa mo nehafo rugendo rwange nosirugana esi ga pa nge Hompa Jesus asi ani sanseke Mbudi zoNgwa zonkenda zaKarunga.
25“Ano ntaantani na diva asi namuvenye one na dingura, yiyo na mu zuvhisira yoUntungi waKarunga, kapi ngomu mona nge hena. 26Mwanaina ngesi tani mu tantere asi, nsene pweli ogu nga ka zumbana, kapisi nzo zange. 27Ame nayimwe si eyi na mu hupisira ko, nye na mu zuvhisira mpango nazinye zaKarunga zeparu. 28Litakameseni nye, one mu takamese mbungakriste, omu za mu tura Mpepo zoKupongoka asi mu kare vatareli, mu kare vasita wombungakriste zaKarunga, ezi ga ligwanena konomfa daMunwendi thi. 29Ame na yi diva asi, nsene ngani za, mamumbungu gonyanya ngaga wiza mokatji keni, ago kapi ngaga mu tupura one mbungakriste. 30Nomokatji keni si namo ngamu kara vamwe ava ngava uyunga yininke yoyimpempa, asi ngava gwane ko varongwa. 31Yiyo nye nomu takamesa oku tomu diworoka asi nomvhura ntatu na mu korangeda namuvenye one masiku nomutenya noruhodi.
32“Ntaantani ame tani mu gava kwaKarunga nokononkango donkenda zendi, edi da kara nononkondo dokumukulika, none ngomu gwane upingwa kumwe nava va pongora. 33Ame kapi na nyenena sisiliveli ndi ngorodo ndi sikoverero somuntu. 34None mwa yi diva asi mawoko gange aga, yigo ga hepurura nge momaruhepo gange naga gava va kara pwange. 35Ame na mu likida mwanayinye asi mokurugana ngesi omu kwafe vankundi, oku tatu diworokeni hena nonkango daHompa Jesus edi ga tente asi, ‘Kugava kwa kara nerago, kwa pitakana kutambura.’ ”
36Paurusa eyi ga mana, makura ta tongeke nongoro kumwe nawo navenye, va kanderere. 37Awo navenye makura tava lili unene, tava dingire Paurusa monsingo, tava mu ncumita. 38Awo kwa guvire unene kononkango edi ga tente asi, awo kapi ngava mu mona hena. Makura tava mu sindikire kosikepa.
© Egwanekerobibeli Lyanamibia 1987, 2003
© Bible Society of Namibia 1987, 2003